| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
2. து³தியஸுத்தந்தனித்³தே³ஸோ
2. Dutiyasuttantaniddeso
187. ஸாவத்தி²னிதா³னங். ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங் , பஞ்ஞிந்த்³ரியங். யே ஹி கேசி, பி⁴க்க²வே, ஸமணா வா ப்³ராஹ்மணா வா இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நப்பஜானந்தி, ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு 1 வா ஸமணஸம்மதா, ப்³ராஹ்மணேஸு வா ப்³ராஹ்மணஸம்மதா; ந ச பனேதே ஆயஸ்மந்தா 2 ஸாமஞ்ஞத்த²ங் வா ப்³ரஹ்மஞ்ஞத்த²ங் வா தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி. யே ச கோ² கேசி 3 பி⁴க்க²வே ஸமணா வா ப்³ராஹ்மணா வா இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானந்தி, தே கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா, ப்³ராஹ்மணேஸு வா ப்³ராஹ்மணஸம்மதா; தே ச பனாயஸ்மந்தா ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி.
187. Sāvatthinidānaṃ. ‘‘Pañcimāni, bhikkhave, indriyāni. Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ , paññindriyaṃ. Ye hi keci, bhikkhave, samaṇā vā brāhmaṇā vā imesaṃ pañcannaṃ indriyānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānanti, na me te, bhikkhave, samaṇā vā brāhmaṇā vā samaṇesu 4 vā samaṇasammatā, brāhmaṇesu vā brāhmaṇasammatā; na ca panete āyasmantā 5 sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti. Ye ca kho keci 6 bhikkhave samaṇā vā brāhmaṇā vā imesaṃ pañcannaṃ indriyānaṃ samudayañca atthaṅgamañca assādañca ādīnavañca nissaraṇañca yathābhūtaṃ pajānanti, te kho me, bhikkhave, samaṇā vā brāhmaṇā vā samaṇesu vā samaṇasammatā, brāhmaṇesu vā brāhmaṇasammatā; te ca panāyasmantā sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti.
188. கதிஹாகாரேஹி பஞ்சன்னங் இந்த்³ரியானங் ஸமுத³யோ ஹோதி; கதிஹாகாரேஹி பஞ்சன்னங் இந்த்³ரியானங் ஸமுத³யங் பஜானாதி? கதிஹாகாரேஹி பஞ்சன்னங் இந்த்³ரியானங் அத்த²ங்க³மோ ஹோதி; கதிஹாகாரேஹி பஞ்சன்னங் இந்த்³ரியானங் அத்த²ங்க³மங் பஜானாதி? கதிஹாகாரேஹி பஞ்சன்னங் இந்த்³ரியானங் அஸ்ஸாதோ³ ஹோதி, கதிஹாகாரேஹி பஞ்சன்னங் இந்த்³ரியானங் அஸ்ஸாத³ங் பஜானாதி? கதிஹாகாரேஹி பஞ்சன்னங் இந்த்³ரியானங் ஆதீ³னவோ ஹோதி; கதிஹாகாரேஹி பஞ்சன்னங் இந்த்³ரியானங் ஆதீ³னவங் பஜானாதி? கதிஹாகாரேஹி பஞ்சன்னங் இந்த்³ரியானங் நிஸ்ஸரணங் ஹோதி; கதிஹாகாரேஹி பஞ்சன்னங் இந்த்³ரியானங் நிஸ்ஸரணங் பஜானாதி?
188. Katihākārehi pañcannaṃ indriyānaṃ samudayo hoti; katihākārehi pañcannaṃ indriyānaṃ samudayaṃ pajānāti? Katihākārehi pañcannaṃ indriyānaṃ atthaṅgamo hoti; katihākārehi pañcannaṃ indriyānaṃ atthaṅgamaṃ pajānāti? Katihākārehi pañcannaṃ indriyānaṃ assādo hoti, katihākārehi pañcannaṃ indriyānaṃ assādaṃ pajānāti? Katihākārehi pañcannaṃ indriyānaṃ ādīnavo hoti; katihākārehi pañcannaṃ indriyānaṃ ādīnavaṃ pajānāti? Katihākārehi pañcannaṃ indriyānaṃ nissaraṇaṃ hoti; katihākārehi pañcannaṃ indriyānaṃ nissaraṇaṃ pajānāti?
சத்தாரீஸாய ஆகாரேஹி பஞ்சன்னங் இந்த்³ரியானங் ஸமுத³யோ ஹோதி; சத்தாரீஸாய ஆகாரேஹி பஞ்சன்னங் இந்த்³ரியானங் ஸமுத³யங் பஜானாதி. சத்தாரீஸாய ஆகாரேஹி பஞ்சன்னங் இந்த்³ரியானங் அத்த²ங்க³மோ ஹோதி; சத்தாரீஸாய ஆகாரேஹி பஞ்சன்னங் இந்த்³ரியானங் அத்த²ங்க³மங் பஜானாதி. பஞ்சவீஸதியா ஆகாரேஹி பஞ்சன்னங் இந்த்³ரியானங் அஸ்ஸாதோ³ ஹோதி; பஞ்சவீஸதியா ஆகாரேஹி பஞ்சன்னங் இந்த்³ரியானங் அஸ்ஸாத³ங் பஜானாதி. பஞ்சவீஸதியா ஆகாரேஹி பஞ்சன்னங் இந்த்³ரியானங் ஆதீ³னவோ ஹோதி; பஞ்சவீஸதியா ஆகாரேஹி பஞ்சன்னங் இந்த்³ரியானங் ஆதீ³னவங் பஜானாதி. அஸீதிஸதங் ஆகாரேஹி 7 பஞ்சன்னங் இந்த்³ரியானங் நிஸ்ஸரணங் ஹோதி; அஸீதிஸதங் ஆகாரேஹி பஞ்சன்னங் இந்த்³ரியானங் நிஸ்ஸரணங் பஜானாதி.
Cattārīsāya ākārehi pañcannaṃ indriyānaṃ samudayo hoti; cattārīsāya ākārehi pañcannaṃ indriyānaṃ samudayaṃ pajānāti. Cattārīsāya ākārehi pañcannaṃ indriyānaṃ atthaṅgamo hoti; cattārīsāya ākārehi pañcannaṃ indriyānaṃ atthaṅgamaṃ pajānāti. Pañcavīsatiyā ākārehi pañcannaṃ indriyānaṃ assādo hoti; pañcavīsatiyā ākārehi pañcannaṃ indriyānaṃ assādaṃ pajānāti. Pañcavīsatiyā ākārehi pañcannaṃ indriyānaṃ ādīnavo hoti; pañcavīsatiyā ākārehi pañcannaṃ indriyānaṃ ādīnavaṃ pajānāti. Asītisataṃ ākārehi 8 pañcannaṃ indriyānaṃ nissaraṇaṃ hoti; asītisataṃ ākārehi pañcannaṃ indriyānaṃ nissaraṇaṃ pajānāti.
கதமேஹி சத்தாரீஸாய ஆகாரேஹி பஞ்சன்னங் இந்த்³ரியானங் ஸமுத³யோ ஹோதி; கதமேஹி சத்தாரீஸாய ஆகாரேஹி பஞ்சன்னங் இந்த்³ரியானங் ஸமுத³யங் பஜானாதி? அதி⁴மொக்க²த்தா²ய ஆவஜ்ஜனாய ஸமுத³யோ ஸத்³தி⁴ந்த்³ரியஸ்ஸ ஸமுத³யோ ஹோதி, அதி⁴மொக்க²வஸேன ச²ந்த³ஸ்ஸ ஸமுத³யோ ஸத்³தி⁴ந்த்³ரியஸ்ஸ ஸமுத³யோ ஹோதி, அதி⁴மொக்க²வஸேன மனஸிகாரஸ்ஸ ஸமுத³யோ ஸத்³தி⁴ந்த்³ரியஸ்ஸ ஸமுத³யோ ஹோதி, ஸத்³தி⁴ந்த்³ரியஸ்ஸ வஸேன ஏகத்துபட்டா²னங் ஸத்³தி⁴ந்த்³ரியஸ்ஸ ஸமுத³யோ ஹோதி; பக்³க³ஹத்தா²ய ஆவஜ்ஜனாய ஸமுத³யோ வீரியிந்த்³ரியஸ்ஸ ஸமுத³யோ ஹோதி, பக்³க³ஹவஸேன ச²ந்த³ஸ்ஸ ஸமுத³யோ வீரியிந்த்³ரியஸ்ஸ ஸமுத³யோ ஹோதி, பக்³க³ஹவஸேன மனஸிகாரஸ்ஸ ஸமுத³யோ வீரியிந்த்³ரியஸ்ஸ ஸமுத³யோ ஹோதி, வீரியிந்த்³ரியஸ்ஸ வஸேன ஏகத்துபட்டா²னங் வீரியிந்த்³ரியஸ்ஸ ஸமுத³யோ ஹோதி; உபட்டா²னத்தா²ய ஆவஜ்ஜனாய ஸமுத³யோ ஸதிந்த்³ரியஸ்ஸ ஸமுத³யோ ஹோதி, உபட்டா²னவஸேன ச²ந்த³ஸ்ஸ ஸமுத³யோ ஸதிந்த்³ரியஸ்ஸ ஸமுத³யோ ஹோதி, உபட்டா²னவஸேன மனஸிகாரஸ்ஸ ஸமுத³யோ ஸதிந்த்³ரியஸ்ஸ ஸமுத³யோ ஹோதி, ஸதிந்த்³ரியஸ்ஸ வஸேன ஏகத்துபட்டா²னங் ஸதிந்த்³ரியஸ்ஸ ஸமுத³யோ ஹோதி; அவிக்கே²பத்தா²ய ஆவஜ்ஜனாய ஸமுத³யோ ஸமாதி⁴ந்த்³ரியஸ்ஸ ஸமுத³யோ ஹோதி, அவிக்கே²பவஸேன ச²ந்த³ஸ்ஸ ஸமுத³யோ ஸமாதி⁴ந்த்³ரியஸ்ஸ ஸமுத³யோ ஹோதி, அவிக்கே²பவஸேன மனஸிகாரஸ்ஸ ஸமுத³யோ ஸமாதி⁴ந்த்³ரியஸ்ஸ ஸமுத³யோ ஹோதி, ஸமாதி⁴ந்த்³ரியஸ்ஸ வஸேன ஏகத்துபட்டா²னங் ஸமாதி⁴ந்த்³ரியஸ்ஸ ஸமுத³யோ ஹோதி; த³ஸ்ஸனத்தா²ய ஆவஜ்ஜனாய ஸமுத³யோ பஞ்ஞிந்த்³ரியஸ்ஸ ஸமுத³யோ ஹோதி, த³ஸ்ஸனவஸேன ச²ந்த³ஸ்ஸ ஸமுத³யோ பஞ்ஞிந்த்³ரியஸ்ஸ ஸமுத³யோ ஹோதி, த³ஸ்ஸனவஸேன மனஸிகாரஸ்ஸ ஸமுத³யோ பஞ்ஞிந்த்³ரியஸ்ஸ ஸமுத³யோ ஹோதி, பஞ்ஞிந்த்³ரியஸ்ஸ வஸேன ஏகத்துபட்டா²னங் பஞ்ஞிந்த்³ரியஸ்ஸ ஸமுத³யோ ஹோதி. அதி⁴மொக்க²த்தா²ய ஆவஜ்ஜனாய ஸமுத³யோ ஸத்³தி⁴ந்த்³ரியஸ்ஸ ஸமுத³யோ ஹோதி, பக்³க³ஹத்தா²ய ஆவஜ்ஜனாய ஸமுத³யோ வீரியிந்த்³ரியஸ்ஸ ஸமுத³யோ ஹோதி, உபட்டா²னத்தா²ய ஆவஜ்ஜனாய ஸமுத³யோ ஸதிந்த்³ரியஸ்ஸ ஸமுத³யோ ஹோதி, அவிக்கே²பத்தா²ய ஆவஜ்ஜனாய ஸமுத³யோ ஸமாதி⁴ந்த்³ரியஸ்ஸ ஸமுத³யோ ஹோதி, த³ஸ்ஸனத்தா²ய ஆவஜ்ஜனாய ஸமுத³யோ பஞ்ஞிந்த்³ரியஸ்ஸ ஸமுத³யோ ஹோதி. அதி⁴மொக்க²வஸேன ச²ந்த³ஸ்ஸ ஸமுத³யோ ஸத்³தி⁴ந்த்³ரியஸ்ஸ ஸமுத³யோ ஹோதி, பக்³க³ஹவஸேன ச²ந்த³ஸ்ஸ ஸமுத³யோ வீரியிந்த்³ரியஸ்ஸ ஸமுத³யோ ஹோதி, உபட்டா²னவஸேன ச²ந்த³ஸ்ஸ ஸமுத³யோ ஸதிந்த்³ரியஸ்ஸ ஸமுத³யோ ஹோதி, அவிக்கே²பவஸேன ச²ந்த³ஸ்ஸ ஸமுத³யோ ஸமாதி⁴ந்த்³ரியஸ்ஸ ஸமுத³யோ ஹோதி, த³ஸ்ஸனவஸேன ச²ந்த³ஸ்ஸ ஸமுத³யோ பஞ்ஞிந்த்³ரியஸ்ஸ ஸமுத³யோ ஹோதி. அதி⁴மொக்க²வஸேன மனஸிகாரஸ்ஸ ஸமுத³யோ ஸத்³தி⁴ந்த்³ரியஸ்ஸ ஸமுத³யோ ஹோதி, பக்³க³ஹவஸேன மனஸிகாரஸ்ஸ ஸமுத³யோ வீரியிந்த்³ரியஸ்ஸ ஸமுத³யோ ஹோதி, உபட்டா²னவஸேன மனஸிகாரஸ்ஸ ஸமுத³யோ ஸதிந்த்³ரியஸ்ஸ ஸமுத³யோ ஹோதி, அவிக்கே²பவஸேன மனஸிகாரஸ்ஸ ஸமுத³யோ ஸமாதி⁴ந்த்³ரியஸ்ஸ ஸமுத³யோ ஹோதி, த³ஸ்ஸனவஸேன மனஸிகாரஸ்ஸ ஸமுத³யோ பஞ்ஞிந்த்³ரியஸ்ஸ ஸமுத³யோ ஹோதி. ஸத்³தி⁴ந்த்³ரியஸ்ஸ வஸேன ஏகத்துபட்டா²னங் ஸத்³தி⁴ந்த்³ரியஸ்ஸ ஸமுத³யோ ஹோதி வீரியிந்த்³ரியஸ்ஸ வஸேன ஏகத்துபட்டா²னங் வீரியிந்த்³ரியஸ்ஸ ஸமுத³யோ ஹோதி, ஸதிந்த்³ரியஸ்ஸ வஸேன ஏகத்துபட்டா²னங் ஸதிந்த்³ரியஸ்ஸ ஸமுத³யோ ஹோதி, ஸமாதி⁴ந்த்³ரியஸ்ஸ வஸேன ஏகத்துபட்டா²னங் ஸமாதி⁴ந்த்³ரியஸ்ஸ ஸமுத³யோ ஹோதி , பஞ்ஞிந்த்³ரியஸ்ஸ வஸேன ஏகத்துபட்டா²னங் பஞ்ஞிந்த்³ரியஸ்ஸ ஸமுத³யோ ஹோதி.
Katamehi cattārīsāya ākārehi pañcannaṃ indriyānaṃ samudayo hoti; katamehi cattārīsāya ākārehi pañcannaṃ indriyānaṃ samudayaṃ pajānāti? Adhimokkhatthāya āvajjanāya samudayo saddhindriyassa samudayo hoti, adhimokkhavasena chandassa samudayo saddhindriyassa samudayo hoti, adhimokkhavasena manasikārassa samudayo saddhindriyassa samudayo hoti, saddhindriyassa vasena ekattupaṭṭhānaṃ saddhindriyassa samudayo hoti; paggahatthāya āvajjanāya samudayo vīriyindriyassa samudayo hoti, paggahavasena chandassa samudayo vīriyindriyassa samudayo hoti, paggahavasena manasikārassa samudayo vīriyindriyassa samudayo hoti, vīriyindriyassa vasena ekattupaṭṭhānaṃ vīriyindriyassa samudayo hoti; upaṭṭhānatthāya āvajjanāya samudayo satindriyassa samudayo hoti, upaṭṭhānavasena chandassa samudayo satindriyassa samudayo hoti, upaṭṭhānavasena manasikārassa samudayo satindriyassa samudayo hoti, satindriyassa vasena ekattupaṭṭhānaṃ satindriyassa samudayo hoti; avikkhepatthāya āvajjanāya samudayo samādhindriyassa samudayo hoti, avikkhepavasena chandassa samudayo samādhindriyassa samudayo hoti, avikkhepavasena manasikārassa samudayo samādhindriyassa samudayo hoti, samādhindriyassa vasena ekattupaṭṭhānaṃ samādhindriyassa samudayo hoti; dassanatthāya āvajjanāya samudayo paññindriyassa samudayo hoti, dassanavasena chandassa samudayo paññindriyassa samudayo hoti, dassanavasena manasikārassa samudayo paññindriyassa samudayo hoti, paññindriyassa vasena ekattupaṭṭhānaṃ paññindriyassa samudayo hoti. Adhimokkhatthāya āvajjanāya samudayo saddhindriyassa samudayo hoti, paggahatthāya āvajjanāya samudayo vīriyindriyassa samudayo hoti, upaṭṭhānatthāya āvajjanāya samudayo satindriyassa samudayo hoti, avikkhepatthāya āvajjanāya samudayo samādhindriyassa samudayo hoti, dassanatthāya āvajjanāya samudayo paññindriyassa samudayo hoti. Adhimokkhavasena chandassa samudayo saddhindriyassa samudayo hoti, paggahavasena chandassa samudayo vīriyindriyassa samudayo hoti, upaṭṭhānavasena chandassa samudayo satindriyassa samudayo hoti, avikkhepavasena chandassa samudayo samādhindriyassa samudayo hoti, dassanavasena chandassa samudayo paññindriyassa samudayo hoti. Adhimokkhavasena manasikārassa samudayo saddhindriyassa samudayo hoti, paggahavasena manasikārassa samudayo vīriyindriyassa samudayo hoti, upaṭṭhānavasena manasikārassa samudayo satindriyassa samudayo hoti, avikkhepavasena manasikārassa samudayo samādhindriyassa samudayo hoti, dassanavasena manasikārassa samudayo paññindriyassa samudayo hoti. Saddhindriyassa vasena ekattupaṭṭhānaṃ saddhindriyassa samudayo hoti vīriyindriyassa vasena ekattupaṭṭhānaṃ vīriyindriyassa samudayo hoti, satindriyassa vasena ekattupaṭṭhānaṃ satindriyassa samudayo hoti, samādhindriyassa vasena ekattupaṭṭhānaṃ samādhindriyassa samudayo hoti , paññindriyassa vasena ekattupaṭṭhānaṃ paññindriyassa samudayo hoti.
இமேஹி சத்தாரீஸாய ஆகாரேஹி பஞ்சன்னங் இந்த்³ரியானங் ஸமுத³யோ ஹோதி, இமேஹி சத்தாரீஸாய ஆகாரேஹி பஞ்சன்னங் இந்த்³ரியானங் ஸமுத³யங் பஜானாதி.
Imehi cattārīsāya ākārehi pañcannaṃ indriyānaṃ samudayo hoti, imehi cattārīsāya ākārehi pañcannaṃ indriyānaṃ samudayaṃ pajānāti.
கதமேஹி சத்தாரீஸாய ஆகாரேஹி பஞ்சன்னங் இந்த்³ரியானங் அத்த²ங்க³மோ ஹோதி; கதமேஹி சத்தாரீஸாய ஆகாரேஹி பஞ்சன்னங் இந்த்³ரியானங் அத்த²ங்க³மங் பஜானாதி? அதி⁴மொக்க²த்தா²ய ஆவஜ்ஜனாய அத்த²ங்க³மோ ஸத்³தி⁴ந்த்³ரியஸ்ஸ அத்த²ங்க³மோ ஹோதி, அதி⁴மொக்க²வஸேன ச²ந்த³ஸ்ஸ அத்த²ங்க³மோ ஸத்³தி⁴ந்த்³ரியஸ்ஸ அத்த²ங்க³மோ ஹோதி, அதி⁴மொக்க²வஸேன மனஸிகாரஸ்ஸ அத்த²ங்க³மோ ஸத்³தி⁴ந்த்³ரியஸ்ஸ அத்த²ங்க³மோ ஹோதி, ஸத்³தி⁴ந்த்³ரியஸ்ஸ வஸேன ஏகத்தஅனுபட்டா²னங் 9 ஸத்³தி⁴ந்த்³ரியஸ்ஸ வஸேன அத்த²ங்க³மோ ஹோதி; பக்³க³ஹத்தா²ய ஆவஜ்ஜனாய அத்த²ங்க³மோ வீரியிந்த்³ரியஸ்ஸ அத்த²ங்க³மோ ஹோதி, பக்³க³ஹவஸேன ச²ந்த³ஸ்ஸ அத்த²ங்க³மோ வீரியிந்த்³ரியஸ்ஸ அத்த²ங்க³மோ ஹோதி, பக்³க³ஹவஸேன மனஸிகாரஸ்ஸ அத்த²ங்க³மோ வீரியிந்த்³ரியஸ்ஸ அத்த²ங்க³மோ ஹோதி, வீரியிந்த்³ரியஸ்ஸ வஸேன ஏகத்தஅனுபட்டா²னங் வீரியிந்த்³ரியஸ்ஸ அத்த²ங்க³மோ ஹோதி; உபட்டா²னத்தா²ய ஆவஜ்ஜனாய அத்த²ங்க³மோ ஸதிந்த்³ரியஸ்ஸ அத்த²ங்க³மோ ஹோதி, உபட்டா²னவஸேன ச²ந்த³ஸ்ஸ அத்த²ங்க³மோ ஸதிந்த்³ரியஸ்ஸ அத்த²ங்க³மோ ஹோதி, உபட்டா²னவஸேன மனஸிகாரஸ்ஸ அத்த²ங்க³மோ ஸதிந்த்³ரியஸ்ஸ அத்த²ங்க³மோ ஹோதி, ஸதிந்த்³ரியஸ்ஸ வஸேன ஏகத்தஅனுபட்டா²னங் ஸதிந்த்³ரியஸ்ஸ அத்த²ங்க³மோ ஹோதி; அவிக்கே²பத்தா²ய ஆவஜ்ஜனாய அத்த²ங்க³மோ ஸமாதி⁴ந்த்³ரியஸ்ஸ அத்த²ங்க³மோ ஹோதி, அவிக்கே²பவஸேன ச²ந்த³ஸ்ஸ அத்த²ங்க³மோ ஸமாதி⁴ந்த்³ரியஸ்ஸ அத்த²ங்க³மோ ஹோதி, அவிக்கே²பவஸேன மனஸிகாரஸ்ஸ அத்த²ங்க³மோ ஸமாதி⁴ந்த்³ரியஸ்ஸ அத்த²ங்க³மோ ஹோதி, ஸமாதி⁴ந்த்³ரியஸ்ஸ வஸேன ஏகத்தஅனுபட்டா²னங் ஸமாதி⁴ந்த்³ரியஸ்ஸ அத்த²ங்க³மோ ஹோதி; த³ஸ்ஸனத்தா²ய ஆவஜ்ஜனாய அத்த²ங்க³மோ பஞ்ஞிந்த்³ரியஸ்ஸ அத்த²ங்க³மோ ஹோதி, த³ஸ்ஸனவஸேன ச²ந்த³ஸ்ஸ அத்த²ங்க³மோ பஞ்ஞிந்த்³ரியஸ்ஸ அத்த²ங்க³மோ ஹோதி, த³ஸ்ஸனவஸேன மனஸிகாரஸ்ஸ அத்த²ங்க³மோ பஞ்ஞிந்த்³ரியஸ்ஸ அத்த²ங்க³மோ ஹோதி, பஞ்ஞிந்த்³ரியஸ்ஸ வஸேன ஏகத்தஅனுபட்டா²னங் பஞ்ஞிந்த்³ரியஸ்ஸ அத்த²ங்க³மோ ஹோதி.
Katamehi cattārīsāya ākārehi pañcannaṃ indriyānaṃ atthaṅgamo hoti; katamehi cattārīsāya ākārehi pañcannaṃ indriyānaṃ atthaṅgamaṃ pajānāti? Adhimokkhatthāya āvajjanāya atthaṅgamo saddhindriyassa atthaṅgamo hoti, adhimokkhavasena chandassa atthaṅgamo saddhindriyassa atthaṅgamo hoti, adhimokkhavasena manasikārassa atthaṅgamo saddhindriyassa atthaṅgamo hoti, saddhindriyassa vasena ekattaanupaṭṭhānaṃ 10 saddhindriyassa vasena atthaṅgamo hoti; paggahatthāya āvajjanāya atthaṅgamo vīriyindriyassa atthaṅgamo hoti, paggahavasena chandassa atthaṅgamo vīriyindriyassa atthaṅgamo hoti, paggahavasena manasikārassa atthaṅgamo vīriyindriyassa atthaṅgamo hoti, vīriyindriyassa vasena ekattaanupaṭṭhānaṃ vīriyindriyassa atthaṅgamo hoti; upaṭṭhānatthāya āvajjanāya atthaṅgamo satindriyassa atthaṅgamo hoti, upaṭṭhānavasena chandassa atthaṅgamo satindriyassa atthaṅgamo hoti, upaṭṭhānavasena manasikārassa atthaṅgamo satindriyassa atthaṅgamo hoti, satindriyassa vasena ekattaanupaṭṭhānaṃ satindriyassa atthaṅgamo hoti; avikkhepatthāya āvajjanāya atthaṅgamo samādhindriyassa atthaṅgamo hoti, avikkhepavasena chandassa atthaṅgamo samādhindriyassa atthaṅgamo hoti, avikkhepavasena manasikārassa atthaṅgamo samādhindriyassa atthaṅgamo hoti, samādhindriyassa vasena ekattaanupaṭṭhānaṃ samādhindriyassa atthaṅgamo hoti; dassanatthāya āvajjanāya atthaṅgamo paññindriyassa atthaṅgamo hoti, dassanavasena chandassa atthaṅgamo paññindriyassa atthaṅgamo hoti, dassanavasena manasikārassa atthaṅgamo paññindriyassa atthaṅgamo hoti, paññindriyassa vasena ekattaanupaṭṭhānaṃ paññindriyassa atthaṅgamo hoti.
அதி⁴மொக்க²த்தா²ய ஆவஜ்ஜனாய அத்த²ங்க³மோ ஸத்³தி⁴ந்த்³ரியஸ்ஸ அத்த²ங்க³மோ ஹோதி, பக்³க³ஹத்தா²ய ஆவஜ்ஜனாய அத்த²ங்க³மோ வீரியிந்த்³ரியஸ்ஸ அத்த²ங்க³மோ ஹோதி, உபட்டா²னத்தா²ய ஆவஜ்ஜனாய அத்த²ங்க³மோ ஸதிந்த்³ரியஸ்ஸ அத்த²ங்க³மோ ஹோதி, அவிக்கே²பத்தா²ய ஆவஜ்ஜனாய அத்த²ங்க³மோ ஸமாதி⁴ந்த்³ரியஸ்ஸ அத்த²ங்க³மோ ஹோதி, த³ஸ்ஸனத்தா²ய ஆவஜ்ஜனாய அத்த²ங்க³மோ பஞ்ஞிந்த்³ரியஸ்ஸ அத்த²ங்க³மோ ஹோதி. அதி⁴மொக்க²வஸேன ச²ந்த³ஸ்ஸ அத்த²ங்க³மோ ஸத்³தி⁴ந்த்³ரியஸ்ஸ அத்த²ங்க³மோ ஹோதி, பக்³க³ஹவஸேன ச²ந்த³ஸ்ஸ அத்த²ங்க³மோ வீரியிந்த்³ரியஸ்ஸ அத்த²ங்க³மோ ஹோதி, உபட்டா²னவஸேன ச²ந்த³ஸ்ஸ அத்த²ங்க³மோ ஸதிந்த்³ரியஸ்ஸ அத்த²ங்க³மோ ஹோதி, அவிக்கே²பவஸேன ச²ந்த³ஸ்ஸ அத்த²ங்க³மோ ஸமாதி⁴ந்த்³ரியஸ்ஸ அத்த²ங்க³மோ ஹோதி, த³ஸ்ஸனவஸேன ச²ந்த³ஸ்ஸ அத்த²ங்க³மோ பஞ்ஞிந்த்³ரியஸ்ஸ அத்த²ங்க³மோ ஹோதி. அதி⁴மொக்க²வஸேன மனஸிகாரஸ்ஸ அத்த²ங்க³மோ ஸத்³தி⁴ந்த்³ரியஸ்ஸ அத்த²ங்க³மோ ஹோதி, பக்³க³ஹவஸேன மனஸிகாரஸ்ஸ அத்த²ங்க³மோ வீரியிந்த்³ரியஸ்ஸ அத்த²ங்க³மோ ஹோதி, உபட்டா²னவஸேன மனஸிகாரஸ்ஸ அத்த²ங்க³மோ ஸதிந்த்³ரியஸ்ஸ அத்த²ங்க³மோ ஹோதி, அவிக்கே²பவஸேன மனஸிகாரஸ்ஸ அத்த²ங்க³மோ ஸமாதி⁴ந்த்³ரியஸ்ஸ அத்த²ங்க³மோ ஹோதி, த³ஸ்ஸனவஸேன மனஸிகாரஸ்ஸ அத்த²ங்க³மோ பஞ்ஞிந்த்³ரியஸ்ஸ அத்த²ங்க³மோ ஹோதி. ஸத்³தி⁴ந்த்³ரியஸ்ஸ வஸேன ஏகத்தஅனுபட்டா²னங் ஸத்³தி⁴ந்த்³ரியஸ்ஸ அத்த²ங்க³மோ ஹோதி, வீரியிந்த்³ரியஸ்ஸ வஸேன ஏகத்தஅனுபட்டா²னங் வீரியிந்த்³ரியஸ்ஸ அத்த²ங்க³மோ ஹோதி, ஸதிந்த்³ரியஸ்ஸ வஸேன ஏகத்தஅனுபட்டா²னங் ஸதிந்த்³ரியஸ்ஸ அத்த²ங்க³மோ ஹோதி, ஸமாதி⁴ந்த்³ரியஸ்ஸ வஸேன ஏகத்தஅனுபட்டா²னங் ஸமாதி⁴ந்த்³ரியஸ்ஸ அத்த²ங்க³மோ ஹோதி, பஞ்ஞிந்த்³ரியஸ்ஸ வஸேன ஏகத்தஅனுபட்டா²னங் பஞ்ஞிந்த்³ரியஸ்ஸ அத்த²ங்க³மோ ஹோதி.
Adhimokkhatthāya āvajjanāya atthaṅgamo saddhindriyassa atthaṅgamo hoti, paggahatthāya āvajjanāya atthaṅgamo vīriyindriyassa atthaṅgamo hoti, upaṭṭhānatthāya āvajjanāya atthaṅgamo satindriyassa atthaṅgamo hoti, avikkhepatthāya āvajjanāya atthaṅgamo samādhindriyassa atthaṅgamo hoti, dassanatthāya āvajjanāya atthaṅgamo paññindriyassa atthaṅgamo hoti. Adhimokkhavasena chandassa atthaṅgamo saddhindriyassa atthaṅgamo hoti, paggahavasena chandassa atthaṅgamo vīriyindriyassa atthaṅgamo hoti, upaṭṭhānavasena chandassa atthaṅgamo satindriyassa atthaṅgamo hoti, avikkhepavasena chandassa atthaṅgamo samādhindriyassa atthaṅgamo hoti, dassanavasena chandassa atthaṅgamo paññindriyassa atthaṅgamo hoti. Adhimokkhavasena manasikārassa atthaṅgamo saddhindriyassa atthaṅgamo hoti, paggahavasena manasikārassa atthaṅgamo vīriyindriyassa atthaṅgamo hoti, upaṭṭhānavasena manasikārassa atthaṅgamo satindriyassa atthaṅgamo hoti, avikkhepavasena manasikārassa atthaṅgamo samādhindriyassa atthaṅgamo hoti, dassanavasena manasikārassa atthaṅgamo paññindriyassa atthaṅgamo hoti. Saddhindriyassa vasena ekattaanupaṭṭhānaṃ saddhindriyassa atthaṅgamo hoti, vīriyindriyassa vasena ekattaanupaṭṭhānaṃ vīriyindriyassa atthaṅgamo hoti, satindriyassa vasena ekattaanupaṭṭhānaṃ satindriyassa atthaṅgamo hoti, samādhindriyassa vasena ekattaanupaṭṭhānaṃ samādhindriyassa atthaṅgamo hoti, paññindriyassa vasena ekattaanupaṭṭhānaṃ paññindriyassa atthaṅgamo hoti.
இமேஹி சத்தாரீஸாய ஆகாரேஹி பஞ்சன்னங் இந்த்³ரியானங் அத்த²ங்க³மோ ஹோதி; இமேஹி சத்தாரீஸாய ஆகாரேஹி பஞ்சன்னங் இந்த்³ரியானங் அத்த²ங்க³மங் பஜானாதி.
Imehi cattārīsāya ākārehi pañcannaṃ indriyānaṃ atthaṅgamo hoti; imehi cattārīsāya ākārehi pañcannaṃ indriyānaṃ atthaṅgamaṃ pajānāti.
க. அஸ்ஸாத³னித்³தே³ஸோ
Ka. assādaniddeso
189. கதமேஹி பஞ்சவீஸதியா ஆகாரேஹி பஞ்சன்னங் இந்த்³ரியானங் அஸ்ஸாதோ³ ஹோதி; கதமேஹி பஞ்சவீஸதியா ஆகாரேஹி பஞ்சன்னங் இந்த்³ரியானங் அஸ்ஸாத³ங் பஜானாதி? அஸ்ஸத்³தி⁴யஸ்ஸ அனுபட்டா²னங் ஸத்³தி⁴ந்த்³ரியஸ்ஸ அஸ்ஸாதோ³ ஹோதி, அஸ்ஸத்³தி⁴யபரிளாஹஸ்ஸ அனுபட்டா²னங் ஸத்³தி⁴ந்த்³ரியஸ்ஸ அஸ்ஸாதோ³ ஹோதி, அதி⁴மொக்க²சரியாய வேஸாரஜ்ஜங் ஸத்³தி⁴ந்த்³ரியஸ்ஸ அஸ்ஸாதோ³ ஹோதி, ஸந்தோ ச விஹாராதி⁴க³மோ ஸத்³தி⁴ந்த்³ரியஸ்ஸ அஸ்ஸாதோ³ ஹோதி, யங் ஸத்³தி⁴ந்த்³ரியங் படிச்ச உப்பஜ்ஜதி ஸுக²ங் ஸோமனஸ்ஸங் அயங் ஸத்³தி⁴ந்த்³ரியஸ்ஸ அஸ்ஸாதோ³.
189. Katamehi pañcavīsatiyā ākārehi pañcannaṃ indriyānaṃ assādo hoti; katamehi pañcavīsatiyā ākārehi pañcannaṃ indriyānaṃ assādaṃ pajānāti? Assaddhiyassa anupaṭṭhānaṃ saddhindriyassa assādo hoti, assaddhiyapariḷāhassa anupaṭṭhānaṃ saddhindriyassa assādo hoti, adhimokkhacariyāya vesārajjaṃ saddhindriyassa assādo hoti, santo ca vihārādhigamo saddhindriyassa assādo hoti, yaṃ saddhindriyaṃ paṭicca uppajjati sukhaṃ somanassaṃ ayaṃ saddhindriyassa assādo.
கோஸஜ்ஜஸ்ஸ அனுபட்டா²னங் வீரியிந்த்³ரியஸ்ஸ அஸ்ஸாதோ³ ஹோதி, கோஸஜ்ஜபரிளாஹஸ்ஸ அனுபட்டா²னங் வீரியிந்த்³ரியஸ்ஸ அஸ்ஸாதோ³ ஹோதி, பக்³க³ஹசரியாய வேஸாரஜ்ஜங் வீரியிந்த்³ரியஸ்ஸ அஸ்ஸாதோ³ ஹோதி, ஸந்தோ ச விஹாராதி⁴க³மோ வீரியிந்த்³ரியஸ்ஸ அஸ்ஸாதோ³ ஹோதி, யங் வீரியிந்த்³ரியங் படிச்ச உப்பஜ்ஜதி ஸுக²ங் ஸோமனஸ்ஸங் அயங் வீரியிந்த்³ரியஸ்ஸ அஸ்ஸாதோ³.
Kosajjassa anupaṭṭhānaṃ vīriyindriyassa assādo hoti, kosajjapariḷāhassa anupaṭṭhānaṃ vīriyindriyassa assādo hoti, paggahacariyāya vesārajjaṃ vīriyindriyassa assādo hoti, santo ca vihārādhigamo vīriyindriyassa assādo hoti, yaṃ vīriyindriyaṃ paṭicca uppajjati sukhaṃ somanassaṃ ayaṃ vīriyindriyassa assādo.
பமாத³ஸ்ஸ அனுபட்டா²னங் ஸதிந்த்³ரியஸ்ஸ அஸ்ஸாதோ³ ஹோதி, பமாத³பரிளாஹஸ்ஸ அனுபட்டா²னங் ஸதிந்த்³ரியஸ்ஸ அஸ்ஸாதோ³ ஹோதி, உபட்டா²னசரியாய வேஸாரஜ்ஜங் ஸதிந்த்³ரியஸ்ஸ அஸ்ஸாதோ³ ஹோதி, ஸந்தோ ச விஹாராதி⁴க³மோ ஸதிந்த்³ரியஸ்ஸ அஸ்ஸாதோ³ ஹோதி, யங் ஸதிந்த்³ரியங் படிச்ச உப்பஜ்ஜதி ஸுக²ங் ஸோமனஸ்ஸங் அயங் ஸதிந்த்³ரியஸ்ஸ அஸ்ஸாதோ³.
Pamādassa anupaṭṭhānaṃ satindriyassa assādo hoti, pamādapariḷāhassa anupaṭṭhānaṃ satindriyassa assādo hoti, upaṭṭhānacariyāya vesārajjaṃ satindriyassa assādo hoti, santo ca vihārādhigamo satindriyassa assādo hoti, yaṃ satindriyaṃ paṭicca uppajjati sukhaṃ somanassaṃ ayaṃ satindriyassa assādo.
உத்³த⁴ச்சஸ்ஸ அனுபட்டா²னங் ஸமாதி⁴ந்த்³ரியஸ்ஸ அஸ்ஸாதோ³ ஹோதி, உத்³த⁴ச்சபரிளாஹஸ்ஸ அனுபட்டா²னங் ஸமாதி⁴ந்த்³ரியஸ்ஸ அஸ்ஸாதோ³ ஹோதி, அவிக்கே²பசரியாய வேஸாரஜ்ஜங் ஸமாதி⁴ந்த்³ரியஸ்ஸ அஸ்ஸாதோ³ ஹோதி, ஸந்தோ ச விஹாராதி⁴க³மோ ஸமாதி⁴ந்த்³ரியஸ்ஸ அஸ்ஸாதோ³ ஹோதி, யங் ஸமாதி⁴ந்த்³ரியங் படிச்ச உப்பஜ்ஜதி ஸுக²ங் ஸோமனஸ்ஸங் அயங் ஸமாதி⁴ந்த்³ரியஸ்ஸ அஸ்ஸாதோ³.
Uddhaccassa anupaṭṭhānaṃ samādhindriyassa assādo hoti, uddhaccapariḷāhassa anupaṭṭhānaṃ samādhindriyassa assādo hoti, avikkhepacariyāya vesārajjaṃ samādhindriyassa assādo hoti, santo ca vihārādhigamo samādhindriyassa assādo hoti, yaṃ samādhindriyaṃ paṭicca uppajjati sukhaṃ somanassaṃ ayaṃ samādhindriyassa assādo.
அவிஜ்ஜாய அனுபட்டா²னங் பஞ்ஞிந்த்³ரியஸ்ஸ அஸ்ஸாதோ³ ஹோதி, அவிஜ்ஜாபரிளாஹஸ்ஸ அனுபட்டா²னங் பஞ்ஞிந்த்³ரியஸ்ஸ அஸ்ஸாதோ³ ஹோதி, த³ஸ்ஸனசரியாய வேஸாரஜ்ஜங் பஞ்ஞிந்த்³ரியஸ்ஸ அஸ்ஸாதோ³ ஹோதி , ஸந்தோ ச விஹாராதி⁴க³மோ பஞ்ஞிந்த்³ரியஸ்ஸ அஸ்ஸாதோ³ ஹோதி, யங் பஞ்ஞிந்த்³ரியங் படிச்ச உப்பஜ்ஜதி ஸுக²ங் ஸோமனஸ்ஸங் அயங் பஞ்ஞிந்த்³ரியஸ்ஸ அஸ்ஸாதோ³.
Avijjāya anupaṭṭhānaṃ paññindriyassa assādo hoti, avijjāpariḷāhassa anupaṭṭhānaṃ paññindriyassa assādo hoti, dassanacariyāya vesārajjaṃ paññindriyassa assādo hoti , santo ca vihārādhigamo paññindriyassa assādo hoti, yaṃ paññindriyaṃ paṭicca uppajjati sukhaṃ somanassaṃ ayaṃ paññindriyassa assādo.
இமேஹி பஞ்சவீஸதியா ஆகாரேஹி பஞ்சன்னங் இந்த்³ரியானங் அஸ்ஸாதோ³ ஹோதி; இமேஹி பஞ்சவீஸதியா ஆகாரேஹி பஞ்சன்னங் இந்த்³ரியானங் அஸ்ஸாத³ங் பஜானாதி.
Imehi pañcavīsatiyā ākārehi pañcannaṃ indriyānaṃ assādo hoti; imehi pañcavīsatiyā ākārehi pañcannaṃ indriyānaṃ assādaṃ pajānāti.
க². ஆதீ³னவனித்³தே³ஸோ
Kha. ādīnavaniddeso
190. கதமேஹி பஞ்சவீஸதியா ஆகாரேஹி பஞ்சன்னங் இந்த்³ரியானங் ஆதீ³னவோ ஹோதி; கதமேஹி பஞ்சவீஸதியா ஆகாரேஹி பஞ்சன்னங் இந்த்³ரியானங் ஆதீ³னவங் பஜானாதி? அஸ்ஸத்³தி⁴யஸ்ஸ உபட்டா²னங் ஸத்³தி⁴ந்த்³ரியஸ்ஸ ஆதீ³னவோ ஹோதி, அஸ்ஸத்³தி⁴யபரிளாஹஸ்ஸ உபட்டா²னங் ஸத்³தி⁴ந்த்³ரியஸ்ஸ ஆதீ³னவோ ஹோதி, அனிச்சட்டே²ன ஸத்³தி⁴ந்த்³ரியஸ்ஸ ஆதீ³னவோ ஹோதி, து³க்க²ட்டே²ன ஸத்³தி⁴ந்த்³ரியஸ்ஸ ஆதீ³னவோ ஹோதி, அனத்தட்டே²ன ஸத்³தி⁴ந்த்³ரியஸ்ஸ ஆதீ³னவோ ஹோதி.
190. Katamehi pañcavīsatiyā ākārehi pañcannaṃ indriyānaṃ ādīnavo hoti; katamehi pañcavīsatiyā ākārehi pañcannaṃ indriyānaṃ ādīnavaṃ pajānāti? Assaddhiyassa upaṭṭhānaṃ saddhindriyassa ādīnavo hoti, assaddhiyapariḷāhassa upaṭṭhānaṃ saddhindriyassa ādīnavo hoti, aniccaṭṭhena saddhindriyassa ādīnavo hoti, dukkhaṭṭhena saddhindriyassa ādīnavo hoti, anattaṭṭhena saddhindriyassa ādīnavo hoti.
கோஸஜ்ஜஸ்ஸ உபட்டா²னங் வீரியிந்த்³ரியஸ்ஸ ஆதீ³னவோ ஹோதி, கோஸஜ்ஜபரிளாஹஸ்ஸ உபட்டா²னங் வீரியிந்த்³ரியஸ்ஸ ஆதீ³னவோ ஹோதி, அனிச்சட்டே²ன வீரியிந்த்³ரியஸ்ஸ ஆதீ³னவோ ஹோதி, து³க்க²ட்டே²ன…பே॰… அனத்தட்டே²ன வீரியிந்த்³ரியஸ்ஸ ஆதீ³னவோ ஹோதி.
Kosajjassa upaṭṭhānaṃ vīriyindriyassa ādīnavo hoti, kosajjapariḷāhassa upaṭṭhānaṃ vīriyindriyassa ādīnavo hoti, aniccaṭṭhena vīriyindriyassa ādīnavo hoti, dukkhaṭṭhena…pe… anattaṭṭhena vīriyindriyassa ādīnavo hoti.
பமாத³ஸ்ஸ உபட்டா²னங் ஸதிந்த்³ரியஸ்ஸ ஆதீ³னவோ ஹோதி, பமாத³பரிளாஹஸ்ஸ உபட்டா²னங் ஸதிந்த்³ரியஸ்ஸ ஆதீ³னவோ ஹோதி, அனிச்சட்டே²ன ஸதிந்த்³ரியஸ்ஸ ஆதீ³னவோ ஹோதி, து³க்க²ட்டே²ன…பே॰… அனத்தட்டே²ன ஸதிந்த்³ரியஸ்ஸ ஆதீ³னவோ ஹோதி.
Pamādassa upaṭṭhānaṃ satindriyassa ādīnavo hoti, pamādapariḷāhassa upaṭṭhānaṃ satindriyassa ādīnavo hoti, aniccaṭṭhena satindriyassa ādīnavo hoti, dukkhaṭṭhena…pe… anattaṭṭhena satindriyassa ādīnavo hoti.
உத்³த⁴ச்சஸ்ஸ உபட்டா²னங் ஸமாதி⁴ந்த்³ரியஸ்ஸ ஆதீ³னவோ ஹோதி, உத்³த⁴ச்சபரிளாஹஸ்ஸ உபட்டா²னங் ஸமாதி⁴ந்த்³ரியஸ்ஸ ஆதீ³னவோ ஹோதி, அனிச்சட்டே²ன ஸமாதி⁴ந்த்³ரியஸ்ஸ ஆதீ³னவோ ஹோதி, து³க்க²ட்டே²ன…பே॰… அனத்தட்டே²ன ஸமாதி⁴ந்த்³ரியஸ்ஸ ஆதீ³னவோ ஹோதி.
Uddhaccassa upaṭṭhānaṃ samādhindriyassa ādīnavo hoti, uddhaccapariḷāhassa upaṭṭhānaṃ samādhindriyassa ādīnavo hoti, aniccaṭṭhena samādhindriyassa ādīnavo hoti, dukkhaṭṭhena…pe… anattaṭṭhena samādhindriyassa ādīnavo hoti.
அவிஜ்ஜாய உபட்டா²னங் பஞ்ஞிந்த்³ரியஸ்ஸ ஆதீ³னவோ ஹோதி, அவிஜ்ஜாபரிளாஹஸ்ஸ உபட்டா²னங் பஞ்ஞிந்த்³ரியஸ்ஸ ஆதீ³னவோ ஹோதி, அனிச்சட்டே²ன பஞ்ஞிந்த்³ரியஸ்ஸ ஆதீ³னவோ ஹோதி, து³க்க²ட்டே²ன பஞ்ஞிந்த்³ரியஸ்ஸ ஆதீ³னவோ ஹோதி, அனத்தட்டே²ன பஞ்ஞிந்த்³ரியஸ்ஸ ஆதீ³னவோ ஹோதி.
Avijjāya upaṭṭhānaṃ paññindriyassa ādīnavo hoti, avijjāpariḷāhassa upaṭṭhānaṃ paññindriyassa ādīnavo hoti, aniccaṭṭhena paññindriyassa ādīnavo hoti, dukkhaṭṭhena paññindriyassa ādīnavo hoti, anattaṭṭhena paññindriyassa ādīnavo hoti.
இமேஹி பஞ்சவீஸதியா ஆகாரேஹி பஞ்சன்னங் இந்த்³ரியானங் ஆதீ³னவோ ஹோதி; இமேஹி பஞ்சவீஸதியா ஆகாரேஹி பஞ்சன்னங் இந்த்³ரியானங் ஆதீ³னவங் பஜானாதி.
Imehi pañcavīsatiyā ākārehi pañcannaṃ indriyānaṃ ādīnavo hoti; imehi pañcavīsatiyā ākārehi pañcannaṃ indriyānaṃ ādīnavaṃ pajānāti.
க³. நிஸ்ஸரணனித்³தே³ஸோ
Ga. nissaraṇaniddeso
191. கதமேஹி அஸீதிஸதங் ஆகாரேஹி பஞ்சன்னங் இந்த்³ரியானங் நிஸ்ஸரணங் ஹோதி; கதமேஹி அஸீதிஸதங் ஆகாரேஹி பஞ்சன்னங் இந்த்³ரியானங் நிஸ்ஸரணங் பஜானாதி? அதி⁴மொக்க²ட்டே²ன ஸத்³தி⁴ந்த்³ரியங் அஸ்ஸத்³தி⁴யா நிஸ்ஸடங் ஹோதி, அஸ்ஸத்³தி⁴யபரிளாஹா நிஸ்ஸடங் ஹோதி, தத³னுவத்தககிலேஸேஹி ச க²ந்தே⁴ஹி ச நிஸ்ஸடங் ஹோதி, ப³ஹித்³தா⁴ ச ஸப்³ப³னிமித்தேஹி நிஸ்ஸடங் ஹோதி, ததோ பணீததரஸத்³தி⁴ந்த்³ரியஸ்ஸ படிலாபா⁴ புரிமதரஸத்³தி⁴ந்த்³ரியா நிஸ்ஸடங் ஹோதி; பக்³க³ஹட்டே²ன வீரியிந்த்³ரியங் கோஸஜ்ஜா நிஸ்ஸடங் ஹோதி, கோஸஜ்ஜபரிளாஹா நிஸ்ஸடங் ஹோதி, தத³னுவத்தககிலேஸேஹி ச க²ந்தே⁴ஹி ச நிஸ்ஸடங் ஹோதி, ப³ஹித்³தா⁴ ச ஸப்³ப³னிமித்தேஹி நிஸ்ஸடங் ஹோதி, ததோ பணீததரவீரியிந்த்³ரியஸ்ஸ படிலாபா⁴ புரிமதரவீரியிந்த்³ரியா நிஸ்ஸடங் ஹோதி; உபட்டா²னட்டே²ன ஸதிந்த்³ரியங் பமாதா³ நிஸ்ஸடங் ஹோதி, பமாத³பரிளாஹா நிஸ்ஸடங் ஹோதி , தத³னுவத்தககிலேஸேஹி ச க²ந்தே⁴ஹி ச நிஸ்ஸடங் ஹோதி, ப³ஹித்³தா⁴ ச ஸப்³ப³னிமித்தேஹி நிஸ்ஸடங் ஹோதி, ததோ பணீததரஸதிந்த்³ரியஸ்ஸ படிலாபா⁴ புரிமதரஸதிந்த்³ரியா நிஸ்ஸடங் ஹோதி; அவிக்கே²பட்டே²ன ஸமாதி⁴ந்த்³ரியங் உத்³த⁴ச்சா நிஸ்ஸடங் ஹோதி, உத்³த⁴ச்சபரிளாஹா நிஸ்ஸடங் ஹோதி, தத³னுவத்தககிலேஸேஹி ச க²ந்தே⁴ஹி ச நிஸ்ஸடங் ஹோதி, ப³ஹித்³தா⁴ ச ஸப்³ப³னிமித்தேஹி நிஸ்ஸடங் ஹோதி, ததோ பணீததரஸமாதி⁴ந்த்³ரியஸ்ஸ படிலாபா⁴ புரிமதரஸமாதி⁴ந்த்³ரியா நிஸ்ஸடங் ஹோதி; த³ஸ்ஸனட்டே²ன பஞ்ஞிந்த்³ரியங் அவிஜ்ஜாய நிஸ்ஸடங் ஹோதி, அவிஜ்ஜாபரிளாஹா நிஸ்ஸடங் ஹோதி, தத³னுவத்தககிலேஸேஹி ச க²ந்தே⁴ஹி ச நிஸ்ஸடங் ஹோதி, ப³ஹித்³தா⁴ ச ஸப்³ப³னிமித்தேஹி நிஸ்ஸடங் ஹோதி, ததோ பணீததரபஞ்ஞிந்த்³ரியஸ்ஸ படிலாபா⁴ புரிமதரபஞ்ஞிந்த்³ரியா நிஸ்ஸடங் ஹோதி.
191. Katamehi asītisataṃ ākārehi pañcannaṃ indriyānaṃ nissaraṇaṃ hoti; katamehi asītisataṃ ākārehi pañcannaṃ indriyānaṃ nissaraṇaṃ pajānāti? Adhimokkhaṭṭhena saddhindriyaṃ assaddhiyā nissaṭaṃ hoti, assaddhiyapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasaddhindriyassa paṭilābhā purimatarasaddhindriyā nissaṭaṃ hoti; paggahaṭṭhena vīriyindriyaṃ kosajjā nissaṭaṃ hoti, kosajjapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītataravīriyindriyassa paṭilābhā purimataravīriyindriyā nissaṭaṃ hoti; upaṭṭhānaṭṭhena satindriyaṃ pamādā nissaṭaṃ hoti, pamādapariḷāhā nissaṭaṃ hoti , tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasatindriyassa paṭilābhā purimatarasatindriyā nissaṭaṃ hoti; avikkhepaṭṭhena samādhindriyaṃ uddhaccā nissaṭaṃ hoti, uddhaccapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasamādhindriyassa paṭilābhā purimatarasamādhindriyā nissaṭaṃ hoti; dassanaṭṭhena paññindriyaṃ avijjāya nissaṭaṃ hoti, avijjāpariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarapaññindriyassa paṭilābhā purimatarapaññindriyā nissaṭaṃ hoti.
192. புப்³ப³பா⁴கே³ பஞ்சஹி இந்த்³ரியேஹி பட²மஜ்ஜா²னவஸேன பஞ்சிந்த்³ரியானி நிஸ்ஸடானி ஹொந்தி, பட²மே ஜா²னே பஞ்சஹிந்த்³ரியேஹி து³தியஜ்ஜா²னவஸேன பஞ்சிந்த்³ரியானி நிஸ்ஸடானி ஹொந்தி, து³தியே ஜா²னே பஞ்சஹிந்த்³ரியேஹி ததியஜ்ஜா²னவஸேன பஞ்சிந்த்³ரியானி நிஸ்ஸடானி ஹொந்தி, ததியே ஜா²னே பஞ்சஹிந்த்³ரியேஹி சதுத்த²ஜ்ஜா²னவஸேன பஞ்சிந்த்³ரியானி நிஸ்ஸடானி ஹொந்தி, சதுத்தே² ஜா²னே பஞ்சஹிந்த்³ரியேஹி ஆகாஸானஞ்சாயதனஸமாபத்திவஸேன பஞ்சிந்த்³ரியானி நிஸ்ஸடானி ஹொந்தி , ஆகாஸானஞ்சாயதனஸமாபத்தியா பஞ்சஹிந்த்³ரியேஹி விஞ்ஞாணஞ்சாயதனஸமாபத்திவஸேன பஞ்சிந்த்³ரியானி நிஸ்ஸடானி ஹொந்தி, விஞ்ஞாணஞ்சாயதனஸமாபத்தியா பஞ்சஹிந்த்³ரியேஹி ஆகிஞ்சஞ்ஞாயதனஸமாபத்திவஸேன பஞ்சிந்த்³ரியானி நிஸ்ஸடானி ஹொந்தி, ஆகிஞ்சஞ்ஞாயதனஸமாபத்தியா பஞ்சஹிந்த்³ரியேஹி நேவஸஞ்ஞானாஸஞ்ஞாயதனஸமாபத்திவஸேன பஞ்சிந்த்³ரியானி நிஸ்ஸடானி ஹொந்தி, நேவஸஞ்ஞானாஸஞ்ஞாயதனஸமாபத்தியா பஞ்சஹிந்த்³ரியேஹி அனிச்சானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி.
192. Pubbabhāge pañcahi indriyehi paṭhamajjhānavasena pañcindriyāni nissaṭāni honti, paṭhame jhāne pañcahindriyehi dutiyajjhānavasena pañcindriyāni nissaṭāni honti, dutiye jhāne pañcahindriyehi tatiyajjhānavasena pañcindriyāni nissaṭāni honti, tatiye jhāne pañcahindriyehi catutthajjhānavasena pañcindriyāni nissaṭāni honti, catutthe jhāne pañcahindriyehi ākāsānañcāyatanasamāpattivasena pañcindriyāni nissaṭāni honti , ākāsānañcāyatanasamāpattiyā pañcahindriyehi viññāṇañcāyatanasamāpattivasena pañcindriyāni nissaṭāni honti, viññāṇañcāyatanasamāpattiyā pañcahindriyehi ākiñcaññāyatanasamāpattivasena pañcindriyāni nissaṭāni honti, ākiñcaññāyatanasamāpattiyā pañcahindriyehi nevasaññānāsaññāyatanasamāpattivasena pañcindriyāni nissaṭāni honti, nevasaññānāsaññāyatanasamāpattiyā pañcahindriyehi aniccānupassanāvasena pañcindriyāni nissaṭāni honti.
அனிச்சானுபஸ்ஸனா பஞ்சஹிந்த்³ரியேஹி து³க்கா²னுபஸ்ஸனாவஸே பஞ்சிந்த்³ரியானி நிஸ்ஸடானி ஹொந்தி, து³க்கா²னுபஸ்ஸனா பஞ்சஹிந்த்³ரியேஹி அனத்தானுபஸ்ஸனாவஸே பஞ்சிந்த்³ரியானி நிஸ்ஸடானி ஹொந்தி, அனத்தானுபஸ்ஸனா பஞ்சஹிந்த்³ரியேஹி நிப்³பி³தா³னுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, நிப்³பி³தா³னுபஸ்ஸனாய பஞ்சஹிந்த்³ரியேஹி விராகா³னுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, விராகா³னுபஸ்ஸனாய பஞ்சஹிந்த்³ரியேஹி நிரோதா⁴னுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, நிரோதா⁴னுபஸ்ஸனாய பஞ்சஹிந்த்³ரியேஹி படினிஸ்ஸக்³கா³னுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, படினிஸ்ஸக்³கா³னுபஸ்ஸனாய பஞ்சஹிந்த்³ரியேஹி க²யானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, க²யானுபஸ்ஸனாய பஞ்சஹிந்த்³ரியேஹி வயானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, வயானுபஸ்ஸனாய பஞ்சஹிந்த்³ரியேஹி விபரிணாமானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, விபரிணாமானுபஸ்ஸனாய பஞ்சஹிந்த்³ரியேஹி அனிமித்தானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, அனிமித்தானுபஸ்ஸனாய பஞ்சஹிந்த்³ரியேஹி அப்பணிஹிதானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, அப்பணிஹிதானுபஸ்ஸனாய பஞ்சஹிந்த்³ரியேஹி ஸுஞ்ஞதானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி ஸுஞ்ஞதானுபஸ்ஸனாய பஞ்சஹிந்த்³ரியேஹி அதி⁴பஞ்ஞாத⁴ம்மவிபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி. அதி⁴பஞ்ஞாத⁴ம்மவிபஸ்ஸனாய பஞ்சஹிந்த்³ரியேஹி யதா²பூ⁴தஞாணத³ஸ்ஸனவஸேன பஞ்சிந்த்³ரியானி நிஸ்ஸடானி ஹொந்தி, யதா²பூ⁴தஞாணத³ஸ்ஸனே பஞ்சஹிந்த்³ரியேஹி ஆதீ³னவானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, ஆதீ³னவானுபஸ்ஸனாய பஞ்சஹிந்த்³ரியேஹி படிஸங்கா²னுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி, படிஸங்கா²னுபஸ்ஸனாய பஞ்சஹிந்த்³ரியேஹி விவட்டனானுபஸ்ஸனாவஸேன பஞ்சிந்த்³ரியானி நிஸ்ஸடானி ஹொந்தி. விவட்டனானுபஸ்ஸனாய பஞ்சஹிந்த்³ரியேஹி ஸோதாபத்திமக்³க³வஸேன பஞ்சிந்த்³ரியானி நிஸ்ஸடானி ஹொந்தி.
Aniccānupassanā pañcahindriyehi dukkhānupassanāvase pañcindriyāni nissaṭāni honti, dukkhānupassanā pañcahindriyehi anattānupassanāvase pañcindriyāni nissaṭāni honti, anattānupassanā pañcahindriyehi nibbidānupassanāvasena pañcindriyāni nissaṭāni honti, nibbidānupassanāya pañcahindriyehi virāgānupassanāvasena pañcindriyāni nissaṭāni honti, virāgānupassanāya pañcahindriyehi nirodhānupassanāvasena pañcindriyāni nissaṭāni honti, nirodhānupassanāya pañcahindriyehi paṭinissaggānupassanāvasena pañcindriyāni nissaṭāni honti, paṭinissaggānupassanāya pañcahindriyehi khayānupassanāvasena pañcindriyāni nissaṭāni honti, khayānupassanāya pañcahindriyehi vayānupassanāvasena pañcindriyāni nissaṭāni honti, vayānupassanāya pañcahindriyehi vipariṇāmānupassanāvasena pañcindriyāni nissaṭāni honti, vipariṇāmānupassanāya pañcahindriyehi animittānupassanāvasena pañcindriyāni nissaṭāni honti, animittānupassanāya pañcahindriyehi appaṇihitānupassanāvasena pañcindriyāni nissaṭāni honti, appaṇihitānupassanāya pañcahindriyehi suññatānupassanāvasena pañcindriyāni nissaṭāni honti suññatānupassanāya pañcahindriyehi adhipaññādhammavipassanāvasena pañcindriyāni nissaṭāni honti. Adhipaññādhammavipassanāya pañcahindriyehi yathābhūtañāṇadassanavasena pañcindriyāni nissaṭāni honti, yathābhūtañāṇadassane pañcahindriyehi ādīnavānupassanāvasena pañcindriyāni nissaṭāni honti, ādīnavānupassanāya pañcahindriyehi paṭisaṅkhānupassanāvasena pañcindriyāni nissaṭāni honti, paṭisaṅkhānupassanāya pañcahindriyehi vivaṭṭanānupassanāvasena pañcindriyāni nissaṭāni honti. Vivaṭṭanānupassanāya pañcahindriyehi sotāpattimaggavasena pañcindriyāni nissaṭāni honti.
ஸோதாபத்திமக்³கே³ பஞ்சஹிந்த்³ரியேஹி ஸோதாபத்திப²லஸமாபத்திவஸேன பஞ்சிந்த்³ரியானி நிஸ்ஸடானி ஹொந்தி, ஸோதாபத்திப²லஸமாபத்தியா பஞ்சஹிந்த்³ரியேஹி ஸகதா³கா³மிமக்³க³வஸேன பஞ்சிந்த்³ரியானி நிஸ்ஸடானி ஹொந்தி, ஸகதா³கா³மிமக்³கே³ பஞ்சஹிந்த்³ரியேஹி ஸகதா³கா³மிப²லஸமாபத்திவஸேன பஞ்சிந்த்³ரியானி நிஸ்ஸடானி ஹொந்தி, ஸகதா³கா³மிப²லஸமாபத்தியா பஞ்சஹிந்த்³ரியேஹி அனாகா³மிமக்³க³வஸேன பஞ்சிந்த்³ரியானி நிஸ்ஸடானி ஹொந்தி, அனாகா³மிமக்³கே³ பஞ்சஹிந்த்³ரியேஹி அனாகா³மிப²லஸமாபத்திவஸேன பஞ்சிந்த்³ரியானி நிஸ்ஸடானி ஹொந்தி, அனாகா³மிப²லஸமாபத்தியா பஞ்சஹிந்த்³ரியேஹி அரஹத்தமக்³க³வஸேன பஞ்சிந்த்³ரியானி நிஸ்ஸடானி ஹொந்தி, அரஹத்தமக்³கே³ பஞ்சஹிந்த்³ரியேஹி அரஹத்தப²லஸமாபத்திவஸேன பஞ்சிந்த்³ரியானி நிஸ்ஸடானி ஹொந்தி.
Sotāpattimagge pañcahindriyehi sotāpattiphalasamāpattivasena pañcindriyāni nissaṭāni honti, sotāpattiphalasamāpattiyā pañcahindriyehi sakadāgāmimaggavasena pañcindriyāni nissaṭāni honti, sakadāgāmimagge pañcahindriyehi sakadāgāmiphalasamāpattivasena pañcindriyāni nissaṭāni honti, sakadāgāmiphalasamāpattiyā pañcahindriyehi anāgāmimaggavasena pañcindriyāni nissaṭāni honti, anāgāmimagge pañcahindriyehi anāgāmiphalasamāpattivasena pañcindriyāni nissaṭāni honti, anāgāmiphalasamāpattiyā pañcahindriyehi arahattamaggavasena pañcindriyāni nissaṭāni honti, arahattamagge pañcahindriyehi arahattaphalasamāpattivasena pañcindriyāni nissaṭāni honti.
நெக்க²ம்மே பஞ்சிந்த்³ரியானி காமச்ச²ந்த³தோ நிஸ்ஸடானி ஹொந்தி, அப்³யாபாதே³ பஞ்சிந்த்³ரியானி ப்³யாபாத³தோ நிஸ்ஸடானி ஹொந்தி, ஆலோகஸஞ்ஞாய பஞ்சிந்த்³ரியானி தி²னமித்³த⁴தோ நிஸ்ஸடானி ஹொந்தி, அவிக்கே²பே பஞ்சிந்த்³ரியானி உத்³த⁴ச்சதோ நிஸ்ஸடானி ஹொந்தி, த⁴ம்மவவத்தா²னே பஞ்சிந்த்³ரியானி விசிகிச்சா²ய நிஸ்ஸடானி ஹொந்தி, ஞாணே பஞ்சிந்த்³ரியானி அவிஜ்ஜாய நிஸ்ஸடானி ஹொந்தி, பாமோஜ்ஜே பஞ்சிந்த்³ரியானி அரதியா நிஸ்ஸடானி ஹொந்தி.
Nekkhamme pañcindriyāni kāmacchandato nissaṭāni honti, abyāpāde pañcindriyāni byāpādato nissaṭāni honti, ālokasaññāya pañcindriyāni thinamiddhato nissaṭāni honti, avikkhepe pañcindriyāni uddhaccato nissaṭāni honti, dhammavavatthāne pañcindriyāni vicikicchāya nissaṭāni honti, ñāṇe pañcindriyāni avijjāya nissaṭāni honti, pāmojje pañcindriyāni aratiyā nissaṭāni honti.
193. பட²மே ஜா²னே பஞ்சிந்த்³ரியானி நீவரணேஹி நிஸ்ஸடானி ஹொந்தி, து³தியே ஜா²னே பஞ்சிந்த்³ரியானி விதக்கவிசாரேஹி நிஸ்ஸடானி ஹொந்தி, ததியே ஜா²னே பஞ்சிந்த்³ரியானி பீதியா நிஸ்ஸடானி ஹொந்தி, சதுத்தே² ஜா²னே பஞ்சிந்த்³ரியானி ஸுக²து³க்கே²ஹி நிஸ்ஸடானி ஹொந்தி, ஆகாஸானஞ்சாயதனஸமாபத்தியா பஞ்சிந்த்³ரியானி ரூபஸஞ்ஞாய படிக⁴ஸஞ்ஞாய நானத்தஸஞ்ஞாய நிஸ்ஸடானி ஹொந்தி, விஞ்ஞாணஞ்சாயதனஸமாபத்தியா பஞ்சிந்த்³ரியானி ஆகாஸானஞ்சாயதனஸஞ்ஞாய நிஸ்ஸடானி ஹொந்தி, ஆகிஞ்சஞ்ஞாயதனஸமாபத்தியா பஞ்சிந்த்³ரியானி விஞ்ஞாணஞ்சாயதனஸஞ்ஞாய நிஸ்ஸடானி ஹொந்தி, நேவஸஞ்ஞானாஸஞ்ஞாயதனஸமாபத்தியா பஞ்சிந்த்³ரியானி ஆகிஞ்சஞ்ஞாயதனஸஞ்ஞாய நிஸ்ஸடானி ஹொந்தி.
193. Paṭhame jhāne pañcindriyāni nīvaraṇehi nissaṭāni honti, dutiye jhāne pañcindriyāni vitakkavicārehi nissaṭāni honti, tatiye jhāne pañcindriyāni pītiyā nissaṭāni honti, catutthe jhāne pañcindriyāni sukhadukkhehi nissaṭāni honti, ākāsānañcāyatanasamāpattiyā pañcindriyāni rūpasaññāya paṭighasaññāya nānattasaññāya nissaṭāni honti, viññāṇañcāyatanasamāpattiyā pañcindriyāni ākāsānañcāyatanasaññāya nissaṭāni honti, ākiñcaññāyatanasamāpattiyā pañcindriyāni viññāṇañcāyatanasaññāya nissaṭāni honti, nevasaññānāsaññāyatanasamāpattiyā pañcindriyāni ākiñcaññāyatanasaññāya nissaṭāni honti.
அனிச்சானுபஸ்ஸனா பஞ்சிந்த்³ரியானி நிச்சஸஞ்ஞாய நிஸ்ஸடானி ஹொந்தி, து³க்கா²னுபஸ்ஸனா பஞ்சிந்த்³ரியானி ஸுக²ஸஞ்ஞாய நிஸ்ஸடானி ஹொந்தி, அனத்தானுபஸ்ஸனா பஞ்சிந்த்³ரியானி அத்தஸஞ்ஞாய நிஸ்ஸடானி ஹொந்தி, நிப்³பி³தா³னுபஸ்ஸனாய பஞ்சிந்த்³ரியானி நந்தி³யா நிஸ்ஸடானி ஹொந்தி, விராகா³னுபஸ்ஸனாய பஞ்சிந்த்³ரியானி ராக³தோ நிஸ்ஸடானி ஹொந்தி, நிரோதா⁴னுபஸ்ஸனாய பஞ்சிந்த்³ரியானி ஸமுத³யதோ நிஸ்ஸடானி ஹொந்தி, படினிஸ்ஸக்³கா³னுபஸ்ஸனாய பஞ்சிந்த்³ரியானி ஆதா³னதோ நிஸ்ஸடானி ஹொந்தி, க²யானுபஸ்ஸனாய பஞ்சிந்த்³ரியானி க⁴னஸஞ்ஞாய நிஸ்ஸடானி ஹொந்தி , வயானுபஸ்ஸனாய பஞ்சிந்த்³ரியானி ஆயூஹனதோ நிஸ்ஸடானி ஹொந்தி, விபரிணாமானுபஸ்ஸனாய பஞ்சிந்த்³ரியானி து⁴வஸஞ்ஞாய நிஸ்ஸடானி ஹொந்தி, அனிமித்தானுபஸ்ஸனாய பஞ்சிந்த்³ரியானி நிமித்ததோ நிஸ்ஸடானி ஹொந்தி, அப்பணிஹிதானுபஸ்ஸனாய பஞ்சிந்த்³ரியானி பணிதி⁴யா நிஸ்ஸடானி ஹொந்தி, ஸுஞ்ஞதானுபஸ்ஸனாய பஞ்சிந்த்³ரியானி அபி⁴னிவேஸதோ நிஸ்ஸடானி ஹொந்தி. அதி⁴பஞ்ஞாத⁴ம்மவிபஸ்ஸனாய பஞ்சிந்த்³ரியானி ஸாராதா³னாபி⁴னிவேஸதோ நிஸ்ஸடானி ஹொந்தி, யதா²பூ⁴தஞாணத³ஸ்ஸனே பஞ்சிந்த்³ரியானி ஸம்மோஹாபி⁴னிவேஸதோ நிஸ்ஸடானி ஹொந்தி, ஆதீ³னவானுபஸ்ஸனாய பஞ்சிந்த்³ரியானி ஆலயாபி⁴னிவேஸதோ நிஸ்ஸடானி ஹொந்தி, படிஸங்கா²னுபஸ்ஸனாய பஞ்சிந்த்³ரியானி அப்படிஸங்கா²ய நிஸ்ஸடானி ஹொந்தி, விவட்டனானுபஸ்ஸனாய பஞ்சிந்த்³ரியானி ஸஞ்ஞோகா³பி⁴னிவேஸதோ நிஸ்ஸடானி ஹொந்தி.
Aniccānupassanā pañcindriyāni niccasaññāya nissaṭāni honti, dukkhānupassanā pañcindriyāni sukhasaññāya nissaṭāni honti, anattānupassanā pañcindriyāni attasaññāya nissaṭāni honti, nibbidānupassanāya pañcindriyāni nandiyā nissaṭāni honti, virāgānupassanāya pañcindriyāni rāgato nissaṭāni honti, nirodhānupassanāya pañcindriyāni samudayato nissaṭāni honti, paṭinissaggānupassanāya pañcindriyāni ādānato nissaṭāni honti, khayānupassanāya pañcindriyāni ghanasaññāya nissaṭāni honti , vayānupassanāya pañcindriyāni āyūhanato nissaṭāni honti, vipariṇāmānupassanāya pañcindriyāni dhuvasaññāya nissaṭāni honti, animittānupassanāya pañcindriyāni nimittato nissaṭāni honti, appaṇihitānupassanāya pañcindriyāni paṇidhiyā nissaṭāni honti, suññatānupassanāya pañcindriyāni abhinivesato nissaṭāni honti. Adhipaññādhammavipassanāya pañcindriyāni sārādānābhinivesato nissaṭāni honti, yathābhūtañāṇadassane pañcindriyāni sammohābhinivesato nissaṭāni honti, ādīnavānupassanāya pañcindriyāni ālayābhinivesato nissaṭāni honti, paṭisaṅkhānupassanāya pañcindriyāni appaṭisaṅkhāya nissaṭāni honti, vivaṭṭanānupassanāya pañcindriyāni saññogābhinivesato nissaṭāni honti.
ஸோதாபத்திமக்³கே³ பஞ்சிந்த்³ரியானி தி³ட்டே²கட்டே²ஹி கிலேஸேஹி நிஸ்ஸடானி ஹொந்தி, ஸகதா³கா³மிமக்³கே³ பஞ்சிந்த்³ரியானி ஓளாரிகேஹி கிலேஸேஹி நிஸ்ஸடானி ஹொந்தி, அனாகா³மிமக்³கே³ பஞ்சிந்த்³ரியானி அனுஸஹக³தேஹி கிலேஸேஹி நிஸ்ஸடானி ஹொந்தி, அரஹத்தமக்³கே³ பஞ்சிந்த்³ரியானி ஸப்³ப³கிலேஸேஹி நிஸ்ஸடானி ஹொந்தி, ஸப்³பே³ஸஞ்ஞேவ கீ²ணாஸவானங் தத்த² தத்த² பஞ்சிந்த்³ரியானி நிஸ்ஸடானி சேவ ஹொந்தி ஸுனிஸ்ஸடானி ச படிப்பஸ்ஸத்³தா⁴னி ச ஸுப்படிப்பஸ்ஸத்³தா⁴னி ச.
Sotāpattimagge pañcindriyāni diṭṭhekaṭṭhehi kilesehi nissaṭāni honti, sakadāgāmimagge pañcindriyāni oḷārikehi kilesehi nissaṭāni honti, anāgāmimagge pañcindriyāni anusahagatehi kilesehi nissaṭāni honti, arahattamagge pañcindriyāni sabbakilesehi nissaṭāni honti, sabbesaññeva khīṇāsavānaṃ tattha tattha pañcindriyāni nissaṭāni ceva honti sunissaṭāni ca paṭippassaddhāni ca suppaṭippassaddhāni ca.
இமேஹி அஸீதிஸதங் ஆகாரேஹி பஞ்சன்னங் இந்த்³ரியானங் நிஸ்ஸரணங் ஹோதி; இமேஹி அஸீதிஸதங் ஆகாரேஹி பஞ்சன்னங் இந்த்³ரியானங் நிஸ்ஸரணங் பஜானாதி.
Imehi asītisataṃ ākārehi pañcannaṃ indriyānaṃ nissaraṇaṃ hoti; imehi asītisataṃ ākārehi pañcannaṃ indriyānaṃ nissaraṇaṃ pajānāti.
ஸுத்தந்தனித்³தே³ஸோ து³தியோ.
Suttantaniddeso dutiyo.
பட²மபா⁴ணவாரோ.
Paṭhamabhāṇavāro.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 2. து³தியஸுத்தந்தனித்³தே³ஸவண்ணனா • 2. Dutiyasuttantaniddesavaṇṇanā
