| Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
១១. ទុតិយសង្ឃភេទសិក្ខាបទវណ្ណនា
11. Dutiyasaṅghabhedasikkhāpadavaṇṇanā
៤១៧-៨. តេន សមយេន ពុទ្ធោ ភគវាតិ ទុតិយសង្ឃភេទសិក្ខាបទំ។ តត្ថ អនុវត្តកាតិ តស្ស ទិដ្ឋិខន្តិរុចិគ្គហណេន អនុបដិបជ្ជនកា។ វគ្គំ អសាមគ្គិបក្ខិយវចនំ វទន្តីតិ វគ្គវាទកា។ បទភាជនេ បន ‘‘តស្ស វណ្ណាយ បក្ខាយ ឋិតា ហោន្តី’’តិ វុត្តំ, តស្ស សង្ឃភេទាយ បរក្កមន្តស្ស វណ្ណត្ថាយ ច បក្ខវុឌ្ឍិអត្ថាយ ច ឋិតាតិ អត្ថោ។ យេ ហិ វគ្គវាទកា, តេ និយមេន ឦទិសា ហោន្តិ, តស្មា ឯវំ វុត្តំ។ យស្មា បន តិណ្ណំ ឧទ្ធំ កម្មារហា ន ហោន្តិ, ន ហិ សង្ឃោ សង្ឃស្ស កម្មំ ករោតិ, តស្មា ឯកោ វា ទ្វេ វា តយោ វាតិ វុត្តំ។
417-8.Tena samayena buddho bhagavāti dutiyasaṅghabhedasikkhāpadaṃ. Tattha anuvattakāti tassa diṭṭhikhantiruciggahaṇena anupaṭipajjanakā. Vaggaṃ asāmaggipakkhiyavacanaṃ vadantīti vaggavādakā. Padabhājane pana ‘‘tassa vaṇṇāya pakkhāya ṭhitā hontī’’ti vuttaṃ, tassa saṅghabhedāya parakkamantassa vaṇṇatthāya ca pakkhavuḍḍhiatthāya ca ṭhitāti attho. Ye hi vaggavādakā, te niyamena īdisā honti, tasmā evaṃ vuttaṃ. Yasmā pana tiṇṇaṃ uddhaṃ kammārahā na honti, na hi saṅgho saṅghassa kammaṃ karoti, tasmā eko vā dve vā tayo vāti vuttaṃ.
ជានាតិ នោតិ អម្ហាកំ ឆន្ទាទីនិ ជានាតិ។ ភាសតីតិ ‘‘ឯវំ ករោមា’’តិ អម្ហេហិ សទ្ធិំ ភាសតិ។ អម្ហាកម្បេតំ ខមតីតិ យំ សោ ករោតិ, ឯតំ អម្ហាកម្បិ រុច្ចតិ។
Jānātinoti amhākaṃ chandādīni jānāti. Bhāsatīti ‘‘evaṃ karomā’’ti amhehi saddhiṃ bhāsati. Amhākampetaṃ khamatīti yaṃ so karoti, etaṃ amhākampi ruccati.
សមេតាយស្មន្តានំ សង្ឃេនាតិ អាយស្មន្តានំ ចិត្តំ សង្ឃេន សទ្ធិំ សមេតុ សមាគច្ឆតុ, ឯកីភាវំ យាតូតិ វុត្តំ ហោតិ។ សេសមេត្ថ បឋមសិក្ខាបទេ វុត្តនយត្តា ឧត្តានត្ថត្តា ច បាកដមេវ។
Sametāyasmantānaṃ saṅghenāti āyasmantānaṃ cittaṃ saṅghena saddhiṃ sametu samāgacchatu, ekībhāvaṃ yātūti vuttaṃ hoti. Sesamettha paṭhamasikkhāpade vuttanayattā uttānatthattā ca pākaṭameva.
សមុដ្ឋានាទីនិបិ បឋមសិក្ខាបទសទិសានេវាតិ។
Samuṭṭhānādīnipi paṭhamasikkhāpadasadisānevāti.
ទុតិយសង្ឃភេទសិក្ខាបទវណ្ណនា និដ្ឋិតា។
Dutiyasaṅghabhedasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ១១. ភេទានុវត្តកសិក្ខាបទំ • 11. Bhedānuvattakasikkhāpadaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ១១. ទុតិយសង្ឃភេទសិក្ខាបទវណ្ណនា • 11. Dutiyasaṅghabhedasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ១១. ទុតិយសង្ឃភេទសិក្ខាបទវណ្ណនា • 11. Dutiyasaṅghabhedasikkhāpadavaṇṇanā
