| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
७. पठमआसवसुत्तं
7. Paṭhamaāsavasuttaṃ
५६. वुत्तञ्हेतं भगवता, वुत्तमरहताति मे सुतं –
56. Vuttañhetaṃ bhagavatā, vuttamarahatāti me sutaṃ –
‘‘तयोमे, भिक्खवे, आसवा। कतमे तयो? कामासवो, भवासवो, अविज्जासवो – इमे खो, भिक्खवे, तयो आसवा’’ति। एतमत्थं भगवा अवोच। तत्थेतं इति वुच्चति –
‘‘Tayome, bhikkhave, āsavā. Katame tayo? Kāmāsavo, bhavāsavo, avijjāsavo – ime kho, bhikkhave, tayo āsavā’’ti. Etamatthaṃ bhagavā avoca. Tatthetaṃ iti vuccati –
‘‘समाहितो सम्पजानो, सतो बुद्धस्स सावको।
‘‘Samāhito sampajāno, sato buddhassa sāvako;
आसवे च पजानाति, आसवानञ्च सम्भवं॥
Āsave ca pajānāti, āsavānañca sambhavaṃ.
‘‘यत्थ चेता निरुज्झन्ति, मग्गञ्च खयगामिनं।
‘‘Yattha cetā nirujjhanti, maggañca khayagāminaṃ;
आसवानं खया भिक्खु, निच्छातो परिनिब्बुतो’’ति॥
Āsavānaṃ khayā bhikkhu, nicchāto parinibbuto’’ti.
अयम्पि अत्थो वुत्तो भगवता, इति मे सुतन्ति। सत्तमं।
Ayampi attho vutto bhagavatā, iti me sutanti. Sattamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ७-८. आसवसुत्तद्वयवण्णना • 7-8. Āsavasuttadvayavaṇṇanā
