| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
७. आतापीसुत्तं
7. Ātāpīsuttaṃ
३४. वुत्तञ्हेतं भगवता, वुत्तमरहताति मे सुतं –
34. Vuttañhetaṃ bhagavatā, vuttamarahatāti me sutaṃ –
‘‘अनातापी, भिक्खवे, भिक्खु अनोत्तापी 1 अभब्बो सम्बोधाय, अभब्बो निब्बानाय, अभब्बो अनुत्तरस्स योगक्खेमस्स अधिगमाय। आतापी च खो, भिक्खवे, भिक्खु ओत्तापी 2 भब्बो सम्बोधाय, भब्बो निब्बानाय, भब्बो अनुत्तरस्स योगक्खेमस्स अधिगमाया’’ति। एतमत्थं भगवा अवोच । तत्थेतं इति वुच्चति –
‘‘Anātāpī, bhikkhave, bhikkhu anottāpī 3 abhabbo sambodhāya, abhabbo nibbānāya, abhabbo anuttarassa yogakkhemassa adhigamāya. Ātāpī ca kho, bhikkhave, bhikkhu ottāpī 4 bhabbo sambodhāya, bhabbo nibbānāya, bhabbo anuttarassa yogakkhemassa adhigamāyā’’ti. Etamatthaṃ bhagavā avoca . Tatthetaṃ iti vuccati –
‘‘अनातापी अनोत्तापी, कुसीतो हीनवीरियो।
‘‘Anātāpī anottāpī, kusīto hīnavīriyo;
यो थीनमिद्धबहुलो, अहिरीको अनादरो।
Yo thīnamiddhabahulo, ahirīko anādaro;
अभब्बो तादिसो भिक्खु, फुट्ठुं सम्बोधिमुत्तमं॥
Abhabbo tādiso bhikkhu, phuṭṭhuṃ sambodhimuttamaṃ.
‘‘यो च सतिमा निपको झायी, आतापी ओत्तापी च अप्पमत्तो।
‘‘Yo ca satimā nipako jhāyī, ātāpī ottāpī ca appamatto;
संयोजनं जातिजराय छेत्वा, इधेव सम्बोधिमनुत्तरं फुसे’’ति॥
Saṃyojanaṃ jātijarāya chetvā, idheva sambodhimanuttaraṃ phuse’’ti.
अयम्पि अत्थो वुत्तो भगवता, इति मे सुतन्ति। सत्तमं।
Ayampi attho vutto bhagavatā, iti me sutanti. Sattamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ७. आतापीसुत्तवण्णना • 7. Ātāpīsuttavaṇṇanā
