| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
2. து³தியஸுத்தந்தபாளிவண்ணனா
2. Dutiyasuttantapāḷivaṇṇanā
13. புன அஞ்ஞஸ்ஸ ஸுத்தந்தஸ்ஸ அத்த²வஸேன ஸச்சப்படிவேத⁴ங் நித்³தி³ஸிதுகாமோ புப்³பே³ மே, பி⁴க்க²வேதிஆதி³கங் ஸுத்தந்தங் ஆஹரித்வா த³ஸ்ஸேஸி. தத்த² புப்³பே³ மே, பி⁴க்க²வே, ஸம்போ³தா⁴தி பி⁴க்க²வே, மம ஸம்போ³தி⁴தோ ஸப்³ப³ஞ்ஞுதஞ்ஞாணதோ புப்³பே³. அனபி⁴ஸம்பு³த்³த⁴ஸ்ஸாதி ஸப்³ப³த⁴ம்மே அப்படிவித்³த⁴ஸ்ஸ. போ³தி⁴ஸத்தஸ்ஸேவ ஸதோதி போ³தி⁴ஸத்தபூ⁴தஸ்ஸேவ. ஏதத³ஹோஸீதி போ³தி⁴பல்லங்கே நிஸின்னஸ்ஸ ஏதங் பரிவிதக்கிதங் அஹோஸி. அஸ்ஸாதோ³தி அஸ்ஸாதீ³யதீதி அஸ்ஸாதோ³. ஆதீ³னவோதி தோ³ஸோ . நிஸ்ஸரணந்தி அபக³மனங். ஸுக²ந்தி ஸுக²யதீதி ஸுக²ங், யஸ்ஸுப்பஜ்ஜதி, தங் ஸுகி²தங் கரோதீதி அத்தோ². ஸோமனஸ்ஸந்தி பீதிஸோமனஸ்ஸயோக³தோ ஸோப⁴னங் மனோ அஸ்ஸாதி ஸுமனோ, ஸுமனஸ்ஸ பா⁴வோ ஸோமனஸ்ஸங் , ஸுக²மேவ பீதியோக³தோ விஸேஸிதங். அனிச்சந்தி அத்³து⁴வங். து³க்க²ந்தி து³க்க²வத்து²த்தா ஸங்கா²ரது³க்க²த்தா ச து³க்க²ங். விபரிணாமத⁴ம்மந்தி அவஸீ ஹுத்வா ஜராப⁴ங்க³வஸேன பரிவத்தனபகதிகங். ஏதேன அனத்தபா⁴வோ வுத்தோ ஹோதி. ச²ந்த³ராக³வினயோதி ச²ந்த³ஸங்கா²தஸ்ஸ ராக³ஸ்ஸ ஸங்வரணங், ந வண்ணராக³ஸ்ஸ. ச²ந்த³ராக³ப்பஹானந்தி தஸ்ஸேவ ச²ந்த³ராக³ஸ்ஸ பஜஹனங்.
13. Puna aññassa suttantassa atthavasena saccappaṭivedhaṃ niddisitukāmo pubbe me, bhikkhavetiādikaṃ suttantaṃ āharitvā dassesi. Tattha pubbe me, bhikkhave, sambodhāti bhikkhave, mama sambodhito sabbaññutaññāṇato pubbe. Anabhisambuddhassāti sabbadhamme appaṭividdhassa. Bodhisattasseva satoti bodhisattabhūtasseva. Etadahosīti bodhipallaṅke nisinnassa etaṃ parivitakkitaṃ ahosi. Assādoti assādīyatīti assādo. Ādīnavoti doso . Nissaraṇanti apagamanaṃ. Sukhanti sukhayatīti sukhaṃ, yassuppajjati, taṃ sukhitaṃ karotīti attho. Somanassanti pītisomanassayogato sobhanaṃ mano assāti sumano, sumanassa bhāvo somanassaṃ , sukhameva pītiyogato visesitaṃ. Aniccanti addhuvaṃ. Dukkhanti dukkhavatthuttā saṅkhāradukkhattā ca dukkhaṃ. Vipariṇāmadhammanti avasī hutvā jarābhaṅgavasena parivattanapakatikaṃ. Etena anattabhāvo vutto hoti. Chandarāgavinayoti chandasaṅkhātassa rāgassa saṃvaraṇaṃ, na vaṇṇarāgassa. Chandarāgappahānanti tasseva chandarāgassa pajahanaṃ.
யாவகீவஞ்சாதிஆதீ³ஸு யாவ இமேஸங் பஞ்சன்னங் உபாதா³னக்க²ந்தா⁴னங்…பே॰… யதா²பூ⁴தங் நாப்³ப⁴ஞ்ஞாஸிங் ந அதி⁴கேன ஞாணேன படிவிஜ்ஜி²ங், தாவ அனுத்தரங் ஸம்மாஸம்போ³தி⁴ங் அனுத்தரங் ஸப்³ப³ஞ்ஞுபா⁴வங் அபி⁴ஸம்பு³த்³தோ⁴ அபி⁴ஸமேதாவீ அரஹந்தி நேவாஹங் பச்சஞ்ஞாஸிங் நேவ படிஞ்ஞங் அகாஸிந்தி ஸம்ப³ந்த⁴தோ அத்தோ². கீவஞ்சாதி நிபாதமத்தங். யதோதி யஸ்மா, யதா³ வா. அதா²தி அனந்தரங். ஞாணஞ்ச பன மே த³ஸ்ஸனங் உத³பாதீ³தி த³ஸ்ஸனகிச்சகரணேன த³ஸ்ஸனஸங்கா²தங் பச்சவெக்க²ணஞாணஞ்ச மே உப்பஜ்ஜி. அகுப்பாதி கோபேதுங் சாலேதுங் அஸக்குணெய்யா. விமுத்தீதி அரஹத்தப²லவிமுத்தி. ஏதாய ஏவ ப²லபச்சவெக்க²ணாய மக்³க³னிப்³பா³னபச்சவெக்க²ணாபி வுத்தாவ ஹொந்தி. அயமந்திமா ஜாதீதி அயங் பச்சி²மா க²ந்த⁴ப்பவத்தி. நத்தி²தா³னி புனப்³ப⁴வோதி இதா³னி புன உப்பத்தி நத்தி². ஏதேன பஹீனகிலேஸபச்சவெக்க²ணா வுத்தா. அரஹதோ ஹி அவஸிட்ட²கிலேஸபச்சவெக்க²ணா ந ஹோதி.
Yāvakīvañcātiādīsu yāva imesaṃ pañcannaṃ upādānakkhandhānaṃ…pe… yathābhūtaṃ nābbhaññāsiṃ na adhikena ñāṇena paṭivijjhiṃ, tāva anuttaraṃ sammāsambodhiṃ anuttaraṃ sabbaññubhāvaṃ abhisambuddho abhisametāvī arahanti nevāhaṃ paccaññāsiṃ neva paṭiññaṃ akāsinti sambandhato attho. Kīvañcāti nipātamattaṃ. Yatoti yasmā, yadā vā. Athāti anantaraṃ. Ñāṇañca pana me dassanaṃ udapādīti dassanakiccakaraṇena dassanasaṅkhātaṃ paccavekkhaṇañāṇañca me uppajji. Akuppāti kopetuṃ cāletuṃ asakkuṇeyyā. Vimuttīti arahattaphalavimutti. Etāya eva phalapaccavekkhaṇāya magganibbānapaccavekkhaṇāpi vuttāva honti. Ayamantimā jātīti ayaṃ pacchimā khandhappavatti. Natthidāni punabbhavoti idāni puna uppatti natthi. Etena pahīnakilesapaccavekkhaṇā vuttā. Arahato hi avasiṭṭhakilesapaccavekkhaṇā na hoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 2. து³தியஸுத்தந்தபாளி • 2. Dutiyasuttantapāḷi
