| Library / Tipiṭaka / តិបិដក • Tipiṭaka / វិមានវត្ថុ-អដ្ឋកថា • Vimānavatthu-aṭṭhakathā |
២. ទុតិយបីឋវិមានវណ្ណនា
2. Dutiyapīṭhavimānavaṇṇanā
បីឋំ តេ វេឡុរិយមយន្តិ ទុតិយបីឋវិមានំ។ តស្ស អដ្ឋុប្បត្តិ ច អត្ថវណ្ណនា ច បឋមេ វុត្តនយេនេវ វេទិតព្ពា។ អយំ បន វិសេសោ – សាវត្ថិវាសិនី កិរ ឯកា ឥត្ថី អត្តនោ គេហំ បិណ្ឌាយ បវិដ្ឋំ ឯកំ ថេរំ បស្សិត្វា បសន្នចិត្តា តស្ស អាសនំ ទេន្តី អត្តនោ បីឋំ ឧបរិ នីលវត្ថេន អត្ថរិត្វា អទាសិ។ តេន តស្សា ទេវលោកេ និព្ពត្តាយ វេឡុរិយមយំ បល្លង្កវិមានំ និព្ពត្តំ។ តេន វុត្តំ –
Pīṭhaṃte veḷuriyamayanti dutiyapīṭhavimānaṃ. Tassa aṭṭhuppatti ca atthavaṇṇanā ca paṭhame vuttanayeneva veditabbā. Ayaṃ pana viseso – sāvatthivāsinī kira ekā itthī attano gehaṃ piṇḍāya paviṭṭhaṃ ekaṃ theraṃ passitvā pasannacittā tassa āsanaṃ dentī attano pīṭhaṃ upari nīlavatthena attharitvā adāsi. Tena tassā devaloke nibbattāya veḷuriyamayaṃ pallaṅkavimānaṃ nibbattaṃ. Tena vuttaṃ –
៨.
8.
‘‘បីឋំ តេ វេឡុរិយមយំ ឧឡារំ, មនោជវំ គច្ឆតិ យេនកាមំ;
‘‘Pīṭhaṃ te veḷuriyamayaṃ uḷāraṃ, manojavaṃ gacchati yenakāmaṃ;
អលង្កតេ មល្យធរេ សុវត្ថេ, ឱភាសសិ វិជ្ជុរិវព្ភ កូដំ។
Alaṅkate malyadhare suvatthe, obhāsasi vijjurivabbha kūṭaṃ.
៩.
9.
‘‘កេន តេតាទិសោ វណ្ណោ, កេន តេ ឥធ មិជ្ឈតិ;
‘‘Kena tetādiso vaṇṇo, kena te idha mijjhati;
ឧប្បជ្ជន្តិ ច តេ ភោគា, យេ កេចិ មនសោ បិយា។
Uppajjanti ca te bhogā, ye keci manaso piyā.
១០.
10.
‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;
‘‘Pucchāmi taṃ devi mahānubhāve, manussabhūtā kimakāsi puññaṃ;
កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ។
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
១១.
11.
‘‘សា ទេវតា អត្តមនា, មោគ្គល្លានេន បុច្ឆិតា;
‘‘Sā devatā attamanā, moggallānena pucchitā;
បញ្ហំ បុដ្ឋា វិយាកាសិ, យស្ស កម្មស្សិទំ ផលំ’’។
Pañhaṃ puṭṭhā viyākāsi, yassa kammassidaṃ phalaṃ’’.
១២.
12.
‘‘អហំ មនុស្សេសុ មនុស្សភូតា, អព្ភាគតានាសនកំ អទាសិំ;
‘‘Ahaṃ manussesu manussabhūtā, abbhāgatānāsanakaṃ adāsiṃ;
អភិវាទយិំ អញ្ជលិកំ អកាសិំ, យថានុភាវញ្ច អទាសិ ទានំ។
Abhivādayiṃ añjalikaṃ akāsiṃ, yathānubhāvañca adāsi dānaṃ.
១៣.
13.
‘‘តេន មេតាទិសោ វណ្ណោ, តេន មេ ឥធ មិជ្ឈតិ;
‘‘Tena metādiso vaṇṇo, tena me idha mijjhati;
ឧប្បជ្ជន្តិ ច មេ ភោគា, យេ កេចិ មនសោ បិយា។
Uppajjanti ca me bhogā, ye keci manaso piyā.
១៤.
14.
‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;
‘‘Akkhāmi te bhikkhu mahānubhāva, manussabhūtā yamakāsi puññaṃ;
តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ។
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
៨. តត្ថ វេឡុរិយមយន្តិ វេឡុរិយមណិមយំ។ វេឡុរិយមណិ នាម វិឡូរបព្ពតស្ស វិឡូរគាមស្ស ច អវិទូរេ ឧប្បជ្ជនកមណិ។ តស្ស កិរ វិឡូរគាមដ្ឋានេ អាករោ, វិឡូរស្ស បន អវិទូរេ ភវត្តា វេឡុរិយន្តេវ បញ្ញាយិត្ថ។ តំសទិសវណ្ណនិភតាយ ទេវលោកេបិស្ស តថេវ នាមំ ជាតំ យថា តំ មនុស្សលោកេ លទ្ធនាមវសេនេវ ទេវលោកេ ទេវបុត្តានំ។ តំ បន មយូរគីវវណ្ណំ វា ហោតិ, វាយសបត្តវណ្ណំ វា, សិនិទ្ធវេណុបត្តវណ្ណំ វា។ ឥធ បន មយូរគីវវណ្ណំ វេទិតព្ពំ។ សេសំ សព្ពំ បឋមបីឋវិមានេ វុត្តសទិសមេវាតិ។
8. Tattha veḷuriyamayanti veḷuriyamaṇimayaṃ. Veḷuriyamaṇi nāma viḷūrapabbatassa viḷūragāmassa ca avidūre uppajjanakamaṇi. Tassa kira viḷūragāmaṭṭhāne ākaro, viḷūrassa pana avidūre bhavattā veḷuriyanteva paññāyittha. Taṃsadisavaṇṇanibhatāya devalokepissa tatheva nāmaṃ jātaṃ yathā taṃ manussaloke laddhanāmavaseneva devaloke devaputtānaṃ. Taṃ pana mayūragīvavaṇṇaṃ vā hoti, vāyasapattavaṇṇaṃ vā, siniddhaveṇupattavaṇṇaṃ vā. Idha pana mayūragīvavaṇṇaṃ veditabbaṃ. Sesaṃ sabbaṃ paṭhamapīṭhavimāne vuttasadisamevāti.
ទុតិយបីឋវិមានវណ្ណនា និដ្ឋិតា។
Dutiyapīṭhavimānavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / វិមានវត្ថុបាឡិ • Vimānavatthupāḷi / ២. ទុតិយបីឋវិមានវត្ថុ • 2. Dutiyapīṭhavimānavatthu
