| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
২. অদ্ধানৰগ্গো
2. Addhānavaggo
১. ধম্মসন্ততিপঞ্হো
1. Dhammasantatipañho
১. রাজা আহ ‘‘ভন্তে নাগসেন, যো উপ্পজ্জতি, সো এৰ সো, উদাহু অঞ্ঞো’’তি? থেরো আহ ‘‘ন চ সো, ন চ অঞ্ঞো’’তি।
1. Rājā āha ‘‘bhante nāgasena, yo uppajjati, so eva so, udāhu añño’’ti? Thero āha ‘‘na ca so, na ca añño’’ti.
‘‘ওপম্মং করোহী’’তি। ‘‘তং কিং মঞ্ঞসি, মহারাজ, যদা ত্ৰং দহরো তরুণো মন্দো উত্তানসেয্যকো অহোসি, সো যেৰ ত্ৰং এতরহি মহন্তো’’তি? ‘‘ন হি, ভন্তে, অঞ্ঞো সো দহরো তরুণো মন্দো উত্তানসেয্যকো অহোসি, অঞ্ঞো অহং এতরহি মহন্তো’’তি। ‘‘এৰং সন্তে খো, মহারাজ, মাতাতিপি ন ভৰিস্সতি, পিতাতিপি ন ভৰিস্সতি, আচরিযোতিপি ন ভৰিস্সতি, সিপ্পৰাতিপি ন ভৰিস্সতি, সীলৰাতিপি ন ভৰিস্সতি, পঞ্ঞৰাতিপি ন ভৰিস্সতি। কিং নু খো, মহারাজ, অঞ্ঞা এৰ কললস্স মাতা, অঞ্ঞা অব্বুদস্স মাতা, অঞ্ঞা পেসিযা মাতা, অঞ্ঞা ঘনস্স মাতা, অঞ্ঞা খুদ্দকস্স মাতা, অঞ্ঞা মহন্তস্স মাতা, অঞ্ঞো সিপ্পং সিক্খতি, অঞ্ঞো সিক্খিতো ভৰতি, অঞ্ঞো পাপকম্মং করোতি, অঞ্ঞস্স হত্থপাদা ছিজ্জন্তী’’তি? ‘‘ন হি, ভন্তে। ত্ৰং পন, ভন্তে, এৰং ৰুত্তে কিং ৰদেয্যাসী’’তি? থেরো আহ ‘‘অহঞ্ঞেৰ খো, মহারাজ, দহরো অহোসিং তরুণো মন্দো উত্তানসেয্যকো, অহঞ্ঞেৰ এতরহি মহন্তো, ইমমেৰ কাযং নিস্সায সব্বে তে একসঙ্গহিতা’’তি।
‘‘Opammaṃ karohī’’ti. ‘‘Taṃ kiṃ maññasi, mahārāja, yadā tvaṃ daharo taruṇo mando uttānaseyyako ahosi, so yeva tvaṃ etarahi mahanto’’ti? ‘‘Na hi, bhante, añño so daharo taruṇo mando uttānaseyyako ahosi, añño ahaṃ etarahi mahanto’’ti. ‘‘Evaṃ sante kho, mahārāja, mātātipi na bhavissati, pitātipi na bhavissati, ācariyotipi na bhavissati, sippavātipi na bhavissati, sīlavātipi na bhavissati, paññavātipi na bhavissati. Kiṃ nu kho, mahārāja, aññā eva kalalassa mātā, aññā abbudassa mātā, aññā pesiyā mātā, aññā ghanassa mātā, aññā khuddakassa mātā, aññā mahantassa mātā, añño sippaṃ sikkhati, añño sikkhito bhavati, añño pāpakammaṃ karoti, aññassa hatthapādā chijjantī’’ti? ‘‘Na hi, bhante. Tvaṃ pana, bhante, evaṃ vutte kiṃ vadeyyāsī’’ti? Thero āha ‘‘ahaññeva kho, mahārāja, daharo ahosiṃ taruṇo mando uttānaseyyako, ahaññeva etarahi mahanto, imameva kāyaṃ nissāya sabbe te ekasaṅgahitā’’ti.
‘‘ভিয্যো ওপম্মং করোহী’’তি। ‘‘যথা, মহারাজ, কোচিদেৰ পুরিসো পদীপং পদীপেয্য, কিং সো সব্বরত্তিং পদীপেয্যা’’তি? ‘‘আম, ভন্তে, সব্বরত্তিং পদীপেয্যা’’তি। ‘‘কিং নু খো, মহারাজ, যা পুরিমে যামে অচ্চি, সা মজ্ঝিমে যামে অচ্চী’’তি? ‘‘ন হি ভন্তে’’তি। ‘‘যা মজ্ঝিমে যামে অচ্চি, সা পচ্ছিমে যামে অচ্চী’’তি? ‘‘ন হি ভন্তে’’তি। ‘‘কিং নু খো, মহারাজ, অঞ্ঞো সো অহোসি পুরিমে যামে পদীপো, অঞ্ঞো মজ্ঝিমে যামে পদীপো, অঞ্ঞো পচ্ছিমে যামে পদীপো’’তি? ‘‘ন হি ভন্তে, তং যেৰ নিস্সায সব্বরত্তিং পদীপিতো’’তি। ‘‘এৰমেৰ খো, মহারাজ, ধম্মসন্ততি সন্দহতি, অঞ্ঞো উপ্পজ্জতি, অঞ্ঞো নিরুজ্ঝতি, অপুব্বং অচরিমং ৰিয সন্দহতি, তেন ন চ সো, ন চ অঞ্ঞো, পুরিমৰিঞ্ঞাণে পচ্ছিমৰিঞ্ঞাণং সঙ্গহং গচ্ছতী’’তি।
‘‘Bhiyyo opammaṃ karohī’’ti. ‘‘Yathā, mahārāja, kocideva puriso padīpaṃ padīpeyya, kiṃ so sabbarattiṃ padīpeyyā’’ti? ‘‘Āma, bhante, sabbarattiṃ padīpeyyā’’ti. ‘‘Kiṃ nu kho, mahārāja, yā purime yāme acci, sā majjhime yāme accī’’ti? ‘‘Na hi bhante’’ti. ‘‘Yā majjhime yāme acci, sā pacchime yāme accī’’ti? ‘‘Na hi bhante’’ti. ‘‘Kiṃ nu kho, mahārāja, añño so ahosi purime yāme padīpo, añño majjhime yāme padīpo, añño pacchime yāme padīpo’’ti? ‘‘Na hi bhante, taṃ yeva nissāya sabbarattiṃ padīpito’’ti. ‘‘Evameva kho, mahārāja, dhammasantati sandahati, añño uppajjati, añño nirujjhati, apubbaṃ acarimaṃ viya sandahati, tena na ca so, na ca añño, purimaviññāṇe pacchimaviññāṇaṃ saṅgahaṃ gacchatī’’ti.
‘‘ভিয্যো ওপম্মং করোহী’’তি। ‘‘যথা, মহারাজ, খীরং দুয্হমানং কালন্তরেন দধি পরিৰত্তেয্য, দধিতো নৰনীতং, নৰনীততো ঘতং পরিৰত্তেয্য, যো নু খো, মহারাজ, এৰং ৰদেয্য ‘যং যেৰ খীরং তং যেৰ দধি, যং যেৰ দধি তং যেৰ নৰনীতং, যং যেৰ নৰনীতং তং যেৰ ঘত’ন্তি, সম্মা নু খো সো, মহারাজ, ৰদমানো ৰদেয্যা’’তি? ‘‘ন হি ভন্তে, তংযেৰ নিস্সায সম্ভূত’’ন্তি। ‘‘এৰমেৰ খো, মহারাজ, ধম্মসন্ততি সন্দহতি, অঞ্ঞো উপ্পজ্জতি, অঞ্ঞো নিরুজ্ঝতি, অপুব্বং অচরিমং ৰিয সন্দহতি, তেন ন চ সো, ন চ অঞ্ঞো, পুরিমৰিঞ্ঞাণে পচ্ছিমৰিঞ্ঞাণং সঙ্গহং গচ্ছতী’’তি।
‘‘Bhiyyo opammaṃ karohī’’ti. ‘‘Yathā, mahārāja, khīraṃ duyhamānaṃ kālantarena dadhi parivatteyya, dadhito navanītaṃ, navanītato ghataṃ parivatteyya, yo nu kho, mahārāja, evaṃ vadeyya ‘yaṃ yeva khīraṃ taṃ yeva dadhi, yaṃ yeva dadhi taṃ yeva navanītaṃ, yaṃ yeva navanītaṃ taṃ yeva ghata’nti, sammā nu kho so, mahārāja, vadamāno vadeyyā’’ti? ‘‘Na hi bhante, taṃyeva nissāya sambhūta’’nti. ‘‘Evameva kho, mahārāja, dhammasantati sandahati, añño uppajjati, añño nirujjhati, apubbaṃ acarimaṃ viya sandahati, tena na ca so, na ca añño, purimaviññāṇe pacchimaviññāṇaṃ saṅgahaṃ gacchatī’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
ধম্মসন্ততিপঞ্হো পঠমো।
Dhammasantatipañho paṭhamo.
