| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
একুত্তরিকনযো দসকৰারৰণ্ণনা
Ekuttarikanayo dasakavāravaṇṇanā
৩৩০. দসকেসু অট্ঠানে ৰা পনাতি অকারণে ৰা পন। তত্থাতি নৰকেসু। ‘‘নত্থি দিন্নন্তিআদিৰসেনা’’তি আদিসদ্দেন ‘‘নত্থি যিট্ঠং নত্থি হুত’’ন্তিআদযো (ধ॰ স॰ ১২২১; ম॰ নি॰ ৯৪.২২৫; ৩.৯১, ১১৬; সং॰ নি॰ ৩.২১০; অ॰ নি॰ ১০.১৭৬) নৰ নত্থিকা সঙ্গহেতব্বা। ‘‘সস্সতো লোকোতি আদিৰসেনা’’তিআদিসদ্দেন (দী॰ নি॰ ১.৩১; ম॰ নি॰ ১.২৬৯) ‘‘অসস্সতো লোকো’’তিআদযো (ম॰ নি॰ ১.২৬৯) নৰ অন্তগ্গাহিকে সঙ্গণ্হাতি। ৰিপরীতা সম্মত্তাতি দসহি মিচ্ছত্তেহি ৰিপরীতা দস সম্মত্তা সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি সম্মাঞাণং সম্মাৰিমুত্তীতি।
330. Dasakesu aṭṭhāne vā panāti akāraṇe vā pana. Tatthāti navakesu. ‘‘Natthi dinnantiādivasenā’’ti ādisaddena ‘‘natthi yiṭṭhaṃ natthi huta’’ntiādayo (dha. sa. 1221; ma. ni. 94.225; 3.91, 116; saṃ. ni. 3.210; a. ni. 10.176) nava natthikā saṅgahetabbā. ‘‘Sassato lokoti ādivasenā’’tiādisaddena (dī. ni. 1.31; ma. ni. 1.269) ‘‘asassato loko’’tiādayo (ma. ni. 1.269) nava antaggāhike saṅgaṇhāti. Viparītā sammattāti dasahi micchattehi viparītā dasa sammattā sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi sammāñāṇaṃ sammāvimuttīti.
দস আদীনৰা নিদ্দিট্ঠাতি সম্বন্ধো। উন্দূরক্খাযিতন্তি মূসিকেন খাদিতং। এত্থ হি খেধাতু খাদনত্থো হোতি। অগ্গিদড্ঢন্তি অগ্গিনা দড্ঢং। এতেসূতি এতেসু দসসু পংসুকূলেসু। উদকসাটিকং ৰা সংকচ্চিকং ৰাতি ভিক্খুনীনং উদকসাটিকং ৰা সংকচ্চিকং ৰা। এত্থ ৰাসদ্দো অনিযমৰিকপ্পত্থো।
Dasa ādīnavā niddiṭṭhāti sambandho. Undūrakkhāyitanti mūsikena khāditaṃ. Ettha hi khedhātu khādanattho hoti. Aggidaḍḍhanti agginā daḍḍhaṃ. Etesūti etesu dasasu paṃsukūlesu. Udakasāṭikaṃ vā saṃkaccikaṃ vāti bhikkhunīnaṃ udakasāṭikaṃ vā saṃkaccikaṃ vā. Ettha vāsaddo aniyamavikappattho.
পণ্ণসন্থারো তিণসন্থারেন সঙ্গহিতো। সব্বত্থাতি সব্বেসু দসকেসু।
Paṇṇasanthāro tiṇasanthārena saṅgahito. Sabbatthāti sabbesu dasakesu.
ইতি দসকৰারৰণ্ণনায যোজনা সমত্তা।
Iti dasakavāravaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১০. দসকৰারো • 10. Dasakavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / দসকৰারৰণ্ণনা • Dasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দসকৰারৰণ্ণনা • Dasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দসকৰারৰণ্ণনা • Dasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছক্কৰারাদিৰণ্ণনা • Chakkavārādivaṇṇanā
