| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
3. து³தியஸுத்தந்தனித்³தே³ஸவண்ணனா
3. Dutiyasuttantaniddesavaṇṇanā
14. ஸச்சப்படிவேத⁴ஞாணயோஜனக்கமே ச அயங் ரூபஸ்ஸ அஸ்ஸாதோ³தி பஹானப்படிவேதோ⁴தி புப்³ப³பா⁴கே³ ‘‘அயங் தண்ஹாஸம்பயுத்தோ ரூபஸ்ஸ அஸ்ஸாதோ³’’தி ஞத்வா மக்³க³க்க²ணே ஸமுத³யப்பஹானஸங்கா²தோ ஸமுத³யஸச்சப்படிவேதோ⁴. ஸமுத³யஸச்சந்தி ஸமுத³யஸச்சப்படிவேத⁴ஞாணங். அரியஸச்சாரம்மணஞாணம்பி ஹி ‘‘யே கேசி குஸலா த⁴ம்மா, ஸப்³பே³ தே சதூஸு அரியஸச்சேஸு ஸங்க³ஹங் க³ச்ச²ந்தீ’’திஆதீ³ஸு (ம॰ நி॰ 1.300) விய ‘‘ஸச்ச’’ந்தி வுச்சதி. அயங் ரூபஸ்ஸ ஆதீ³னவோதி பரிஞ்ஞாபடிவேதோ⁴தி புப்³ப³பா⁴கே³ ‘‘அயங் ரூபஸ்ஸ ஆதீ³னவோ’’தி ஞத்வா மக்³க³க்க²ணே து³க்க²பரிஞ்ஞாஸங்கா²தோ து³க்க²ஸச்சப்படிவேதோ⁴. து³க்க²ஸச்சந்தி து³க்க²ஸச்சப்படிவேத⁴ஞாணங். இத³ங் ரூபஸ்ஸ நிஸ்ஸரணந்தி ஸச்சி²கிரியாபடிவேதோ⁴தி புப்³ப³பா⁴கே³ ‘‘இத³ங் ரூபஸ்ஸ நிஸ்ஸரண’’ந்தி ஞத்வா மக்³க³க்க²ணே நிரோத⁴ஸச்சி²கிரியாஸங்கா²தோ நிரோத⁴ஸச்சப்படிவேதோ⁴. நிரோத⁴ஸச்சந்தி நிரோத⁴ஸச்சாரம்மணங் நிரோத⁴ஸச்சப்படிவேத⁴ஞாணங் . யா இமேஸு தீஸு டா²னேஸூதி இமேஸு யதா²வுத்தேஸு தீஸு ஸமுத³யது³க்க²னிரோதே⁴ஸு படிவேத⁴வஸேன பவத்தா யா தி³ட்டி² யோ ஸங்கப்போதி யோஜனா. பா⁴வனாபடிவேதோ⁴தி அயங் மக்³க³பா⁴வனாஸங்கா²தோ மக்³க³ஸச்சப்படிவேதோ⁴. மக்³க³ஸச்சந்தி மக்³க³ஸச்சப்படிவேத⁴ஞாணங்.
14. Saccappaṭivedhañāṇayojanakkame ca ayaṃ rūpassa assādoti pahānappaṭivedhoti pubbabhāge ‘‘ayaṃ taṇhāsampayutto rūpassa assādo’’ti ñatvā maggakkhaṇe samudayappahānasaṅkhāto samudayasaccappaṭivedho. Samudayasaccanti samudayasaccappaṭivedhañāṇaṃ. Ariyasaccārammaṇañāṇampi hi ‘‘ye keci kusalā dhammā, sabbe te catūsu ariyasaccesu saṅgahaṃ gacchantī’’tiādīsu (ma. ni. 1.300) viya ‘‘sacca’’nti vuccati. Ayaṃ rūpassa ādīnavoti pariññāpaṭivedhoti pubbabhāge ‘‘ayaṃ rūpassa ādīnavo’’ti ñatvā maggakkhaṇe dukkhapariññāsaṅkhāto dukkhasaccappaṭivedho. Dukkhasaccanti dukkhasaccappaṭivedhañāṇaṃ. Idaṃ rūpassa nissaraṇanti sacchikiriyāpaṭivedhoti pubbabhāge ‘‘idaṃ rūpassa nissaraṇa’’nti ñatvā maggakkhaṇe nirodhasacchikiriyāsaṅkhāto nirodhasaccappaṭivedho. Nirodhasaccanti nirodhasaccārammaṇaṃ nirodhasaccappaṭivedhañāṇaṃ . Yā imesu tīsu ṭhānesūti imesu yathāvuttesu tīsu samudayadukkhanirodhesu paṭivedhavasena pavattā yā diṭṭhi yo saṅkappoti yojanā. Bhāvanāpaṭivedhoti ayaṃ maggabhāvanāsaṅkhāto maggasaccappaṭivedho. Maggasaccanti maggasaccappaṭivedhañāṇaṃ.
15. புன அபரேன பரியாயேன ஸச்சானி ச ஸச்சப்படிவேத⁴ஞ்ச த³ஸ்ஸெந்தோ ஸச்சந்தி கதிஹாகாரேஹி ஸச்சந்திஆதி³மாஹ. தத்த² யஸ்மா ஸப்³பே³பி ஸப்³ப³ஞ்ஞுபோ³தி⁴ஸத்தா போ³தி⁴பல்லங்கே நிஸின்னா ஜராமரணாதி³கஸ்ஸ து³க்க²ஸச்சஸ்ஸ ஜாதிஆதி³கங் ஸமுத³யஸச்சங் ‘‘கிங் நு கோ²’’தி ஏஸந்தி, ததா² ஏஸந்தா ச ஜராமரணாதி³கஸ்ஸ து³க்க²ஸச்சஸ்ஸ ஜாதிஆதி³கங் ஸமுத³யஸச்சங் ‘‘பச்சயோ’’தி வவத்த²பெந்தோ பரிக்³க³ண்ஹந்தி, தஸ்மா ஸா ச ஏஸனா ஸோ ச பரிக்³க³ஹோ ஸச்சானங் ஏஸனத்தா பரிக்³க³ஹத்தா ச ‘‘ஸச்ச’’ந்தி கத்வா ஏஸனட்டே²ன பரிக்³க³ஹட்டே²னாதி வுத்தங். அயஞ்ச விதி⁴ பச்சேகபு³த்³தா⁴னம்பி பச்சயபரிக்³க³ஹே லப்³ப⁴தியேவ, ஸாவகானங் பன அனுஸ்ஸவவஸேன பச்சயபரிக்³க³ஹே லப்³ப⁴தி. படிவேத⁴ட்டே²னாதி புப்³ப³பா⁴கே³ ததா² ஏஸிதானங் பரிக்³க³ஹிதானஞ்ச மக்³க³க்க²ணே ஏகபடிவேத⁴ட்டே²ன.
15. Puna aparena pariyāyena saccāni ca saccappaṭivedhañca dassento saccanti katihākārehi saccantiādimāha. Tattha yasmā sabbepi sabbaññubodhisattā bodhipallaṅke nisinnā jarāmaraṇādikassa dukkhasaccassa jātiādikaṃ samudayasaccaṃ ‘‘kiṃ nu kho’’ti esanti, tathā esantā ca jarāmaraṇādikassa dukkhasaccassa jātiādikaṃ samudayasaccaṃ ‘‘paccayo’’ti vavatthapento pariggaṇhanti, tasmā sā ca esanā so ca pariggaho saccānaṃ esanattā pariggahattā ca ‘‘sacca’’nti katvā esanaṭṭhena pariggahaṭṭhenāti vuttaṃ. Ayañca vidhi paccekabuddhānampi paccayapariggahe labbhatiyeva, sāvakānaṃ pana anussavavasena paccayapariggahe labbhati. Paṭivedhaṭṭhenāti pubbabhāge tathā esitānaṃ pariggahitānañca maggakkhaṇe ekapaṭivedhaṭṭhena.
கிங்னிதா³னந்திஆதீ³ஸு நிதா³னாதீ³னி ஸப்³பா³னி காரணவேவசனானி. காரணஞ்ஹி யஸ்மா ப²லங் நிதே³தி ‘‘ஹந்த³ நங் க³ண்ஹதா²’’தி அப்பேதி விய, தஸ்மா ‘‘நிதா³ன’’ந்தி வுச்சதி. யஸ்மா ப²லங் ததோ ஸமுதே³தி, ஜாயதி, பப⁴வதி; தஸ்மா ஸமுத³யோ, ஜாதி, பப⁴வோதி வுச்சதி. அயங் பனெத்த² அத்தோ² – கிங் நிதா³னங் ஏதஸ்ஸாதி கிங்னிதா³னங். கோ ஸமுத³யோ ஏதஸ்ஸாதி கிங்ஸமுத³யங். கா ஜாதி ஏதஸ்ஸாதி கிங்ஜாதிகங். கோ பப⁴வோ ஏதஸ்ஸாதி கிங்பப⁴வங். யஸ்மா பன தஸ்ஸ ஜாதி யதா²வுத்தேன அத்தே²ன நிதா³னஞ்சேவ ஸமுத³யோ ச ஜாதி ச பப⁴வோ ச, தஸ்மா ஜாதினிதா³னந்திஆதி³மாஹ. ஜராமரணந்தி து³க்க²ஸச்சங். ஜராமரணஸமுத³யந்தி தஸ்ஸ பச்சயங் ஸமுத³யஸச்சங். ஜராமரணனிரோத⁴ந்தி நிரோத⁴ஸச்சங். ஜராமரணனிரோத⁴கா³மினிங் படிபத³ந்தி மக்³க³ஸச்சங். இமினாவ நயேன ஸப்³ப³பதே³ஸு அத்தோ² வேதி³தப்³போ³.
Kiṃnidānantiādīsu nidānādīni sabbāni kāraṇavevacanāni. Kāraṇañhi yasmā phalaṃ nideti ‘‘handa naṃ gaṇhathā’’ti appeti viya, tasmā ‘‘nidāna’’nti vuccati. Yasmā phalaṃ tato samudeti, jāyati, pabhavati; tasmā samudayo, jāti, pabhavoti vuccati. Ayaṃ panettha attho – kiṃ nidānaṃ etassāti kiṃnidānaṃ. Ko samudayo etassāti kiṃsamudayaṃ. Kā jāti etassāti kiṃjātikaṃ. Ko pabhavo etassāti kiṃpabhavaṃ. Yasmā pana tassa jāti yathāvuttena atthena nidānañceva samudayo ca jāti ca pabhavo ca, tasmā jātinidānantiādimāha. Jarāmaraṇanti dukkhasaccaṃ. Jarāmaraṇasamudayanti tassa paccayaṃ samudayasaccaṃ. Jarāmaraṇanirodhanti nirodhasaccaṃ. Jarāmaraṇanirodhagāminiṃ paṭipadanti maggasaccaṃ. Imināva nayena sabbapadesu attho veditabbo.
16. நிரோத⁴ப்பஜானநாதி ஆரம்மணகரணேன நிரோத⁴ஸ்ஸ பஜானநா. ஜாதி ஸியா து³க்க²ஸச்சங், ஸியா ஸமுத³யஸச்சந்தி ப⁴வபச்சயா பஞ்ஞாயனட்டே²ன து³க்க²ஸச்சங் , ஜராமரணஸ்ஸ பச்சயட்டே²ன ஸமுத³யஸச்சங். ஏஸ நயோ ஸேஸேஸுபி. அவிஜ்ஜா ஸியா து³க்க²ஸச்சந்தி பன ஆஸவஸமுத³யா அவிஜ்ஜாஸமுத³யட்டே²னாதி.
16.Nirodhappajānanāti ārammaṇakaraṇena nirodhassa pajānanā. Jāti siyā dukkhasaccaṃ, siyā samudayasaccanti bhavapaccayā paññāyanaṭṭhena dukkhasaccaṃ , jarāmaraṇassa paccayaṭṭhena samudayasaccaṃ. Esa nayo sesesupi. Avijjā siyā dukkhasaccanti pana āsavasamudayā avijjāsamudayaṭṭhenāti.
ஸச்சகதா²வண்ணனா நிட்டி²தா.
Saccakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 3. து³தியஸுத்தந்தனித்³தே³ஸோ • 3. Dutiyasuttantaniddeso
