| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৫. দ্ৰিন্নং লোকুপ্পন্নানং সমকভাৰপঞ্হো
5. Dvinnaṃ lokuppannānaṃ samakabhāvapañho
৫. রাজা আহ ‘‘ভন্তে নাগসেন, যো ইধ কালঙ্কতো ব্রহ্মলোকে উপ্পজ্জেয্য, যো চ ইধ কালঙ্কতো কস্মীরে উপ্পজ্জেয্য, কো চিরতরং কো সীঘতর’’ন্তি? ‘‘সমকং, মহারাজা’’তি।
5. Rājā āha ‘‘bhante nāgasena, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, ko cirataraṃ ko sīghatara’’nti? ‘‘Samakaṃ, mahārājā’’ti.
‘‘ওপম্মং করোহী’’তি। ‘‘কুহিং পন, মহারাজ, তৰ জাতনগর’’ন্তি? ‘‘অত্থি, ভন্তে, কলসিগামো নাম, তত্থাহং জাতো’’তি। ‘‘কীৰ দূরো, মহারাজ, ইতো কলসিগামো হোতী’’তি। ‘‘দ্ৰিমত্তানি, ভন্তে, যোজনসতানী’’তি। ‘‘কীৰ দূরং, মহারাজ, ইতো কস্মীরং হোতী’’তি? ‘‘দ্ৰাদস, ভন্তে, যোজনানী’’তি। ‘‘ইঙ্ঘ, ত্ৰং মহারাজ, কলসিগামং চিন্তেহী’’তি। ‘‘চিন্তিতো, ভন্তে’’তি। ‘‘ইঙ্ঘ, ত্ৰং মহারাজ, কস্মীরং চিন্তেহী’’তি। ‘‘চিন্তিতং ভন্তে’’তি। ‘‘কতমং নু খো, মহারাজ, চিরেন চিন্তিতং, কতমং সীঘতর’’ন্তি? ‘‘সমকং ভন্তে’’তি। ‘‘এৰমেৰ খো, মহারাজ, যো ইধ কালঙ্কতো ব্রহ্মলোকে উপ্পজ্জেয্য, যো চ ইধ কালঙ্কতো কস্মীরে উপ্পজ্জেয্য, সমকং যেৰ উপ্পজ্জন্তী’’তি।
‘‘Opammaṃ karohī’’ti. ‘‘Kuhiṃ pana, mahārāja, tava jātanagara’’nti? ‘‘Atthi, bhante, kalasigāmo nāma, tatthāhaṃ jāto’’ti. ‘‘Kīva dūro, mahārāja, ito kalasigāmo hotī’’ti. ‘‘Dvimattāni, bhante, yojanasatānī’’ti. ‘‘Kīva dūraṃ, mahārāja, ito kasmīraṃ hotī’’ti? ‘‘Dvādasa, bhante, yojanānī’’ti. ‘‘Iṅgha, tvaṃ mahārāja, kalasigāmaṃ cintehī’’ti. ‘‘Cintito, bhante’’ti. ‘‘Iṅgha, tvaṃ mahārāja, kasmīraṃ cintehī’’ti. ‘‘Cintitaṃ bhante’’ti. ‘‘Katamaṃ nu kho, mahārāja, cirena cintitaṃ, katamaṃ sīghatara’’nti? ‘‘Samakaṃ bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘ভিয্যো ওপম্মং করোহী’’তি। ‘‘তং কিং মঞ্ঞসি, মহারাজ, দ্ৰে সকুণা আকাসেন গচ্ছেয্যুং , তেসু একো উচ্চে রুক্খে নিসীদেয্য, একো নীচে রুক্খে নিসীদেয্য, তেসং সমকং পতিট্ঠিতানং কতমস্স ছাযা পঠমতরং পথৰিযং পতিট্ঠহেয্য, কতমস্স ছাযা চিরেন পথৰিযং পতিট্ঠহেয্যা’’তি? ‘‘সমকং, ভন্তে’’তি। ‘‘এৰমেৰ খো, মহারাজ, যো ইধ কালঙ্কতো ব্রহ্মলোকে উপ্পজ্জেয্য, যো চ ইধ কালঙ্কতো কস্মীরে উপ্পজ্জেয্য, সমকং যেৰ উপ্পজ্জন্তী’’তি।
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, dve sakuṇā ākāsena gaccheyyuṃ , tesu eko ucce rukkhe nisīdeyya, eko nīce rukkhe nisīdeyya, tesaṃ samakaṃ patiṭṭhitānaṃ katamassa chāyā paṭhamataraṃ pathaviyaṃ patiṭṭhaheyya, katamassa chāyā cirena pathaviyaṃ patiṭṭhaheyyā’’ti? ‘‘Samakaṃ, bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
দ্ৰিন্নং লোকুপ্পন্নানং সমকভাৰপঞ্হো পঞ্চমো।
Dvinnaṃ lokuppannānaṃ samakabhāvapañho pañcamo.
