| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
६. दुतियसीलसुत्तं
6. Dutiyasīlasuttaṃ
३३. वुत्तञ्हेतं भगवता, वुत्तमरहताति मे सुतं –
33. Vuttañhetaṃ bhagavatā, vuttamarahatāti me sutaṃ –
‘‘द्वीहि, भिक्खवे, धम्मेहि समन्नागतो पुग्गलो यथाभतं निक्खित्तो एवं सग्गे। कतमेहि द्वीहि ? भद्दकेन च सीलेन, भद्दिकाय च दिट्ठिया। इमेहि खो, भिक्खवे, द्वीहि धम्मेहि समन्नागतो पुग्गलो यथाभतं निक्खित्तो एवं सग्गे’’ति। एतमत्थं भगवा अवोच। तत्थेतं इति वुच्चति –
‘‘Dvīhi, bhikkhave, dhammehi samannāgato puggalo yathābhataṃ nikkhitto evaṃ sagge. Katamehi dvīhi ? Bhaddakena ca sīlena, bhaddikāya ca diṭṭhiyā. Imehi kho, bhikkhave, dvīhi dhammehi samannāgato puggalo yathābhataṃ nikkhitto evaṃ sagge’’ti. Etamatthaṃ bhagavā avoca. Tatthetaṃ iti vuccati –
‘‘भद्दकेन च सीलेन, भद्दिकाय च दिट्ठिया।
‘‘Bhaddakena ca sīlena, bhaddikāya ca diṭṭhiyā;
एतेहि द्वीहि धम्मेहि, यो समन्नागतो नरो।
Etehi dvīhi dhammehi, yo samannāgato naro;
कायस्स भेदा सप्पञ्ञो, सग्गं सो उपपज्जती’’ति॥
Kāyassa bhedā sappañño, saggaṃ so upapajjatī’’ti.
अयम्पि अत्थो वुत्तो भगवता, इति मे सुतन्ति। छट्ठं।
Ayampi attho vutto bhagavatā, iti me sutanti. Chaṭṭhaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ६. दुतियसीलसुत्तवण्णना • 6. Dutiyasīlasuttavaṇṇanā
