| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१०. दुतियपज्जुन्नधीतुसुत्तं
10. Dutiyapajjunnadhītusuttaṃ
४०. एवं मे सुतं – एकं समयं भगवा वेसालियं विहरति महावने कूटागारसालायं। अथ खो चूळकोकनदा 1 पज्जुन्नस्स धीता अभिक्कन्ताय रत्तिया अभिक्कन्तवण्णा केवलकप्पं महावनं ओभासेत्वा येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं अट्ठासि। एकमन्तं ठिता खो सा देवता चूळकोकनदा पज्जुन्नस्स धीता भगवतो सन्तिके इमा गाथायो अभासि –
40. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho cūḷakokanadā 2 pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā cūḷakokanadā pajjunnassa dhītā bhagavato santike imā gāthāyo abhāsi –
‘‘इधागमा विज्जुपभासवण्णा, कोकनदा पज्जुन्नस्स धीता।
‘‘Idhāgamā vijjupabhāsavaṇṇā, kokanadā pajjunnassa dhītā;
बुद्धञ्च धम्मञ्च नमस्समाना, गाथाचिमा अत्थवती अभासि॥
Buddhañca dhammañca namassamānā, gāthācimā atthavatī abhāsi.
‘‘बहुनापि खो तं विभजेय्यं, परियायेन तादिसो धम्मो।
‘‘Bahunāpi kho taṃ vibhajeyyaṃ, pariyāyena tādiso dhammo;
संखित्तमत्थं 3 लपयिस्सामि, यावता मे मनसा परियत्तं॥
Saṃkhittamatthaṃ 4 lapayissāmi, yāvatā me manasā pariyattaṃ.
‘‘पापं न कयिरा वचसा मनसा,
‘‘Pāpaṃ na kayirā vacasā manasā,
कायेन वा किञ्चन सब्बलोके।
Kāyena vā kiñcana sabbaloke;
कामे पहाय सतिमा सम्पजानो,
Kāme pahāya satimā sampajāno,
दुक्खं न सेवेथ अनत्थसंहित’’न्ति॥
Dukkhaṃ na sevetha anatthasaṃhita’’nti.
सतुल्लपकायिकवग्गो चतुत्थो।
Satullapakāyikavaggo catuttho.
तस्सुद्दानं –
Tassuddānaṃ –
सब्भिमच्छरिना साधु, न सन्तुज्झानसञ्ञिनो।
Sabbhimaccharinā sādhu, na santujjhānasaññino;
सद्धा समयो सकलिकं, उभो पज्जुन्नधीतरोति॥
Saddhā samayo sakalikaṃ, ubho pajjunnadhītaroti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १०. दुतियपज्जुन्नधीतुसुत्तवण्णना • 10. Dutiyapajjunnadhītusuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १०. दुतियपज्जुन्नधीतुसुत्तवण्णना • 10. Dutiyapajjunnadhītusuttavaṇṇanā
