| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
3. பொ³ஜ்ஜ²ங்க³கதா²
3. Bojjhaṅgakathā
பொ³ஜ்ஜ²ங்க³கதா²வண்ணனா
Bojjhaṅgakathāvaṇṇanā
17. இதா³னி ஸச்சப்படிவேத⁴ஸித்³த⁴ங் பொ³ஜ்ஜ²ங்க³விஸேஸங் த³ஸ்ஸெந்தேன கதி²தாய ஸுத்தந்தபுப்³ப³ங்க³மாய பொ³ஜ்ஜ²ங்க³கதா²ய அபுப்³ப³த்தா²னுவண்ணனா. தத்த² ஸுத்தந்தே தாவ பொ³ஜ்ஜ²ங்கா³தி போ³தி⁴யா, போ³தி⁴ஸ்ஸ வா அங்கா³தி பொ³ஜ்ஜ²ங்கா³. கிங் வுத்தங் ஹோதி (ஸங்॰ நி॰ அட்ட²॰ 3.5.182) – யா ஹி அயங் த⁴ம்மஸாமக்³கீ³, யாய லோகுத்தரமக்³க³க்க²ணே உப்பஜ்ஜமானாய லீனுத்³த⁴ச்சபதிட்டா²னாயூஹனகாமஸுக²த்தகிலமதா²னுயோக³உச்சே²த³ஸஸ்ஸதாபி⁴னிவேஸாதீ³னங் அனேகேஸங் உபத்³த³வானங் படிபக்க²பூ⁴தாய ஸதித⁴ம்மவிசயவீரியபீதிபஸ்ஸத்³தி⁴ஸமாதி⁴உபெக்கா²ஸங்கா²தாய த⁴ம்மஸாமக்³கி³யா அரியஸாவகோ பு³ஜ்ஜ²தீதி கத்வா போ³தீ⁴தி வுச்சதி, பு³ஜ்ஜ²தீதி கிலேஸஸந்தானநித்³தா³ய வுட்ட²ஹதி, சத்தாரி வா அரியஸச்சானி படிவிஜ்ஜ²தி, நிப்³பா³னமேவ வா ஸச்சி²கரோதீதி வுத்தங் ஹோதி. யதா²ஹ – ‘‘ஸத்த பொ³ஜ்ஜ²ங்கே³ பா⁴வெத்வா அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’’தி (ஸங்॰ நி॰ 5.378; தீ³॰ நி॰ 3.143). தஸ்ஸா த⁴ம்மஸாமக்³கீ³ஸங்கா²தாய போ³தி⁴யா அங்கா³தி பொ³ஜ்ஜ²ங்கா³ ஜா²னங்க³மக்³க³ங்கா³த³யோ விய. யோபேஸ யதா²வுத்தப்பகாராய ஏதாய த⁴ம்மஸாமக்³கி³யா பு³ஜ்ஜ²தீதி கத்வா அரியஸாவகோ போ³தீ⁴தி வுச்சதி, தஸ்ஸ போ³தி⁴ஸ்ஸ அங்கா³திபி பொ³ஜ்ஜ²ங்கா³ ஸேனங்க³ரத²ங்கா³த³யோ விய. தேனாஹு அட்ட²கதா²சரியா ‘‘பு³ஜ்ஜ²னகஸ்ஸ புக்³க³லஸ்ஸ அங்கா³தி பொ³ஜ்ஜ²ங்கா³’’தி. ஸதிஸம்பொ³ஜ்ஜ²ங்கா³தீ³னங் அத்தோ² அபி⁴ஞ்ஞெய்யனித்³தே³ஸே வுத்தோ.
17. Idāni saccappaṭivedhasiddhaṃ bojjhaṅgavisesaṃ dassentena kathitāya suttantapubbaṅgamāya bojjhaṅgakathāya apubbatthānuvaṇṇanā. Tattha suttante tāva bojjhaṅgāti bodhiyā, bodhissa vā aṅgāti bojjhaṅgā. Kiṃ vuttaṃ hoti (saṃ. ni. aṭṭha. 3.5.182) – yā hi ayaṃ dhammasāmaggī, yāya lokuttaramaggakkhaṇe uppajjamānāya līnuddhaccapatiṭṭhānāyūhanakāmasukhattakilamathānuyogaucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhatīti katvā bodhīti vuccati, bujjhatīti kilesasantānaniddāya vuṭṭhahati, cattāri vā ariyasaccāni paṭivijjhati, nibbānameva vā sacchikarotīti vuttaṃ hoti. Yathāha – ‘‘satta bojjhaṅge bhāvetvā anuttaraṃ sammāsambodhiṃ abhisambuddho’’ti (saṃ. ni. 5.378; dī. ni. 3.143). Tassā dhammasāmaggīsaṅkhātāya bodhiyā aṅgāti bojjhaṅgā jhānaṅgamaggaṅgādayo viya. Yopesa yathāvuttappakārāya etāya dhammasāmaggiyā bujjhatīti katvā ariyasāvako bodhīti vuccati, tassa bodhissa aṅgātipi bojjhaṅgā senaṅgarathaṅgādayo viya. Tenāhu aṭṭhakathācariyā ‘‘bujjhanakassa puggalassa aṅgāti bojjhaṅgā’’ti. Satisambojjhaṅgādīnaṃ attho abhiññeyyaniddese vutto.
பொ³ஜ்ஜ²ங்க³த்த²னித்³தே³ஸே போ³தா⁴ய ஸங்வத்தந்தீதி பு³ஜ்ஜ²னத்தா²ய ஸங்வத்தந்தி. கஸ்ஸ பு³ஜ்ஜ²னத்தா²ய? மக்³க³ப²லேஹி நிப்³பா³னஸ்ஸ பச்சவெக்க²ணாய கதகிச்சஸ்ஸ பு³ஜ்ஜ²னத்தா²ய, மக்³கே³ன வா கிலேஸனித்³தா³தோ பபு³ஜ்ஜ²னத்தா²ய ப²லேன பபு³த்³த⁴பா⁴வத்தா²யாபீதி வுத்தங் ஹோதி. ப³லவவிபஸ்ஸனாயபி பொ³ஜ்ஜ²ங்கா³ போ³தா⁴ய ஸங்வத்தந்தி . தஸ்மா அயங் விபஸ்ஸனாமக்³க³ப²லபொ³ஜ்ஜ²ங்கா³னங் ஸாதா⁴ரணத்தோ². தீஸுபி ஹி டா²னேஸு போ³தா⁴ய நிப்³பா³னபடிவேதா⁴ய ஸங்வத்தந்தி. ஏதேன போ³தி⁴யா அங்கா³தி பொ³ஜ்ஜ²ங்கா³தி வுத்தங் ஹோதி. பு³ஜ்ஜ²ந்தீதி பொ³ஜ்ஜ²ங்கா³திஆதீ³ஹி பஞ்சஹி சதுக்கேஹி வுத்தானங் பொ³ஜ்ஜ²ங்கா³னங் உப்பத்திட்டா²னங் அபி⁴ஞ்ஞெய்யனித்³தே³ஸே வுத்தங். அபி ச பு³ஜ்ஜ²ந்தீதி பொ³ஜ்ஜ²ங்கா³னங் ஸகிச்சகரணே ஸமத்த²பா⁴வத³ஸ்ஸனத்த²ங் கத்துனித்³தே³ஸோ . பு³ஜ்ஜ²னட்டே²னாதி ஸகிச்சகரணஸமத்த²த்தேபி ஸதி கத்துனோ அபா⁴வத³ஸ்ஸனத்த²ங் பா⁴வனித்³தே³ஸோ. போ³தெ⁴ந்தீதி பொ³ஜ்ஜ²ங்க³பா⁴வனாய பு³ஜ்ஜ²ந்தானங் யோகீ³னங் பயோஜகத்தா பொ³ஜ்ஜ²ங்கா³னங் ஹேதுகத்துனித்³தே³ஸோ. போ³த⁴னட்டே²னாதி பட²மங் வுத்தனயேனேவ பயோஜகஹேதுகத்துனா பா⁴வனித்³தே³ஸோ. ஏதேஹி போ³தி⁴யா அங்கா³ பொ³ஜ்ஜ²ங்கா³தி வுத்தங் ஹோதி. போ³தி⁴பக்கி²யட்டே²னாதி பு³ஜ்ஜ²னட்டே²ன போ³தீ⁴தி லத்³த⁴னாமஸ்ஸ யோகி³ஸ்ஸ பக்கே² ப⁴வத்தா. அயமேதேஸங் யோகி³னோ உபகாரகத்தனித்³தே³ஸோ. ஏதேஹி போ³தி⁴ஸ்ஸ அங்கா³தி பொ³ஜ்ஜ²ங்கா³தி வுத்தங் ஹோதி. பு³த்³தி⁴லப⁴னட்டே²னாதிஆதி³கே ச²க்கே பு³த்³தி⁴லப⁴னட்டே²னாதி யோகா³வசரேன பு³த்³தி⁴யா பாபுணனட்டே²ன. ரோபனட்டே²னாதி ஸத்தானங் பதிட்டா²பனட்டே²ன . பாபனட்டே²னாதி பதிட்டா²பிதாய நிட்டா²பனட்டே²ன. இமே விபஸ்ஸனாபொ³ஜ்ஜ²ங்கா³ பதி-அபி⁴-ஸங்-இதி தீஹி உபஸக்³கே³ஹி விஸேஸிதா மக்³க³ப²லபொ³ஜ்ஜ²ங்கா³தி வத³ந்தி. ஸப்³பே³ஸம்பி த⁴ம்மவோஹாரேன நித்³தி³ட்டா²னங் பொ³ஜ்ஜ²ங்கா³னங் போ³தி⁴யா அங்கா³தி பொ³ஜ்ஜ²ங்கா³தி வுத்தங் ஹோதீதி வேதி³தப்³ப³ங்.
Bojjhaṅgatthaniddese bodhāya saṃvattantīti bujjhanatthāya saṃvattanti. Kassa bujjhanatthāya? Maggaphalehi nibbānassa paccavekkhaṇāya katakiccassa bujjhanatthāya, maggena vā kilesaniddāto pabujjhanatthāya phalena pabuddhabhāvatthāyāpīti vuttaṃ hoti. Balavavipassanāyapi bojjhaṅgā bodhāya saṃvattanti . Tasmā ayaṃ vipassanāmaggaphalabojjhaṅgānaṃ sādhāraṇattho. Tīsupi hi ṭhānesu bodhāya nibbānapaṭivedhāya saṃvattanti. Etena bodhiyā aṅgāti bojjhaṅgāti vuttaṃ hoti. Bujjhantīti bojjhaṅgātiādīhi pañcahi catukkehi vuttānaṃ bojjhaṅgānaṃ uppattiṭṭhānaṃ abhiññeyyaniddese vuttaṃ. Api ca bujjhantīti bojjhaṅgānaṃ sakiccakaraṇe samatthabhāvadassanatthaṃ kattuniddeso . Bujjhanaṭṭhenāti sakiccakaraṇasamatthattepi sati kattuno abhāvadassanatthaṃ bhāvaniddeso. Bodhentīti bojjhaṅgabhāvanāya bujjhantānaṃ yogīnaṃ payojakattā bojjhaṅgānaṃ hetukattuniddeso. Bodhanaṭṭhenāti paṭhamaṃ vuttanayeneva payojakahetukattunā bhāvaniddeso. Etehi bodhiyā aṅgā bojjhaṅgāti vuttaṃ hoti. Bodhipakkhiyaṭṭhenāti bujjhanaṭṭhena bodhīti laddhanāmassa yogissa pakkhe bhavattā. Ayametesaṃ yogino upakārakattaniddeso. Etehi bodhissa aṅgāti bojjhaṅgāti vuttaṃ hoti. Buddhilabhanaṭṭhenātiādike chakke buddhilabhanaṭṭhenāti yogāvacarena buddhiyā pāpuṇanaṭṭhena. Ropanaṭṭhenāti sattānaṃ patiṭṭhāpanaṭṭhena . Pāpanaṭṭhenāti patiṭṭhāpitāya niṭṭhāpanaṭṭhena. Ime vipassanābojjhaṅgā pati-abhi-saṃ-iti tīhi upasaggehi visesitā maggaphalabojjhaṅgāti vadanti. Sabbesampi dhammavohārena niddiṭṭhānaṃ bojjhaṅgānaṃ bodhiyā aṅgāti bojjhaṅgāti vuttaṃ hotīti veditabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 3. பொ³ஜ்ஜ²ங்க³கதா² • 3. Bojjhaṅgakathā
