| Library / Tipiṭaka / তিপিটক • Tipiṭaka / চূল়নিদ্দেস-অট্ঠকথা • Cūḷaniddesa-aṭṭhakathā |
৫. ধোতকমাণৰসুত্তনিদ্দেসৰণ্ণনা
5. Dhotakamāṇavasuttaniddesavaṇṇanā
৩০. পঞ্চমে ধোতকসুত্তে – ৰাচাভিকঙ্খামীতি ৰাচং অভিকঙ্খামি। সিক্খে নিব্বানমত্তনোতি অত্তনো রাগাদীনং নিব্বানত্থায অধিসীলাদীনি সিক্খেয্য। নিদ্দেসে অপুব্বং নত্থি।
30. Pañcame dhotakasutte – vācābhikaṅkhāmīti vācaṃ abhikaṅkhāmi. Sikkhe nibbānamattanoti attano rāgādīnaṃ nibbānatthāya adhisīlādīni sikkheyya. Niddese apubbaṃ natthi.
৩১.
31.
ইতোতি মম মুখতো।
Itoti mama mukhato.
নিদ্দেসে আতপ্পন্তি কিলেসতাপনং। উস্সাহন্তি অসঙ্কোচং। উস্সোল়্হীন্তি বলৰৰীরিযং। থামন্তি অসিথিলং। ধিতিন্তি ধারণং। ৰীরিযং করোহীতি পরক্কমং করোহি। ছন্দং জনেহীতি রুচিং উপ্পাদেহি।
Niddese ātappanti kilesatāpanaṃ. Ussāhanti asaṅkocaṃ. Ussoḷhīnti balavavīriyaṃ. Thāmanti asithilaṃ. Dhitinti dhāraṇaṃ. Vīriyaṃ karohīti parakkamaṃ karohi. Chandaṃ janehīti ruciṃ uppādehi.
৩২. এৰং ৰুত্তে অত্তমনো ধোতকো ভগৰন্তং অভিত্থৰমানো কথংকথাপমোক্খং যাচন্তো ‘‘পস্সামহ’’ন্তি গাথমাহ। তত্থ পস্সামহং দেৰমনুস্সলোকেতি পস্সামি অহং দেৰমনুস্সলোকে। তং তং নমস্সামীতি তং এৰরূপং তং নমস্সামি। পমুঞ্চাতি পমোচেহি।
32. Evaṃ vutte attamano dhotako bhagavantaṃ abhitthavamāno kathaṃkathāpamokkhaṃ yācanto ‘‘passāmaha’’nti gāthamāha. Tattha passāmahaṃ devamanussaloketi passāmi ahaṃ devamanussaloke. Taṃ taṃ namassāmīti taṃ evarūpaṃ taṃ namassāmi. Pamuñcāti pamocehi.
নিদ্দেসে পচ্চেকবুদ্ধাতি তং তং আরম্মণং পাটিযেক্কং চতুসচ্চং সযমেৰ বুদ্ধা পটিৰেধপ্পত্তাতি পচ্চেকবুদ্ধা। সীহসীহোতি অছম্ভিতট্ঠেন সীহানং অতিসীহো। নাগনাগোতি নিক্কিলেসট্ঠেন, মহন্তট্ঠেন ৰা নাগানং অতিনাগো। গণিগণীতি গণৰন্তানং অতীৰ গণৰা। মুনিমুনীতি ঞাণৰন্তানং অতীৰ ঞাণৰা। রাজরাজাতি উত্তমরাজা। মুঞ্চ মন্তি মোচেহি মং। পমুঞ্চ মন্তি নানাৰিধেন মুঞ্চেহি মং। মোচেহি মন্তি সিথিলং করোহি মং। পমোচেহি মন্তি অতীৰ সিথিলং করোহি মং। উদ্ধর মন্তি মং সংসারপঙ্কা উদ্ধরিত্ৰা থলে পতিট্ঠাপেহি। সমুদ্ধর মন্তি সম্মা উদ্ধরিত্ৰা থলে পতিট্ঠাপেহি মং। ৰুট্ঠাপেহীতি ৰিচিকিচ্ছাসল্লতো অপনেত্ৰা ৰিসুং করণৰসেন উট্ঠাপেহি।
Niddese paccekabuddhāti taṃ taṃ ārammaṇaṃ pāṭiyekkaṃ catusaccaṃ sayameva buddhā paṭivedhappattāti paccekabuddhā. Sīhasīhoti achambhitaṭṭhena sīhānaṃ atisīho. Nāganāgoti nikkilesaṭṭhena, mahantaṭṭhena vā nāgānaṃ atināgo. Gaṇigaṇīti gaṇavantānaṃ atīva gaṇavā. Munimunīti ñāṇavantānaṃ atīva ñāṇavā. Rājarājāti uttamarājā. Muñca manti mocehi maṃ. Pamuñca manti nānāvidhena muñcehi maṃ. Mocehi manti sithilaṃ karohi maṃ. Pamocehi manti atīva sithilaṃ karohi maṃ. Uddhara manti maṃ saṃsārapaṅkā uddharitvā thale patiṭṭhāpehi. Samuddhara manti sammā uddharitvā thale patiṭṭhāpehi maṃ. Vuṭṭhāpehīti vicikicchāsallato apanetvā visuṃ karaṇavasena uṭṭhāpehi.
৩৩. অথস্স ভগৰা অত্তাধীনমেৰ কথংকথাপমোক্খং ওঘতরণমুখেন দস্সেন্তো ‘‘নাহ’’ন্তি গাথমাহ। তত্থ নাহং সহিস্সামীতি অহং ন সহিস্সামি ন সক্কোমি। ন ৰাযমিস্সামীতি ৰুত্তং হোতি। পমোচনাযাতি পমোচেতুং। কথংকথিন্তি সকঙ্খং। তরেসীতি তরেয্যাসি।
33. Athassa bhagavā attādhīnameva kathaṃkathāpamokkhaṃ oghataraṇamukhena dassento ‘‘nāha’’nti gāthamāha. Tattha nāhaṃ sahissāmīti ahaṃ na sahissāmi na sakkomi. Na vāyamissāmīti vuttaṃ hoti. Pamocanāyāti pamocetuṃ. Kathaṃkathinti sakaṅkhaṃ. Taresīti tareyyāsi.
নিদ্দেসে ন ঈহামীতি পযোগং ন করোমি। ন সমীহামীতি অতীৰ পযোগং ন করোমি। অস্সদ্ধে পুগ্গলেতি রতনত্তযে সদ্ধাৰিরহিতে পুগ্গলে। অচ্ছন্দিকেতি মগ্গফলত্থং রুচিৰিরহিতে। কুসীতেতি সমাধিৰিরহিতে। হীনৰীরিযেতি নিব্বীরিযে। অপ্পটিপজ্জমানেতি পটিপত্তিযা ন পটিপজ্জমানে।
Niddese na īhāmīti payogaṃ na karomi. Na samīhāmīti atīva payogaṃ na karomi. Assaddhe puggaleti ratanattaye saddhāvirahite puggale. Acchandiketi maggaphalatthaṃ rucivirahite. Kusīteti samādhivirahite. Hīnavīriyeti nibbīriye. Appaṭipajjamāneti paṭipattiyā na paṭipajjamāne.
৩৪. এৰং ৰুত্তে অত্তমনতরো ধোতকো ভগৰন্তং অভিত্থৰমানো অনুসাসনিং যাচন্তো ‘‘অনুসাস ব্রহ্মে’’তি গাথমাহ। তত্থ ব্রহ্মেতি সেট্ঠৰচনমেতং। তেন ভগৰন্তং আমন্তযমানো আহ ‘‘অনুসাস ব্রহ্মে’’তি। ৰিৰেকধম্মন্তি সব্বসঙ্খারৰিৰেকং নিব্বানধম্মং। অব্যাপজ্জমানোতি নানপ্পকারকং অনাপজ্জমানো। ইধেৰ সন্তোতি ইধেৰ সমানো। অসিতোতি অনিস্সিতো।
34. Evaṃ vutte attamanataro dhotako bhagavantaṃ abhitthavamāno anusāsaniṃ yācanto ‘‘anusāsa brahme’’ti gāthamāha. Tattha brahmeti seṭṭhavacanametaṃ. Tena bhagavantaṃ āmantayamāno āha ‘‘anusāsa brahme’’ti. Vivekadhammanti sabbasaṅkhāravivekaṃ nibbānadhammaṃ. Abyāpajjamānoti nānappakārakaṃ anāpajjamāno. Idheva santoti idheva samāno. Asitoti anissito.
৩৫-৭. ইতো পরা দ্ৰে গাথা মেত্তগূসুত্তে ৰুত্তনযা এৰ। কেৰলঞ্হি তত্থ ধম্মং, ইধ সন্তিন্তি অযং ৰিসেসো। ততিযগাথাযপি পুব্বড্ঢং তত্থ ৰুত্তনযমেৰ। অপরড্ঢে সঙ্গোতি সজ্জনট্ঠানং, লগ্গনন্তি ৰুত্তং হোতি। সেসং সব্বত্থ পাকটমেৰ।
35-7. Ito parā dve gāthā mettagūsutte vuttanayā eva. Kevalañhi tattha dhammaṃ, idha santinti ayaṃ viseso. Tatiyagāthāyapi pubbaḍḍhaṃ tattha vuttanayameva. Aparaḍḍhe saṅgoti sajjanaṭṭhānaṃ, laggananti vuttaṃ hoti. Sesaṃ sabbattha pākaṭameva.
এৰং ভগৰা ইদম্পি সুত্তং অরহত্তনিকূটেনেৰ দেসেসি, দেসনাপরিযোসানে চ ৰুত্তসদিসো এৰ ধম্মাভিসমযো অহোসীতি।
Evaṃ bhagavā idampi suttaṃ arahattanikūṭeneva desesi, desanāpariyosāne ca vuttasadiso eva dhammābhisamayo ahosīti.
সদ্ধম্মপ্পজ্জোতিকায চূল়নিদ্দেস-অট্ঠকথায
Saddhammappajjotikāya cūḷaniddesa-aṭṭhakathāya
ধোতকমাণৰসুত্তনিদ্দেসৰণ্ণনা নিট্ঠিতা।
Dhotakamāṇavasuttaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চূল়নিদ্দেসপাল়ি • Cūḷaniddesapāḷi
৫. ধোতকমাণৰপুচ্ছা • 5. Dhotakamāṇavapucchā
৫. ধোতকমাণৰপুচ্ছানিদ্দেসো • 5. Dhotakamāṇavapucchāniddeso
