| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၂. ဒုတိယသိင္ဂာလသုတ္တဝဏ္ဏနာ
12. Dutiyasiṅgālasuttavaṇṇanā
၂၃၄. ဒ္ဝာဒသမေ ကတညုတာတိ ကတဇာနနံ။ ကတဝေဒိတာတိ ကတဝိသေသဇာနနံ။ တတ္ရိဒံ ဇရသိင္ဂာလသ္သ ကတညုတာယ ဝတ္ထု – သတ္တ ကိရ ဘာတရော ခေတ္တံ ကသန္တိ။ တေသံ သဗ္ဗကနိဋ္ဌော ခေတ္တပရိယန္တေ ဌတ္ဝာ ဂာဝော ရက္ခတိ။ အထေကံ ဇရသိင္ဂာလံ အဇဂရော ဂဏ္ဟိ, သော တံ ဒိသ္ဝာ ယဋ္ဌိယာ ပောထေတ္ဝာ ဝိသ္သဇ္ဇာပေသိ။ အဇဂရော သိင္ဂာလံ ဝိသ္သဇ္ဇေတ္ဝာ တမေဝ ဂဏ္ဟိ။ သိင္ဂာလော စိန္တေသိ – ‘‘မယ္ဟံ ဣမိနာ ဇီဝိတံ ဒိန္နံ, အဟမ္ပိ ဣမသ္သ ဒသ္သာမီ’’တိ ယာဂုဃဋသ္သ ဥပရိ ဌပိတံ ဝာသိံ မုခေန ဍံသိတ္ဝာ တသ္သ သန္တိကံ အဂမာသိ။ ဣတရေ ဘာတရော ဒိသ္ဝာ, ‘‘သိင္ဂာလော ဝာသိံ ဟရတီ’’တိ အနုဗန္ဓိံသု။ သော တေဟိ ဒိဋ္ဌဘာဝံ ဉတ္ဝာ ဝာသိံ တသ္သ သန္တိကေ ဆဍ္ဍေတ္ဝာ ပလာယိ။ ဣတရေ အာဂန္တ္ဝာ ကနိဋ္ဌံ အဇဂရေန ဂဟိတံ ဒိသ္ဝာ ဝာသိယာ အဇဂရံ ဆိန္ဒိတ္ဝာ တံ ဂဟေတ္ဝာ အဂမံသု။ ဧဝံ ဇရသိင္ဂာလေ သိယာ ယာ ကာစိ ကတညုတာ ကတဝေဒိတာ။ သက္ယပုတ္တိယပဋိညေတိ ဣဒမ္ပိ ဒေဝဒတ္တသ္သ အာစာရမေဝ သန္ဓာယ ဝုတ္တန္တိ။ ဒ္ဝာဒသမံ။
234. Dvādasame kataññutāti katajānanaṃ. Kataveditāti katavisesajānanaṃ. Tatridaṃ jarasiṅgālassa kataññutāya vatthu – satta kira bhātaro khettaṃ kasanti. Tesaṃ sabbakaniṭṭho khettapariyante ṭhatvā gāvo rakkhati. Athekaṃ jarasiṅgālaṃ ajagaro gaṇhi, so taṃ disvā yaṭṭhiyā pothetvā vissajjāpesi. Ajagaro siṅgālaṃ vissajjetvā tameva gaṇhi. Siṅgālo cintesi – ‘‘mayhaṃ iminā jīvitaṃ dinnaṃ, ahampi imassa dassāmī’’ti yāgughaṭassa upari ṭhapitaṃ vāsiṃ mukhena ḍaṃsitvā tassa santikaṃ agamāsi. Itare bhātaro disvā, ‘‘siṅgālo vāsiṃ haratī’’ti anubandhiṃsu. So tehi diṭṭhabhāvaṃ ñatvā vāsiṃ tassa santike chaḍḍetvā palāyi. Itare āgantvā kaniṭṭhaṃ ajagarena gahitaṃ disvā vāsiyā ajagaraṃ chinditvā taṃ gahetvā agamaṃsu. Evaṃ jarasiṅgāle siyā yā kāci kataññutā kataveditā. Sakyaputtiyapaṭiññeti idampi devadattassa ācārameva sandhāya vuttanti. Dvādasamaṃ.
ဩပမ္မသံယုတ္တဝဏ္ဏနာ နိဋ္ဌိတာ။
Opammasaṃyuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၂. ဒုတိယသိင္ဂာလသုတ္တံ • 12. Dutiyasiṅgālasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၂. ဒုတိယသိင္ဂာလသုတ္တဝဏ္ဏနာ • 12. Dutiyasiṅgālasuttavaṇṇanā
