| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. ဒုတိယနိဒာနသုတ္တဝဏ္ဏနာ
10. Dutiyanidānasuttavaṇṇanā
၁၁၃. ဒသမေ ကမ္မာနန္တိ ဝဋ္ဋဂာမိကမ္မာနမေဝ။ ဆန္ဒရာဂဋ္ဌာနိယေတိ ဆန္ဒရာဂသ္သ ကာရဏဘူတေ။ အာရဗ္ဘာတိ အာဂမ္မ သန္ဓာယ ပဋိစ္စ။ ဆန္ဒောတိ တဏ္ဟာဆန္ဒော။ ယော စေတသော သာရာဂောတိ ယော စိတ္တသ္သ ရာဂော ရဇ္ဇနာ ရဇ္ဇိတတ္တံ, ဧတမဟံ သံယောဇနံ ဝဒာမိ, ဗန္ဓနံ ဝဒာမီတိ အတ္ထော။ သုက္ကပက္ခေ ကမ္မာနန္တိ ဝိဝဋ္ဋဂာမိကမ္မာနံ။ တဒဘိနိဝတ္တေတီတိ တံ အဘိနိဝတ္တေတိ။ ယဒာ ဝာ တေန ဝိပာကော ဉာတော ဟောတိ ဝိဒိတော, တဒာ တေ စေဝ ဓမ္မေ တဉ္စ ဝိပာကံ အဘိနိဝတ္တေတိ။ ဣမိနာ စ ပဒေန ဝိပသ္သနာ ကထိတာ, တဒဘိနိဝတ္တေတ္ဝာတိ ဣမိနာ မဂ္ဂော။ စေတသာ အဘိနိဝိဇ္ဈိတ္ဝာတိ ဣမိနာ စ မဂ္ဂောဝ။ ပညာယ အတိဝိဇ္ဈ ပသ္သတီတိ သဟ ဝိပသ္သနာယ မဂ္ဂပညာယ နိဗ္ဗိဇ္ဈိတ္ဝာ ပသ္သတိ။ ဧဝံ သဗ္ဗတ္ထ အတ္ထော ဝေဒိတဗ္ဗော။ ဣမသ္မိံ ပန သုတ္တေ ဝဋ္ဋဝိဝဋ္ဋံ ကထိတန္တိ။
113. Dasame kammānanti vaṭṭagāmikammānameva. Chandarāgaṭṭhāniyeti chandarāgassa kāraṇabhūte. Ārabbhāti āgamma sandhāya paṭicca. Chandoti taṇhāchando. Yo cetaso sārāgoti yo cittassa rāgo rajjanā rajjitattaṃ, etamahaṃ saṃyojanaṃ vadāmi, bandhanaṃ vadāmīti attho. Sukkapakkhe kammānanti vivaṭṭagāmikammānaṃ. Tadabhinivattetīti taṃ abhinivatteti. Yadā vā tena vipāko ñāto hoti vidito, tadā te ceva dhamme tañca vipākaṃ abhinivatteti. Iminā ca padena vipassanā kathitā, tadabhinivattetvāti iminā maggo. Cetasā abhinivijjhitvāti iminā ca maggova. Paññāya ativijjha passatīti saha vipassanāya maggapaññāya nibbijjhitvā passati. Evaṃ sabbattha attho veditabbo. Imasmiṃ pana sutte vaṭṭavivaṭṭaṃ kathitanti.
သမ္ဗောဓဝဂ္ဂော ပဌမော။
Sambodhavaggo paṭhamo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. ဒုတိယနိဒာနသုတ္တံ • 10. Dutiyanidānasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. ဒုတိယနိဒာနသုတ္တဝဏ္ဏနာ • 10. Dutiyanidānasuttavaṇṇanā
