| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२४. उदकासनवग्गो
24. Udakāsanavaggo
१. उदकासनदायकत्थेरअपदानं
1. Udakāsanadāyakattheraapadānaṃ
१.
1.
‘‘आरामद्वारा निक्खम्म, फलकं सन्थरिं अहं।
‘‘Ārāmadvārā nikkhamma, phalakaṃ santhariṃ ahaṃ;
उदकञ्च उपट्ठासिं, उत्तमत्थस्स पत्तिया॥
Udakañca upaṭṭhāsiṃ, uttamatthassa pattiyā.
२.
2.
‘‘एकत्तिंसे इतो कप्पे, यं कम्ममकरिं तदा।
‘‘Ekattiṃse ito kappe, yaṃ kammamakariṃ tadā;
दुग्गतिं नाभिजानामि, आसने चोदके फलं॥
Duggatiṃ nābhijānāmi, āsane codake phalaṃ.
३.
3.
‘‘इतो पन्नरसे कप्पे, अभिसामसमव्हयो।
‘‘Ito pannarase kappe, abhisāmasamavhayo;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
४.
4.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा उदकासनदायको थेरो इमा गाथायो अभासित्थाति।
Itthaṃ sudaṃ āyasmā udakāsanadāyako thero imā gāthāyo abhāsitthāti.
उदकासनदायकत्थेरस्सापदानं पठमं।
Udakāsanadāyakattherassāpadānaṃ paṭhamaṃ.
