| Library / Tipiṭaka / তিপিটক • Tipiṭaka / চূল়নিদ্দেসপাল়ি • Cūḷaniddesapāḷi |
৫. ধোতকমাণৰপুচ্ছা
5. Dhotakamāṇavapucchā
৮৬.
86.
‘‘পুচ্ছামি তং ভগৰা ব্রূহি মেতং, [ইচ্চাযস্মা ধোতকো]
‘‘Pucchāmi taṃ bhagavā brūhi metaṃ, [iccāyasmā dhotako]
ৰাচাভিকঙ্খামি মহেসি তুয্হং।
Vācābhikaṅkhāmi mahesi tuyhaṃ;
তৰ সুত্ৰান নিগ্ঘোসং, সিক্খে নিব্বানমত্তনো’’॥
Tava sutvāna nigghosaṃ, sikkhe nibbānamattano’’.
৮৭.
87.
‘‘তেনহাতপ্পং করোহি, [ধোতকাতি ভগৰা]
‘‘Tenahātappaṃ karohi, [dhotakāti bhagavā]
ইধেৰ নিপকো সতো।
Idheva nipako sato;
ইতো সুত্ৰান নিগ্ঘোসং, সিক্খে নিব্বানমত্তনো’’॥
Ito sutvāna nigghosaṃ, sikkhe nibbānamattano’’.
৮৮.
88.
‘‘পস্সামহং দেৰমনুস্সলোকে, অকিঞ্চনং ব্রাহ্মণমিরিযমানং।
‘‘Passāmahaṃ devamanussaloke, akiñcanaṃ brāhmaṇamiriyamānaṃ;
তং তং নমস্সামি সমন্তচক্খু, পমুঞ্চ মং সক্ক কথংকথাহি’’॥
Taṃ taṃ namassāmi samantacakkhu, pamuñca maṃ sakka kathaṃkathāhi’’.
৮৯.
89.
‘‘নাহং সহিস্সামি পমোচনায, কথংকথিং ধোতক কঞ্চি লোকে।
‘‘Nāhaṃ sahissāmi pamocanāya, kathaṃkathiṃ dhotaka kañci loke;
ধম্মঞ্চ সেট্ঠং অভিজানমানো 1, এৰং তুৰং ওঘমিমং তরেসি’’॥
Dhammañca seṭṭhaṃ abhijānamāno 2, evaṃ tuvaṃ oghamimaṃ taresi’’.
৯০.
90.
‘‘অনুসাস ব্রহ্মে করুণাযমানো, ৰিৰেকধম্মং যমহং ৰিজঞ্ঞং।
‘‘Anusāsa brahme karuṇāyamāno, vivekadhammaṃ yamahaṃ vijaññaṃ;
যথাহং আকাসোৰ অব্যাপজ্জমানো, ইধেৰ সন্তো অসিতো চরেয্যং’’॥
Yathāhaṃ ākāsova abyāpajjamāno, idheva santo asito careyyaṃ’’.
৯১.
91.
‘‘কিত্তযিস্সামি তে সন্তিং, [ধোতকাতি ভগৰা]
‘‘Kittayissāmi te santiṃ, [dhotakāti bhagavā]
দিট্ঠে ধম্মে অনীতিহং।
Diṭṭhe dhamme anītihaṃ;
যং ৰিদিত্ৰা সতো চরং, তরে লোকে ৰিসত্তিকং’’॥
Yaṃ viditvā sato caraṃ, tare loke visattikaṃ’’.
৯২.
92.
‘‘তঞ্চাহং অভিনন্দামি, মহেসি সন্তিমুত্তমং।
‘‘Tañcāhaṃ abhinandāmi, mahesi santimuttamaṃ;
যং ৰিদিত্ৰা সতো চরং, তরে লোকে ৰিসত্তিকং’’॥
Yaṃ viditvā sato caraṃ, tare loke visattikaṃ’’.
৯৩.
93.
‘‘যং কিঞ্চি সম্পজানাসি, [ধোতকাতি ভগৰা]
‘‘Yaṃ kiñci sampajānāsi, [dhotakāti bhagavā]
উদ্ধং অধো তিরিযঞ্চাপি মজ্ঝে।
Uddhaṃ adho tiriyañcāpi majjhe;
এতং ৰিদিত্ৰা সঙ্গোতি লোকে, ভৰাভৰায মাকাসি তণ্হ’’ন্তি॥
Etaṃ viditvā saṅgoti loke, bhavābhavāya mākāsi taṇha’’nti.
ধোতকমাণৰপুচ্ছা পঞ্চমী।
Dhotakamāṇavapucchā pañcamī.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / চূল়নিদ্দেস-অট্ঠকথা • Cūḷaniddesa-aṭṭhakathā / ৫. ধোতকমাণৰসুত্তনিদ্দেসৰণ্ণনা • 5. Dhotakamāṇavasuttaniddesavaṇṇanā
