| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৪. দীপিনিযঙ্গপঞ্হো
4. Dīpiniyaṅgapañho
৪. ‘‘ভন্তে নাগসেন, ‘দীপিনিযা একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, দীপিনী সকিং যেৰ গব্ভং গণ্হাতি, ন পুনপ্পুনং পুরিসং উপেতি? এৰমেৰ খো, মহারাজ, যোগিনা যোগাৰচরেন আযতিং পটিসন্ধিং উপ্পত্তিং গব্ভসেয্যং চুতিং ভেদং খযং ৰিনাসং সংসারভযং দুগ্গতিং ৰিসমং সম্পীল়িতং দিস্ৰা ‘পুনব্ভৰে নপ্পটিসন্দহিস্সামী’তি যোনিসো মনসিকারো করণীযো। ইদং, মহারাজ, দীপিনিযা একং অঙ্গং গহেতব্বং। ভাসিতম্পেতং, মহারাজ, ভগৰতা দেৰাতিদেৰেন সুত্তনিপাতে ধনিযগোপালকসুত্তে –
4. ‘‘Bhante nāgasena, ‘dīpiniyā ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, dīpinī sakiṃ yeva gabbhaṃ gaṇhāti, na punappunaṃ purisaṃ upeti? Evameva kho, mahārāja, yoginā yogāvacarena āyatiṃ paṭisandhiṃ uppattiṃ gabbhaseyyaṃ cutiṃ bhedaṃ khayaṃ vināsaṃ saṃsārabhayaṃ duggatiṃ visamaṃ sampīḷitaṃ disvā ‘punabbhave nappaṭisandahissāmī’ti yoniso manasikāro karaṇīyo. Idaṃ, mahārāja, dīpiniyā ekaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena suttanipāte dhaniyagopālakasutte –
‘‘‘উসভোরিৰ ছেত্ৰ বন্ধনানি, নাগো পূতিলতংৰ দালযিত্ৰা।
‘‘‘Usabhoriva chetva bandhanāni, nāgo pūtilataṃva dālayitvā;
নাহং পুনুপেস্সং গব্ভসেয্যং, অথ চে পত্থযসী পৰস্স দেৰা’’’তি॥
Nāhaṃ punupessaṃ gabbhaseyyaṃ, atha ce patthayasī pavassa devā’’’ti.
দীপিনিযঙ্গপঞ্হো চতুত্থো।
Dīpiniyaṅgapañho catuttho.
