| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. ဓာတုသံယုတ္တံ
3. Dhātusaṃyuttaṃ
၁. နာနတ္တဝဂ္ဂော
1. Nānattavaggo
၁. ဓာတုနာနတ္တသုတ္တဝဏ္ဏနာ
1. Dhātunānattasuttavaṇṇanā
၈၅. ပဌမန္တိ ဣမသ္မိံ နိဒာနဝဂ္ဂေ သံယုတ္တာနံ ပဌမံ သံဂီတတ္တာ။ နိသ္သတ္တဋ္ဌသုညတဋ္ဌသင္ခာတေနာတိ ဓမ္မမတ္တတာယ နိသ္သတ္တတာသင္ခာတေန နိစ္စသုဘသုခအတ္တသုညတတ္ထသင္ခာတေန။ သဘာဝဋ္ဌေနာတိ ယထာဘူတသဘာဝဋ္ဌေန။ တတော ဧဝ သဘာဝသ္သ ဓာရဏဋ္ဌေန ဓာတူတိ လဒ္ဓနာမာနံ။ နာနာသဘာဝော အညမညဝိသဒိသတာ ဓာတုနာနတ္တံ။ စက္ခုသင္ခာတော ပသာဒော စက္ခုပသာဒော။ သော ဧဝ စက္ခနဋ္ဌေန စက္ခု, နိသ္သတ္တသုညတဋ္ဌေန ဓာတု စာတိ စက္ခုဓာတု။ စက္ခုပသာဒဝတ္ထုံ အဓိဋ္ဌာနံ ကတ္ဝာ ပဝတ္တံ စက္ခုပသာဒဝတ္ထုကံ။ သေသပဒေသုပိ ဧသေဝ နယော။ ဒ္ဝေ သမ္ပဋိစ္ဆနမနောဓာတုယော, ဧကာ ကိရိယာ မနောဓာတူတိ တိသ္သော မနောဓာတုယော မနောဓာတု ‘‘မနနမတ္တာ ဓာတူ’’တိ ကတ္ဝာ။ ဝေဒနာဒယော။ပေ.။ နိဗ္ဗာနဉ္စ ဓမ္မဓာတု ဝိသေသသညာပရိဟာရေန သာမညသညာယ ပဝတ္တနတော။ တထာ ဟေတေ ဓမ္မာ အာယတနဒေသနာယ ‘‘ဓမ္မာယတန’’န္တေဝ ဒေသိတာ။ န ဟိ နေသံ ရူပာယတနာဒီနံ ဝိယ ဝိညာဏေဟိ အညဝိညာဏေန ဂဟေတဗ္ဗတာကာရော အတ္ထိ။ သဗ္ဗမ္ပီတိ ဆသတ္တတိဝိဓံ မနောဝိညာဏံ။ ကာမာဝစရာ ကာမဓာတုပရိယာပန္နတ္တာ။ အဝသာနေ ဒ္ဝေတိ ဓမ္မဓာတုမနောဝိညာဏဓာတုယော။ အယမေတ္ထ သင္ခေပော, ဝိတ္ထာရော ပန ဝိသုဒ္ဓိမဂ္ဂေ တံသံဝဏ္ဏနာသု ဒဋ္ဌဗ္ဗော။
85.Paṭhamanti imasmiṃ nidānavagge saṃyuttānaṃ paṭhamaṃ saṃgītattā. Nissattaṭṭhasuññataṭṭhasaṅkhātenāti dhammamattatāya nissattatāsaṅkhātena niccasubhasukhaattasuññatatthasaṅkhātena. Sabhāvaṭṭhenāti yathābhūtasabhāvaṭṭhena. Tato eva sabhāvassa dhāraṇaṭṭhena dhātūti laddhanāmānaṃ. Nānāsabhāvo aññamaññavisadisatā dhātunānattaṃ. Cakkhusaṅkhāto pasādo cakkhupasādo. So eva cakkhanaṭṭhena cakkhu, nissattasuññataṭṭhena dhātu cāti cakkhudhātu. Cakkhupasādavatthuṃ adhiṭṭhānaṃ katvā pavattaṃ cakkhupasādavatthukaṃ. Sesapadesupi eseva nayo. Dve sampaṭicchanamanodhātuyo, ekā kiriyā manodhātūti tisso manodhātuyo manodhātu ‘‘mananamattā dhātū’’ti katvā. Vedanādayo…pe… nibbānañca dhammadhātu visesasaññāparihārena sāmaññasaññāya pavattanato. Tathā hete dhammā āyatanadesanāya ‘‘dhammāyatana’’nteva desitā. Na hi nesaṃ rūpāyatanādīnaṃ viya viññāṇehi aññaviññāṇena gahetabbatākāro atthi. Sabbampīti chasattatividhaṃ manoviññāṇaṃ. Kāmāvacarā kāmadhātupariyāpannattā. Avasāne dveti dhammadhātumanoviññāṇadhātuyo. Ayamettha saṅkhepo, vitthāro pana visuddhimagge taṃsaṃvaṇṇanāsu daṭṭhabbo.
ဓာတုနာနတ္တသုတ္တဝဏ္ဏနာ နိဋ္ဌိတာ။
Dhātunānattasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ဓာတုနာနတ္တသုတ္တံ • 1. Dhātunānattasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁.ဓာတုနာနတ္တသုတ္တဝဏ္ဏနာ • 1. Dhātunānattasuttavaṇṇanā
