| Library / Tipiṭaka / តិបិដក • Tipiṭaka / ចូឡនិទ្ទេសបាឡិ • Cūḷaniddesapāḷi |
៥. ធោតកមាណវបុច្ឆា
5. Dhotakamāṇavapucchā
៨៦.
86.
‘‘បុច្ឆាមិ តំ ភគវា ព្រូហិ មេតំ, [ឥច្ចាយស្មា ធោតកោ]
‘‘Pucchāmi taṃ bhagavā brūhi metaṃ, [iccāyasmā dhotako]
វាចាភិកង្ខាមិ មហេសិ តុយ្ហំ;
Vācābhikaṅkhāmi mahesi tuyhaṃ;
តវ សុត្វាន និគ្ឃោសំ, សិក្ខេ និព្ពានមត្តនោ’’។
Tava sutvāna nigghosaṃ, sikkhe nibbānamattano’’.
៨៧.
87.
‘‘តេនហាតប្បំ ករោហិ, [ធោតកាតិ ភគវា]
‘‘Tenahātappaṃ karohi, [dhotakāti bhagavā]
ឥធេវ និបកោ សតោ;
Idheva nipako sato;
ឥតោ សុត្វាន និគ្ឃោសំ, សិក្ខេ និព្ពានមត្តនោ’’។
Ito sutvāna nigghosaṃ, sikkhe nibbānamattano’’.
៨៨.
88.
‘‘បស្សាមហំ ទេវមនុស្សលោកេ, អកិញ្ចនំ ព្រាហ្មណមិរិយមានំ;
‘‘Passāmahaṃ devamanussaloke, akiñcanaṃ brāhmaṇamiriyamānaṃ;
តំ តំ នមស្សាមិ សមន្តចក្ខុ, បមុញ្ច មំ សក្ក កថំកថាហិ’’។
Taṃ taṃ namassāmi samantacakkhu, pamuñca maṃ sakka kathaṃkathāhi’’.
៨៩.
89.
‘‘នាហំ សហិស្សាមិ បមោចនាយ, កថំកថិំ ធោតក កញ្ចិ លោកេ;
‘‘Nāhaṃ sahissāmi pamocanāya, kathaṃkathiṃ dhotaka kañci loke;
ធម្មញ្ច សេដ្ឋំ អភិជានមានោ 1, ឯវំ តុវំ ឱឃមិមំ តរេសិ’’។
Dhammañca seṭṭhaṃ abhijānamāno 2, evaṃ tuvaṃ oghamimaṃ taresi’’.
៩០.
90.
‘‘អនុសាស ព្រហ្មេ ករុណាយមានោ, វិវេកធម្មំ យមហំ វិជញ្ញំ;
‘‘Anusāsa brahme karuṇāyamāno, vivekadhammaṃ yamahaṃ vijaññaṃ;
យថាហំ អាកាសោវ អព្យាបជ្ជមានោ, ឥធេវ សន្តោ អសិតោ ចរេយ្យំ’’។
Yathāhaṃ ākāsova abyāpajjamāno, idheva santo asito careyyaṃ’’.
៩១.
91.
‘‘កិត្តយិស្សាមិ តេ សន្តិំ, [ធោតកាតិ ភគវា]
‘‘Kittayissāmi te santiṃ, [dhotakāti bhagavā]
ទិដ្ឋេ ធម្មេ អនីតិហំ;
Diṭṭhe dhamme anītihaṃ;
យំ វិទិត្វា សតោ ចរំ, តរេ លោកេ វិសត្តិកំ’’។
Yaṃ viditvā sato caraṃ, tare loke visattikaṃ’’.
៩២.
92.
‘‘តញ្ចាហំ អភិនន្ទាមិ, មហេសិ សន្តិមុត្តមំ;
‘‘Tañcāhaṃ abhinandāmi, mahesi santimuttamaṃ;
យំ វិទិត្វា សតោ ចរំ, តរេ លោកេ វិសត្តិកំ’’។
Yaṃ viditvā sato caraṃ, tare loke visattikaṃ’’.
៩៣.
93.
‘‘យំ កិញ្ចិ សម្បជានាសិ, [ធោតកាតិ ភគវា]
‘‘Yaṃ kiñci sampajānāsi, [dhotakāti bhagavā]
ឧទ្ធំ អធោ តិរិយញ្ចាបិ មជ្ឈេ;
Uddhaṃ adho tiriyañcāpi majjhe;
ឯតំ វិទិត្វា សង្គោតិ លោកេ, ភវាភវាយ មាកាសិ តណ្ហ’’ន្តិ។
Etaṃ viditvā saṅgoti loke, bhavābhavāya mākāsi taṇha’’nti.
ធោតកមាណវបុច្ឆា បញ្ចមី។
Dhotakamāṇavapucchā pañcamī.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ចូឡនិទ្ទេស-អដ្ឋកថា • Cūḷaniddesa-aṭṭhakathā / ៥. ធោតកមាណវសុត្តនិទ្ទេសវណ្ណនា • 5. Dhotakamāṇavasuttaniddesavaṇṇanā
