| Library / Tipiṭaka / តិបិដក • Tipiṭaka / ឧទានបាឡិ • Udānapāḷi |
៧. ទ្វិធាបថសុត្តំ
7. Dvidhāpathasuttaṃ
៧៧. ឯវំ មេ សុតំ – ឯកំ សមយំ ភគវា កោសលេសុ អទ្ធានមគ្គបដិបន្នោ ហោតិ អាយស្មតា នាគសមាលេន បច្ឆាសមណេន។ អទ្ទសា ខោ អាយស្មា នាគសមាលោ អន្តរាមគ្គេ ទ្វិធាបថំ 1។ ទិស្វាន ភគវន្តំ ឯតទវោច – ‘‘អយំ, ភន្តេ, ភគវា បន្ថោ; ឥមិនា គច្ឆាមា’’តិ។ ឯវំ វុត្តេ, ភគវា អាយស្មន្តំ នាគសមាលំ ឯតទវោច – ‘‘អយំ, នាគសមាល, បន្ថោ; ឥមិនា គច្ឆាមា’’តិ។
77. Evaṃ me sutaṃ – ekaṃ samayaṃ bhagavā kosalesu addhānamaggapaṭipanno hoti āyasmatā nāgasamālena pacchāsamaṇena. Addasā kho āyasmā nāgasamālo antarāmagge dvidhāpathaṃ 2. Disvāna bhagavantaṃ etadavoca – ‘‘ayaṃ, bhante, bhagavā pantho; iminā gacchāmā’’ti. Evaṃ vutte, bhagavā āyasmantaṃ nāgasamālaṃ etadavoca – ‘‘ayaṃ, nāgasamāla, pantho; iminā gacchāmā’’ti.
ទុតិយម្បិ…បេ.… តតិយម្បិ ខោ អាយស្មា នាគសមាលោ ភគវន្តំ ឯតទវោច – ‘‘អយំ, ភន្តេ, ភគវា បន្ថោ; ឥមិនា គច្ឆាមា’’តិ ។ តតិយម្បិ ខោ ភគវា អាយស្មន្តំ នាគសមាលំ ឯតទវោច – ‘‘អយំ, នាគសមាល, បន្ថោ; ឥមិនា គច្ឆាមា’’តិ។ អថ ខោ អាយស្មា នាគសមាលោ ភគវតោ បត្តចីវរំ តត្ថេវ ឆមាយំ និក្ខិបិត្វា បក្កាមិ – ‘‘ឥទំ, ភន្តេ, ភគវតោ បត្តចីវរ’’ន្តិ។
Dutiyampi…pe… tatiyampi kho āyasmā nāgasamālo bhagavantaṃ etadavoca – ‘‘ayaṃ, bhante, bhagavā pantho; iminā gacchāmā’’ti . Tatiyampi kho bhagavā āyasmantaṃ nāgasamālaṃ etadavoca – ‘‘ayaṃ, nāgasamāla, pantho; iminā gacchāmā’’ti. Atha kho āyasmā nāgasamālo bhagavato pattacīvaraṃ tattheva chamāyaṃ nikkhipitvā pakkāmi – ‘‘idaṃ, bhante, bhagavato pattacīvara’’nti.
អថ ខោ អាយស្មតោ នាគសមាលស្ស តេន បន្ថេន គច្ឆន្តស្ស អន្តរាមគ្គេ ចោរា និក្ខមិត្វា ហត្ថេហិ ច បាទេហិ ច អាកោដេសុំ បត្តញ្ច ភិន្ទិំសុ សង្ឃាដិញ្ច វិប្ផាលេសុំ។ អថ ខោ អាយស្មា នាគសមាលោ ភិន្នេន បត្តេន វិប្ផាលិតាយ សង្ឃាដិយា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា នាគសមាលោ ភគវន្តំ ឯតទវោច – ‘‘ឥធ មយ្ហំ, ភន្តេ, តេន បន្ថេន គច្ឆន្តស្ស អន្តរាមគ្គេ ចោរា និក្ខមិត្វា ហត្ថេហិ ច បាទេហិ ច អាកោដេសុំ, បត្តញ្ច ភិន្ទិំសុ, សង្ឃាដិញ្ច វិប្ផាលេសុ’’ន្តិ។
Atha kho āyasmato nāgasamālassa tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ pattañca bhindiṃsu saṅghāṭiñca vipphālesuṃ. Atha kho āyasmā nāgasamālo bhinnena pattena vipphālitāya saṅghāṭiyā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā nāgasamālo bhagavantaṃ etadavoca – ‘‘idha mayhaṃ, bhante, tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ, pattañca bhindiṃsu, saṅghāṭiñca vipphālesu’’nti.
អថ ខោ ភគវា ឯតមត្ថំ វិទិត្វា តាយំ វេលាយំ ឥមំ ឧទានំ ឧទានេសិ –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘សទ្ធិំ ចរមេកតោ វសំ,
‘‘Saddhiṃ caramekato vasaṃ,
មិស្សោ អញ្ញជនេន វេទគូ;
Misso aññajanena vedagū;
វិទ្វា បជហាតិ បាបកំ,
Vidvā pajahāti pāpakaṃ,
កោញ្ចោ ខីរបកោវ និន្នគ’’ន្តិ។ សត្តមំ;
Koñco khīrapakova ninnaga’’nti. sattamaṃ;
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឧទាន-អដ្ឋកថា • Udāna-aṭṭhakathā / ៧. ទ្វិធាបថសុត្តវណ្ណនា • 7. Dvidhāpathasuttavaṇṇanā
