| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. ဒုတိယအညတရဘိက္ခုသုတ္တံ
7. Dutiyaaññatarabhikkhusuttaṃ
၇. သာဝတ္ထိနိဒာနံ။ အထ ခော အညတရော ဘိက္ခု ယေန ဘဂဝာ တေနုပသင္ကမိ။ပေ.။ ဧကမန္တံ နိသိန္နော ခော သော ဘိက္ခု ဘဂဝန္တံ ဧတဒဝောစ –
7. Sāvatthinidānaṃ. Atha kho aññataro bhikkhu yena bhagavā tenupasaṅkami…pe… ekamantaṃ nisinno kho so bhikkhu bhagavantaṃ etadavoca –
‘‘‘ရာဂဝိနယော ဒောသဝိနယော မောဟဝိနယော’တိ, ဘန္တေ, ဝုစ္စတိ။ ကိသ္သ နု ခော ဧတံ, ဘန္တေ, အဓိဝစနံ – ‘ရာဂဝိနယော ဒောသဝိနယော မောဟဝိနယော’’’တိ? ‘‘နိဗ္ဗာနဓာတုယာ ခော ဧတံ, ဘိက္ခု, အဓိဝစနံ – ‘ရာဂဝိနယော ဒောသဝိနယော မောဟဝိနယော’တိ။ အာသဝာနံ ခယော တေန ဝုစ္စတီ’’တိ။
‘‘‘Rāgavinayo dosavinayo mohavinayo’ti, bhante, vuccati. Kissa nu kho etaṃ, bhante, adhivacanaṃ – ‘rāgavinayo dosavinayo mohavinayo’’’ti? ‘‘Nibbānadhātuyā kho etaṃ, bhikkhu, adhivacanaṃ – ‘rāgavinayo dosavinayo mohavinayo’ti. Āsavānaṃ khayo tena vuccatī’’ti.
ဧဝံ ဝုတ္တေ သော ဘိက္ခု ဘဂဝန္တံ ဧတဒဝောစ – ‘‘‘အမတံ, အမတ’န္တိ, ဘန္တေ, ဝုစ္စတိ။ ကတမံ နု ခော, ဘန္တေ, အမတံ, ကတမော အမတဂာမိမဂ္ဂော’’တိ? ‘‘ယော ခော, ဘိက္ခု, ရာဂက္ခယော ဒောသက္ခယော မောဟက္ခယော – ဣဒံ ဝုစ္စတိ အမတံ။ အယမေဝ အရိယော အဋ္ဌင္ဂိကော မဂ္ဂော အမတဂာမိမဂ္ဂော, သေယ္ယထိဒံ – သမ္မာဒိဋ္ဌိ။ပေ.။ သမ္မာသမာဓီ’’တိ။ သတ္တမံ။
Evaṃ vutte so bhikkhu bhagavantaṃ etadavoca – ‘‘‘amataṃ, amata’nti, bhante, vuccati. Katamaṃ nu kho, bhante, amataṃ, katamo amatagāmimaggo’’ti? ‘‘Yo kho, bhikkhu, rāgakkhayo dosakkhayo mohakkhayo – idaṃ vuccati amataṃ. Ayameva ariyo aṭṭhaṅgiko maggo amatagāmimaggo, seyyathidaṃ – sammādiṭṭhi…pe… sammāsamādhī’’ti. Sattamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ဒုတိယအညတရဘိက္ခုသုတ္တဝဏ္ဏနာ • 7. Dutiyaaññatarabhikkhusuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဒုတိယအညတရဘိက္ခုသုတ္တဝဏ္ဏနာ • 7. Dutiyaaññatarabhikkhusuttavaṇṇanā
