| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
५. आदित्तवग्गो
5. Ādittavaggo
१. आदित्तसुत्तं
1. Ādittasuttaṃ
४१. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे। अथ खो अञ्ञतरा देवता अभिक्कन्ताय रत्तिया अभिक्कन्तवण्णा केवलकप्पं जेतवनं ओभासेत्वा येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं अट्ठासि। एकमन्तं ठिता खो सा देवता भगवतो सन्तिके इमा गाथायो अभासि –
41. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavato santike imā gāthāyo abhāsi –
‘‘आदित्तस्मिं अगारस्मिं, यं नीहरति भाजनं।
‘‘Ādittasmiṃ agārasmiṃ, yaṃ nīharati bhājanaṃ;
तं तस्स होति अत्थाय, नो च यं तत्थ डय्हति॥
Taṃ tassa hoti atthāya, no ca yaṃ tattha ḍayhati.
‘‘एवं आदित्तको लोको, जराय मरणेन च।
‘‘Evaṃ ādittako loko, jarāya maraṇena ca;
नीहरेथेव दानेन, दिन्नं होति सुनीहतं॥
Nīharetheva dānena, dinnaṃ hoti sunīhataṃ.
‘‘दिन्नं सुखफलं होति, नादिन्नं होति तं तथा।
‘‘Dinnaṃ sukhaphalaṃ hoti, nādinnaṃ hoti taṃ tathā;
चोरा हरन्ति राजानो, अग्गि डहति नस्सति॥
Corā haranti rājāno, aggi ḍahati nassati.
‘‘अथ अन्तेन जहति, सरीरं सपरिग्गहं।
‘‘Atha antena jahati, sarīraṃ sapariggahaṃ;
एतदञ्ञाय मेधावी, भुञ्जेथ च ददेथ च।
Etadaññāya medhāvī, bhuñjetha ca dadetha ca;
दत्वा च भुत्वा च यथानुभावं।
Datvā ca bhutvā ca yathānubhāvaṃ;
अनिन्दितो सग्गमुपेति ठान’’न्ति॥
Anindito saggamupeti ṭhāna’’nti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १. आदित्तसुत्तवण्णना • 1. Ādittasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १. आदित्तसुत्तवण्णना • 1. Ādittasuttavaṇṇanā
