| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. एकवन्दनियत्थेरअपदानं
10. Ekavandaniyattheraapadānaṃ
४८.
48.
‘‘उसभं पवरं वीरं, वेस्सभुं विजिताविनं।
‘‘Usabhaṃ pavaraṃ vīraṃ, vessabhuṃ vijitāvinaṃ;
पसन्नचित्तो सुमनो, बुद्धसेट्ठमवन्दहं॥
Pasannacitto sumano, buddhaseṭṭhamavandahaṃ.
४९.
49.
‘‘एकत्तिंसे इतो कप्पे, यं कम्ममकरिं तदा।
‘‘Ekattiṃse ito kappe, yaṃ kammamakariṃ tadā;
दुग्गतिं नाभिजानामि, वन्दनाय इदं फलं॥
Duggatiṃ nābhijānāmi, vandanāya idaṃ phalaṃ.
५०.
50.
‘‘चतुवीसतिकप्पम्हि, विकतानन्दनामको।
‘‘Catuvīsatikappamhi, vikatānandanāmako;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
५१.
51.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा एकवन्दनियो थेरो इमा गाथायो अभासित्थाति।
Itthaṃ sudaṃ āyasmā ekavandaniyo thero imā gāthāyo abhāsitthāti.
एकवन्दनियत्थेरस्सापदानं दसमं।
Ekavandaniyattherassāpadānaṃ dasamaṃ.
आलम्बणदायकवग्गो तेवीसतिमो।
Ālambaṇadāyakavaggo tevīsatimo.
तस्सुद्दानं –
Tassuddānaṃ –
आलम्बणञ्च अजिनं, मंसदारक्खदायको।
Ālambaṇañca ajinaṃ, maṃsadārakkhadāyako;
पञ्चपञ्ञास गाथायो, गणिता अत्थदस्सिभि॥
Pañcapaññāsa gāthāyo, gaṇitā atthadassibhi.
Footnotes:
