| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
६. दुतियएसनासुत्तं
6. Dutiyaesanāsuttaṃ
५५. वुत्तञ्हेतं भगवता, वुत्तमरहताति मे सुतं –
55. Vuttañhetaṃ bhagavatā, vuttamarahatāti me sutaṃ –
‘‘तिस्सो इमा, भिक्खवे, एसना। कतमा तिस्सो? कामेसना, भवेसना, ब्रह्मचरियेसना – इमा खो, भिक्खवे, तिस्सो एसना’’ति। एतमत्थं भगवा अवोच। तत्थेतं इति वुच्चति –
‘‘Tisso imā, bhikkhave, esanā. Katamā tisso? Kāmesanā, bhavesanā, brahmacariyesanā – imā kho, bhikkhave, tisso esanā’’ti. Etamatthaṃ bhagavā avoca. Tatthetaṃ iti vuccati –
‘‘कामेसना भवेसना, ब्रह्मचरियेसना सह।
‘‘Kāmesanā bhavesanā, brahmacariyesanā saha;
इति सच्चपरामासो, दिट्ठिट्ठाना समुस्सया॥
Iti saccaparāmāso, diṭṭhiṭṭhānā samussayā.
‘‘सब्बरागविरत्तस्स, तण्हक्खयविमुत्तिनो।
‘‘Sabbarāgavirattassa, taṇhakkhayavimuttino;
एसना पटिनिस्सट्ठा, दिट्ठिट्ठाना समूहता।
Esanā paṭinissaṭṭhā, diṭṭhiṭṭhānā samūhatā;
एसनानं खया भिक्खु, निरासो अकथंकथी’’ति॥
Esanānaṃ khayā bhikkhu, nirāso akathaṃkathī’’ti.
अयम्पि अत्थो वुत्तो भगवता, इति मे सुतन्ति। छट्ठं।
Ayampi attho vutto bhagavatā, iti me sutanti. Chaṭṭhaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ६. दुतियएसनासुत्तवण्णना • 6. Dutiyaesanāsuttavaṇṇanā
