| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৬. দুতিযএসনাসুত্তং
6. Dutiyaesanāsuttaṃ
৫৫. ৰুত্তঞ্হেতং ভগৰতা, ৰুত্তমরহতাতি মে সুতং –
55. Vuttañhetaṃ bhagavatā, vuttamarahatāti me sutaṃ –
‘‘তিস্সো ইমা, ভিক্খৰে, এসনা। কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Tisso imā, bhikkhave, esanā. Katamā tisso? Kāmesanā, bhavesanā, brahmacariyesanā – imā kho, bhikkhave, tisso esanā’’ti. Etamatthaṃ bhagavā avoca. Tatthetaṃ iti vuccati –
‘‘কামেসনা ভৰেসনা, ব্রহ্মচরিযেসনা সহ।
‘‘Kāmesanā bhavesanā, brahmacariyesanā saha;
ইতি সচ্চপরামাসো, দিট্ঠিট্ঠানা সমুস্সযা॥
Iti saccaparāmāso, diṭṭhiṭṭhānā samussayā.
‘‘সব্বরাগৰিরত্তস্স, তণ্হক্খযৰিমুত্তিনো।
‘‘Sabbarāgavirattassa, taṇhakkhayavimuttino;
এসনা পটিনিস্সট্ঠা, দিট্ঠিট্ঠানা সমূহতা।
Esanā paṭinissaṭṭhā, diṭṭhiṭṭhānā samūhatā;
এসনানং খযা ভিক্খু, নিরাসো অকথংকথী’’তি॥
Esanānaṃ khayā bhikkhu, nirāso akathaṃkathī’’ti.
অযম্পি অত্থো ৰুত্তো ভগৰতা, ইতি মে সুতন্তি। ছট্ঠং।
Ayampi attho vutto bhagavatā, iti me sutanti. Chaṭṭhaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৬. দুতিযএসনাসুত্তৰণ্ণনা • 6. Dutiyaesanāsuttavaṇṇanā
