| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၆. ဒုတိယသဟသေယ္ယသိက္ခာပဒဝဏ္ဏနာ
6. Dutiyasahaseyyasikkhāpadavaṇṇanā
မနုသ္သိတ္ထိယာတိ ဇီဝမာနကမနုသ္သိတ္ထိယာ။ ‘‘မတိတ္ထီ ပန ကိဉ္စာပိ ပာရာဇိကဝတ္ထုဘူတာ, အနုပာဒိန္နပက္ခေ ပန ဌိတတ္တာ သဟသေယ္ယာပတ္တိံ န ကရောတီ’’တိ (ဝဇိရ. ဋီ. ပာစိတ္တိယ ၅၅) ဝဒန္တိ။ အဒိသ္သမာနရူပာဟိ ပန ယက္ခိပေတီဟိ, မေထုနသ္သ အဝတ္ထုဘူတာယ စ တိရစ္ဆာနဂတိတ္ထိယာ အနာပတ္တိ။ ပဌမဒိဝသေပီတိ ပဌမသ္မိံ ဝိယ သိက္ခာပဒေ န စတုတ္ထေယေဝ ဒိဝသေ, အထ ခော ဣဓ ပဌမဒိဝသေပီတိ အတ္ထော။ ဣမိနာ ဣဓ ဒိဝသပရိစ္ဆေဒော နတ္ထီတိ ဒသ္သေတိ။ အင္ဂေသု ပန ပာစိတ္တိယဝတ္ထုကသေနာသနံ, တတ္ထ မာတုဂာမေန သဟ နိပဇ္ဇနံ, သူရိယတ္ထင္ဂမနန္တိ တီဏိ အင္ဂာနီတိ အယမ္ပိ ဝိသေသော ဒဋ္ဌဗ္ဗော။
Manussitthiyāti jīvamānakamanussitthiyā. ‘‘Matitthī pana kiñcāpi pārājikavatthubhūtā, anupādinnapakkhe pana ṭhitattā sahaseyyāpattiṃ na karotī’’ti (vajira. ṭī. pācittiya 55) vadanti. Adissamānarūpāhi pana yakkhipetīhi, methunassa avatthubhūtāya ca tiracchānagatitthiyā anāpatti. Paṭhamadivasepīti paṭhamasmiṃ viya sikkhāpade na catuttheyeva divase, atha kho idha paṭhamadivasepīti attho. Iminā idha divasaparicchedo natthīti dasseti. Aṅgesu pana pācittiyavatthukasenāsanaṃ, tattha mātugāmena saha nipajjanaṃ, sūriyatthaṅgamananti tīṇi aṅgānīti ayampi viseso daṭṭhabbo.
ဒုတိယသဟသေယ္ယသိက္ခာပဒဝဏ္ဏနာ နိဋ္ဌိတာ။
Dutiyasahaseyyasikkhāpadavaṇṇanā niṭṭhitā.
