| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
២. ទុតិយអនិយតសិក្ខាបទវណ្ណនា
2. Dutiyaaniyatasikkhāpadavaṇṇanā
៤៥២. តេន សមយេន ពុទ្ធោ ភគវាតិ ទុតិយអនិយតសិក្ខាបទំ។ តត្ថ ភគវតា បដិក្ខិត្តន្តិអាទិម្ហិ ‘‘យំ ឯកោ ឯកាយ រហោ បដិច្ឆន្នេ អាសនេ អលំកម្មនិយេ និសជ្ជំ កប្បេយ្យ, តំ និសជ្ជំ កប្បេតុំ បដិក្ខិត្ត’’ន្តិ ឯវំ សម្ពន្ធោ វេទិតព្ពោ។ ឥតរថា ហិ ‘‘ឯកស្ស ឯកាយា’’តិ វត្តព្ពំ សិយា, កស្មា? ‘‘បដិក្ខិត្ត’’ន្តិ វុត្តត្តា។ សាមិអត្ថេ វា ឯតំ បច្ចត្តវចនំ វេទិតព្ពំ។
452.Tena samayena buddho bhagavāti dutiyaaniyatasikkhāpadaṃ. Tattha bhagavatā paṭikkhittantiādimhi ‘‘yaṃ eko ekāya raho paṭicchanne āsane alaṃkammaniye nisajjaṃ kappeyya, taṃ nisajjaṃ kappetuṃ paṭikkhitta’’nti evaṃ sambandho veditabbo. Itarathā hi ‘‘ekassa ekāyā’’ti vattabbaṃ siyā, kasmā? ‘‘Paṭikkhitta’’nti vuttattā. Sāmiatthe vā etaṃ paccattavacanaṃ veditabbaṃ.
៤៥៣. ន ហេវ ខោ បន បដិច្ឆន្នន្តិ ឯត្ថ បន យម្បិ ពហិ បរិក្ខិត្តំ អន្តោ វិវដំ បរិវេណង្គណាទិ, តម្បិ អន្តោគធន្តិ វេទិតព្ពំ។ ឯវរូបញ្ហិ ឋានំ អប្បដិច្ឆន្នេយេវ គហិតន្តិ មហាបច្ចរិយំ វុត្តំ។ សេសំ បឋមសិក្ខាបទនយេនេវ វេទិតព្ពំ។ កេវលញ្ហិ ឥធ ឥត្ថីបិ បុរិសោបិ យោ កោចិ វិញ្ញូ អនន្ធោ អពធិរោ អន្តោទ្វាទសហត្ថេ ឱកាសេ ឋិតោ វា និសិន្នោ វា វិក្ខិត្តោបិ និទ្ទាយន្តោបិ អនាបត្តិំ ករោតិ។ ពធិរោ បន ចក្ខុមាបិ អន្ធោ វា អពធិរោបិ ន ករោតិ។ បារាជិកាបត្តិញ្ច បរិហាបេត្វា ទុដ្ឋុល្លវាចាបត្តិ វុត្តាតិ អយំ វិសេសោ។ សេសំ បុរិមសទិសមេវ។ ឧភយត្ថាបិ ឧម្មត្តកអាទិកម្មិកានំ អនាបត្តិ។
453.Na heva kho pana paṭicchannanti ettha pana yampi bahi parikkhittaṃ anto vivaṭaṃ pariveṇaṅgaṇādi, tampi antogadhanti veditabbaṃ. Evarūpañhi ṭhānaṃ appaṭicchanneyeva gahitanti mahāpaccariyaṃ vuttaṃ. Sesaṃ paṭhamasikkhāpadanayeneva veditabbaṃ. Kevalañhi idha itthīpi purisopi yo koci viññū anandho abadhiro antodvādasahatthe okāse ṭhito vā nisinno vā vikkhittopi niddāyantopi anāpattiṃ karoti. Badhiro pana cakkhumāpi andho vā abadhiropi na karoti. Pārājikāpattiñca parihāpetvā duṭṭhullavācāpatti vuttāti ayaṃ viseso. Sesaṃ purimasadisameva. Ubhayatthāpi ummattakaādikammikānaṃ anāpatti.
សមុដ្ឋានាទីសុ ឥទំសិក្ខាបទំ តិសមុដ្ឋានំ – កាយចិត្តតោ, វាចាចិត្តតោ, កាយវាចាចិត្តតោ ច សមុដ្ឋាតិ។ កិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, វចីកម្មំ, អកុសលចិត្តំ, សុខមជ្ឈត្តវេទនាហិ ទ្វិវេទនំ។ សេសំ ឧត្តានត្ថមេវាតិ។
Samuṭṭhānādīsu idaṃsikkhāpadaṃ tisamuṭṭhānaṃ – kāyacittato, vācācittato, kāyavācācittato ca samuṭṭhāti. Kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, sukhamajjhattavedanāhi dvivedanaṃ. Sesaṃ uttānatthamevāti.
ទុតិយអនិយតសិក្ខាបទវណ្ណនា និដ្ឋិតា។
Dutiyaaniyatasikkhāpadavaṇṇanā niṭṭhitā.
សមន្តបាសាទិកាយ វិនយសំវណ្ណនាយ
Samantapāsādikāya vinayasaṃvaṇṇanāya
អនិយតវណ្ណនា និដ្ឋិតា។
Aniyatavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ២. ទុតិយអនិយតសិក្ខាបទំ • 2. Dutiyaaniyatasikkhāpadaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ២. ទុតិយអនិយតសិក្ខាបទវណ្ណនា • 2. Dutiyaaniyatasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ២. ទុតិយអនិយតសិក្ខាបទវណ្ណនា • 2. Dutiyaaniyatasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ២. ទុតិយអនិយតសិក្ខាបទវណ្ណនា • 2. Dutiyaaniyatasikkhāpadavaṇṇanā
