| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(9) 4. த⁴ம்மவக்³க³வண்ணனா
(9) 4. Dhammavaggavaṇṇanā
88. சதுத்த²ஸ்ஸ பட²மே ப²லஸமாதீ⁴தி சதூஸுபி அரியப²லேஸு ஸமாதி⁴. ததா² ப²லபஞ்ஞா வேதி³தப்³பா³.
88. Catutthassa paṭhame phalasamādhīti catūsupi ariyaphalesu samādhi. Tathā phalapaññā veditabbā.
89. து³தியே ஸம்பயுத்தத⁴ம்மே பரிக்³க³ண்ஹாதீதி பக்³கா³ஹோ. ந விக்கி²பதீதி அவிக்கே²போ.
89. Dutiye sampayuttadhamme pariggaṇhātīti paggāho. Na vikkhipatīti avikkhepo.
90. ததியே நமனட்டே²ன நாமங். ருப்பனட்டே²ன ரூபங். ஸம்மஸனசாரஸ்ஸ அதி⁴ப்பேதத்தா ‘‘சத்தாரோ அரூபக்க²ந்தா⁴’’த்வேவ வுத்தங். தேனாஹ ‘‘த⁴ம்ம-கொட்டா²ஸபரிச்சே²த³ஞாணங் நாம கதி²த’’ந்தி.
90. Tatiye namanaṭṭhena nāmaṃ. Ruppanaṭṭhena rūpaṃ. Sammasanacārassa adhippetattā ‘‘cattāro arūpakkhandhā’’tveva vuttaṃ. Tenāha ‘‘dhamma-koṭṭhāsaparicchedañāṇaṃ nāma kathita’’nti.
91. சதுத்தே² விஜானநட்டே²ன விஜ்ஜா. விமுச்சனட்டே²ன விமுத்தி.
91. Catutthe vijānanaṭṭhena vijjā. Vimuccanaṭṭhena vimutti.
92. பஞ்சமே ப⁴வோ நாம ஸஸ்ஸதங் ஸதா³ பா⁴வதோ, ஸஸ்ஸதவஸேன உப்பஜ்ஜனதி³ட்டி² ப⁴வதி³ட்டி². விப⁴வோ நாம உச்சே²தோ³ வினாஸனட்டே²ன, விப⁴வவஸேன உப்பஜ்ஜனதி³ட்டி² விப⁴வதி³ட்டி². உத்தானத்தா²னேவ ஹெட்டா² வுத்தனயத்தா.
92. Pañcame bhavo nāma sassataṃ sadā bhāvato, sassatavasena uppajjanadiṭṭhi bhavadiṭṭhi. Vibhavo nāma ucchedo vināsanaṭṭhena, vibhavavasena uppajjanadiṭṭhi vibhavadiṭṭhi. Uttānatthāneva heṭṭhā vuttanayattā.
95. அட்ட²மே து³க்க²ங் வசோ ஏதஸ்மிங் விப்படிகூலகா³ஹிம்ஹி விபச்சனீகஸாதே அனாத³ரே புக்³க³லேதி து³ப்³ப³சோ, தஸ்ஸ கம்மங் தோ³வசஸ்ஸங், தஸ்ஸ து³ப்³ப³சஸ்ஸ புக்³க³லஸ்ஸ அனாத³ரியவஸேன பவத்தா சேதனா. தஸ்ஸ பா⁴வோ தோ³வசஸ்ஸதா. தஸ்ஸ பா⁴வோதி ச தஸ்ஸ யதா²வுத்தஸ்ஸ தோ³வசஸ்ஸஸ்ஸ அத்தி²பா⁴வோ, அத்த²தோ தோ³வசஸ்ஸமேவ. வித்தா²ரதோ பனேஸா ‘‘தத்த² கதமா தோ³வசஸ்ஸதா? ஸஹத⁴ம்மிகே வுச்சமானே தோ³வசஸ்ஸாய’’ந்தி அபி⁴த⁴ம்மே ஆக³தா. ஸா அத்த²தோ ஸங்கா²ரக்க²ந்தோ⁴ ஹோதி. சதுன்னங் வா க²ந்தா⁴னங் ஏதேனாகாரேன பவத்தானங் ஏதங் அதி⁴வசனந்தி வத³ந்தி.
95. Aṭṭhame dukkhaṃ vaco etasmiṃ vippaṭikūlagāhimhi vipaccanīkasāte anādare puggaleti dubbaco, tassa kammaṃ dovacassaṃ, tassa dubbacassa puggalassa anādariyavasena pavattā cetanā. Tassa bhāvo dovacassatā. Tassa bhāvoti ca tassa yathāvuttassa dovacassassa atthibhāvo, atthato dovacassameva. Vitthārato panesā ‘‘tattha katamā dovacassatā? Sahadhammike vuccamāne dovacassāya’’nti abhidhamme āgatā. Sā atthato saṅkhārakkhandho hoti. Catunnaṃ vā khandhānaṃ etenākārena pavattānaṃ etaṃ adhivacananti vadanti.
பாபயோக³தோ பாபா அஸ்ஸத்³தா⁴த³யோ புக்³க³லா ஏதஸ்ஸ மித்தாதி பாபமித்தோ, தஸ்ஸ பா⁴வோ பாபமித்ததா. வித்தா²ரதோ பனேஸா ‘‘தத்த² கதமா பாபமித்ததா? யே தே புக்³க³லா அஸ்ஸத்³தா⁴ து³ஸ்ஸீலா அப்பஸ்ஸுதா மச்ச²ரினோ து³ப்பஞ்ஞா. யா தேஸங் ஸேவனா நிஸேவனா ஸங்ஸேவனா ப⁴ஜனா ஸம்ப⁴ஜனா ப⁴த்தி ஸம்ப⁴த்தி தங்ஸம்பவங்கதா’’தி (த⁴॰ ஸ॰ 1333) ஏவங் ஆக³தா. ஸாபி அத்த²தோ தோ³வசஸ்ஸதா விய த³ட்ட²ப்³பா³. யாய ஹி சேதனாய புக்³க³லோ பாபஸம்பவங்கோ நாம ஹோதி, ஸா சேதனா சத்தாரோபி வா அரூபினோ க²ந்தா⁴ ததா³காரப்பவத்தா பாபமித்ததா.
Pāpayogato pāpā assaddhādayo puggalā etassa mittāti pāpamitto, tassa bhāvo pāpamittatā. Vitthārato panesā ‘‘tattha katamā pāpamittatā? Ye te puggalā assaddhā dussīlā appassutā maccharino duppaññā. Yā tesaṃ sevanā nisevanā saṃsevanā bhajanā sambhajanā bhatti sambhatti taṃsampavaṅkatā’’ti (dha. sa. 1333) evaṃ āgatā. Sāpi atthato dovacassatā viya daṭṭhabbā. Yāya hi cetanāya puggalo pāpasampavaṅko nāma hoti, sā cetanā cattāropi vā arūpino khandhā tadākārappavattā pāpamittatā.
96. நவமே ஸுக²ங் வசோ ஏதஸ்மிங் பத³க்கி²ணகா³ஹிம்ஹி அனுலோமஸாதே ஸாத³ரே புக்³க³லேதி ஸுப்³ப³சோதிஆதி³னா, கல்யாணா ஸத்³தா⁴த³யோ புக்³க³லா ஏதஸ்ஸ மித்தாதி கல்யாணமித்தோதிஆதி³னா வுத்தவிபரியாயேன அத்தோ² வேதி³தப்³போ³.
96. Navame sukhaṃ vaco etasmiṃ padakkhiṇagāhimhi anulomasāte sādare puggaleti subbacotiādinā, kalyāṇā saddhādayo puggalā etassa mittāti kalyāṇamittotiādinā vuttavipariyāyena attho veditabbo.
97. த³ஸமே பத²வீதா⁴துஆத³யோ ஸுக²தா⁴துகாமதா⁴துஆத³யோ ச ஏதாஸ்வேவ அந்தோக³தா⁴தி ஏதாஸு கோஸல்லே த³ஸ்ஸிதே தாஸுபி கோஸல்லங் த³ஸ்ஸிதமேவ ஹோதீதி ‘‘அட்டா²ரஸ தா⁴துயோ’’தி வுத்தங். தா⁴தூதி ஜானநந்தி இமினா அட்டா²ரஸன்னங் தா⁴தூனங் ஸபா⁴வபரிச்சே²தி³கா ஸவனதா⁴ரணஸம்மஸனப்படிவேத⁴பஞ்ஞா வுத்தா. தத்த² தா⁴தூனங் ஸவனதா⁴ரணபஞ்ஞா ஸுதமயா, இதரா பா⁴வனாமயா. தத்தா²பி ஸம்மஸனபஞ்ஞா லோகியா . விபஸ்ஸனா ஹி ஸா, இதரா லோகுத்தரா. லக்க²ணாதி³வஸேன அனிச்சாதி³வஸேன ச மனஸிகரணங் மனஸிகாரோ, தத்த² கோஸல்லங் மனஸிகாரகுஸலதா. அட்டா²ரஸன்னங்யேவ தா⁴தூனங் ஸம்மஸனப்படிவேத⁴பச்சவெக்க²ணபஞ்ஞா மனஸிகாரகுஸலதா, ஸா ஆதி³மஜ்ஜ²பரியோஸானவஸேன திதா⁴ பி⁴ன்னா. ததா² ஹி ஸம்மஸனபஞ்ஞா தஸ்ஸா ஆதி³, படிவேத⁴பஞ்ஞா மஜ்ஜே², பச்சவெக்க²ணபஞ்ஞா பரியோஸானங்.
97. Dasame pathavīdhātuādayo sukhadhātukāmadhātuādayo ca etāsveva antogadhāti etāsu kosalle dassite tāsupi kosallaṃ dassitameva hotīti ‘‘aṭṭhārasa dhātuyo’’ti vuttaṃ. Dhātūti jānananti iminā aṭṭhārasannaṃ dhātūnaṃ sabhāvaparicchedikā savanadhāraṇasammasanappaṭivedhapaññā vuttā. Tattha dhātūnaṃ savanadhāraṇapaññā sutamayā, itarā bhāvanāmayā. Tatthāpi sammasanapaññā lokiyā . Vipassanā hi sā, itarā lokuttarā. Lakkhaṇādivasena aniccādivasena ca manasikaraṇaṃ manasikāro, tattha kosallaṃ manasikārakusalatā. Aṭṭhārasannaṃyeva dhātūnaṃ sammasanappaṭivedhapaccavekkhaṇapaññā manasikārakusalatā, sā ādimajjhapariyosānavasena tidhā bhinnā. Tathā hi sammasanapaññā tassā ādi, paṭivedhapaññā majjhe, paccavekkhaṇapaññā pariyosānaṃ.
98. ஏகாத³ஸமே ஆபத்தியோவ ஆபத்திக்க²ந்தா⁴. தா பன அந்தராபத்தீனங் அக்³க³ஹணேன பஞ்ச, தாஸங் க³ஹணேன ஸத்த ஹொந்தீதி ஆஹ ‘‘பஞ்சன்னஞ்ச ஸத்தன்னஞ்ச ஆபத்திக்க²ந்தா⁴ன’’ந்தி. ஜானநந்தி ‘‘இமா ஆபத்தியோ, எத்தகா ஆபத்தியோ, ஏவஞ்ச தாஸங் ஆபஜ்ஜனங் ஹோதீ’’தி ஜானநங். ஏவங் திப்பகாரேன ஜானநபஞ்ஞா ஹி ஆபத்திகுஸலதா நாம. ஆபத்திதோ வுட்டா²பனப்பயோக³தாய கம்மபூ⁴தா வாசா கம்மவாசா, ததா²பூ⁴தா அனுஸ்ஸாவனவாசா. ‘‘இமாய கம்மவாசாய இதோ ஆபத்திதோ வுட்டா²னங் ஹோதி, ஹொந்தஞ்ச பட²மே, ததியே வா அனுஸ்ஸாவனே ய்ய-காரங் பத்தே, ‘ஸங்வரிஸ்ஸாமீ’தி வா பதே³ பரியோஸிதே ஹோதீ’’தி ஏவங் தங் தங் ஆபத்தீஹி வுட்டா²னபரிச்சே²த³ஜானநபஞ்ஞா ஆபத்திவுட்டா²னகுஸலதா. வுட்டா²னந்தி ச யதா²பன்னாய ஆபத்தியா யதா² ததா² அனந்தராயதாபாத³னங். ஏவங் வுட்டா²னக்³க³ஹணேனேவ தே³ஸனாயபி ஸங்க³ஹோ ஸித்³தோ⁴ ஹோதி.
98. Ekādasame āpattiyova āpattikkhandhā. Tā pana antarāpattīnaṃ aggahaṇena pañca, tāsaṃ gahaṇena satta hontīti āha ‘‘pañcannañca sattannañca āpattikkhandhāna’’nti. Jānananti ‘‘imā āpattiyo, ettakā āpattiyo, evañca tāsaṃ āpajjanaṃ hotī’’ti jānanaṃ. Evaṃ tippakārena jānanapaññā hi āpattikusalatā nāma. Āpattito vuṭṭhāpanappayogatāya kammabhūtā vācā kammavācā, tathābhūtā anussāvanavācā. ‘‘Imāya kammavācāya ito āpattito vuṭṭhānaṃ hoti, hontañca paṭhame, tatiye vā anussāvane yya-kāraṃ patte, ‘saṃvarissāmī’ti vā pade pariyosite hotī’’ti evaṃ taṃ taṃ āpattīhi vuṭṭhānaparicchedajānanapaññā āpattivuṭṭhānakusalatā. Vuṭṭhānanti ca yathāpannāya āpattiyā yathā tathā anantarāyatāpādanaṃ. Evaṃ vuṭṭhānaggahaṇeneva desanāyapi saṅgaho siddho hoti.
த⁴ம்மவக்³க³வண்ணனா நிட்டி²தா.
Dhammavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / (9) 4. த⁴ம்மவக்³கோ³ • (9) 4. Dhammavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / (9) 4. த⁴ம்மவக்³க³வண்ணனா • (9) 4. Dhammavaggavaṇṇanā
