| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕಪಾಳಿ • Itivuttakapāḷi |
೩. ದೇವಸದ್ದಸುತ್ತಂ
3. Devasaddasuttaṃ
೮೨. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –
82. Vuttañhetaṃ bhagavatā, vuttamarahatāti me sutaṃ –
‘‘ತಯೋಮೇ, ಭಿಕ್ಖವೇ, ದೇವೇಸು ದೇವಸದ್ದಾ ನಿಚ್ಛರನ್ತಿ ಸಮಯಾ ಸಮಯಂ ಉಪಾದಾಯ। ಕತಮೇ ತಯೋ? ಯಸ್ಮಿಂ, ಭಿಕ್ಖವೇ, ಸಮಯೇ ಅರಿಯಸಾವಕೋ ಕೇಸಮಸ್ಸುಂ ಓಹಾರೇತ್ವಾ ಕಾಸಾಯಾನಿ ವತ್ಥಾನಿ ಅಚ್ಛಾದೇತ್ವಾ ಅಗಾರಸ್ಮಾ ಅನಗಾರಿಯಂ ಪಬ್ಬಜ್ಜಾಯ ಚೇತೇತಿ, ತಸ್ಮಿಂ ಸಮಯೇ 1 ದೇವೇಸು ದೇವಸದ್ದೋ ನಿಚ್ಛರತಿ – ‘ಏಸೋ ಅರಿಯಸಾವಕೋ ಮಾರೇನ ಸದ್ಧಿಂ ಸಙ್ಗಾಮಾಯ ಚೇತೇತೀ’ತಿ। ಅಯಂ, ಭಿಕ್ಖವೇ, ಪಠಮೋ ದೇವೇಸು ದೇವಸದ್ದೋ ನಿಚ್ಛರತಿ ಸಮಯಾ ಸಮಯಂ ಉಪಾದಾಯ।
‘‘Tayome, bhikkhave, devesu devasaddā niccharanti samayā samayaṃ upādāya. Katame tayo? Yasmiṃ, bhikkhave, samaye ariyasāvako kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajjāya ceteti, tasmiṃ samaye 2 devesu devasaddo niccharati – ‘eso ariyasāvako mārena saddhiṃ saṅgāmāya cetetī’ti. Ayaṃ, bhikkhave, paṭhamo devesu devasaddo niccharati samayā samayaṃ upādāya.
‘‘ಪುನ ಚಪರಂ, ಭಿಕ್ಖವೇ, ಯಸ್ಮಿಂ ಸಮಯೇ ಅರಿಯಸಾವಕೋ ಸತ್ತನ್ನಂ ಬೋಧಿಪಕ್ಖಿಯಾನಂ ಧಮ್ಮಾನಂ ಭಾವನಾನುಯೋಗಮನುಯುತ್ತೋ ವಿಹರತಿ, ತಸ್ಮಿಂ ಸಮಯೇ ದೇವೇಸು ದೇವಸದ್ದೋ ನಿಚ್ಛರತಿ – ‘ಏಸೋ ಅರಿಯಸಾವಕೋ ಮಾರೇನ ಸದ್ಧಿಂ ಸಙ್ಗಾಮೇತೀ’ತಿ। ಅಯಂ, ಭಿಕ್ಖವೇ, ದುತಿಯೋ ದೇವೇಸು ದೇವಸದ್ದೋ ನಿಚ್ಛರತಿ ಸಮಯಾ ಸಮಯಂ ಉಪಾದಾಯ।
‘‘Puna caparaṃ, bhikkhave, yasmiṃ samaye ariyasāvako sattannaṃ bodhipakkhiyānaṃ dhammānaṃ bhāvanānuyogamanuyutto viharati, tasmiṃ samaye devesu devasaddo niccharati – ‘eso ariyasāvako mārena saddhiṃ saṅgāmetī’ti. Ayaṃ, bhikkhave, dutiyo devesu devasaddo niccharati samayā samayaṃ upādāya.
‘‘ಪುನ ಚಪರಂ, ಭಿಕ್ಖವೇ, ಯಸ್ಮಿಂ ಸಮಯೇ ಅರಿಯಸಾವಕೋ ಆಸವಾನಂ ಖಯಾ ಅನಾಸವಂ ಚೇತೋವಿಮುತ್ತಿಂ ಪಞ್ಞಾವಿಮುತ್ತಿಂ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರತಿ, ತಸ್ಮಿಂ ಸಮಯೇ ದೇವೇಸು ದೇವಸದ್ದೋ ನಿಚ್ಛರತಿ – ‘ಏಸೋ ಅರಿಯಸಾವಕೋ ವಿಜಿತಸಙ್ಗಾಮೋ ತಮೇವ ಸಙ್ಗಾಮಸೀಸಂ ಅಭಿವಿಜಿಯ ಅಜ್ಝಾವಸತೀ’ತಿ। ಅಯಂ, ಭಿಕ್ಖವೇ, ತತಿಯೋ ದೇವೇಸು ದೇವಸದ್ದೋ ನಿಚ್ಛರತಿ ಸಮಯಾ ಸಮಯಂ ಉಪಾದಾಯ। ಇಮೇ ಖೋ, ಭಿಕ್ಖವೇ, ತಯೋ ದೇವೇಸು ದೇವಸದ್ದಾ ನಿಚ್ಛರನ್ತಿ ಸಮಯಾ ಸಮಯಂ ಉಪಾದಾಯಾ’’ತಿ। ಏತಮತ್ಥಂ ಭಗವಾ ಅವೋಚ। ತತ್ಥೇತಂ ಇತಿ ವುಚ್ಚತಿ –
‘‘Puna caparaṃ, bhikkhave, yasmiṃ samaye ariyasāvako āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, tasmiṃ samaye devesu devasaddo niccharati – ‘eso ariyasāvako vijitasaṅgāmo tameva saṅgāmasīsaṃ abhivijiya ajjhāvasatī’ti. Ayaṃ, bhikkhave, tatiyo devesu devasaddo niccharati samayā samayaṃ upādāya. Ime kho, bhikkhave, tayo devesu devasaddā niccharanti samayā samayaṃ upādāyā’’ti. Etamatthaṃ bhagavā avoca. Tatthetaṃ iti vuccati –
‘‘ದಿಸ್ವಾ ವಿಜಿತಸಙ್ಗಾಮಂ, ಸಮ್ಮಾಸಮ್ಬುದ್ಧಸಾವಕಂ।
‘‘Disvā vijitasaṅgāmaṃ, sammāsambuddhasāvakaṃ;
ದೇವತಾಪಿ ನಮಸ್ಸನ್ತಿ, ಮಹನ್ತಂ ವೀತಸಾರದಂ॥
Devatāpi namassanti, mahantaṃ vītasāradaṃ.
‘‘ನಮೋ ತೇ ಪುರಿಸಾಜಞ್ಞ, ಯೋ ತ್ವಂ ದುಜ್ಜಯಮಜ್ಝಭೂ।
‘‘Namo te purisājañña, yo tvaṃ dujjayamajjhabhū;
ಜೇತ್ವಾನ ಮಚ್ಚುನೋ ಸೇನಂ, ವಿಮೋಕ್ಖೇನ ಅನಾವರಂ॥
Jetvāna maccuno senaṃ, vimokkhena anāvaraṃ.
‘‘ಇತಿ ಹೇತಂ ನಮಸ್ಸನ್ತಿ, ದೇವತಾ ಪತ್ತಮಾನಸಂ।
‘‘Iti hetaṃ namassanti, devatā pattamānasaṃ;
ತಞ್ಹಿ ತಸ್ಸ ನ ಪಸ್ಸನ್ತಿ, ಯೇನ ಮಚ್ಚುವಸಂ ವಜೇ’’ತಿ॥
Tañhi tassa na passanti, yena maccuvasaṃ vaje’’ti.
ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ। ತತಿಯಂ।
Ayampi attho vutto bhagavatā, iti me sutanti. Tatiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā / ೩. ದೇವಸದ್ದಸುತ್ತವಣ್ಣನಾ • 3. Devasaddasuttavaṇṇanā
