| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕಪಾಳಿ • Itivuttakapāḷi |
೪. ಪಞ್ಚಪುಬ್ಬನಿಮಿತ್ತಸುತ್ತಂ
4. Pañcapubbanimittasuttaṃ
೮೩. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –
83. Vuttañhetaṃ bhagavatā, vuttamarahatāti me sutaṃ –
‘‘ಯದಾ, ಭಿಕ್ಖವೇ, ದೇವೋ ದೇವಕಾಯಾ ಚವನಧಮ್ಮೋ ಹೋತಿ, ಪಞ್ಚಸ್ಸ ಪುಬ್ಬನಿಮಿತ್ತಾನಿ ಪಾತುಭವನ್ತಿ – ಮಾಲಾ ಮಿಲಾಯನ್ತಿ, ವತ್ಥಾನಿ ಕಿಲಿಸ್ಸನ್ತಿ, ಕಚ್ಛೇಹಿ ಸೇದಾ ಮುಚ್ಚನ್ತಿ, ಕಾಯೇ ದುಬ್ಬಣ್ಣಿಯಂ ಓಕ್ಕಮತಿ, ಸಕೇ ದೇವೋ ದೇವಾಸನೇ ನಾಭಿರಮತೀತಿ। ತಮೇನಂ, ಭಿಕ್ಖವೇ, ದೇವಾ ‘ಚವನಧಮ್ಮೋ ಅಯಂ ದೇವಪುತ್ತೋ’ತಿ ಇತಿ ವಿದಿತ್ವಾ ತೀಹಿ ವಾಚಾಹಿ ಅನುಮೋದೇನ್ತಿ 1 – ‘ಇತೋ, ಭೋ, ಸುಗತಿಂ ಗಚ್ಛ, ಸುಗತಿಂ ಗನ್ತ್ವಾ ಸುಲದ್ಧಲಾಭಂ ಲಭ, ಸುಲದ್ಧಲಾಭಂ ಲಭಿತ್ವಾ ಸುಪ್ಪತಿಟ್ಠಿತೋ ಭವಾಹೀ’’’ತಿ।
‘‘Yadā, bhikkhave, devo devakāyā cavanadhammo hoti, pañcassa pubbanimittāni pātubhavanti – mālā milāyanti, vatthāni kilissanti, kacchehi sedā muccanti, kāye dubbaṇṇiyaṃ okkamati, sake devo devāsane nābhiramatīti. Tamenaṃ, bhikkhave, devā ‘cavanadhammo ayaṃ devaputto’ti iti viditvā tīhi vācāhi anumodenti 2 – ‘ito, bho, sugatiṃ gaccha, sugatiṃ gantvā suladdhalābhaṃ labha, suladdhalābhaṃ labhitvā suppatiṭṭhito bhavāhī’’’ti.
ಏವಂ ವುತ್ತೇ, ಅಞ್ಞತರೋ ಭಿಕ್ಖು ಭಗವನ್ತಂ ಏತದವೋಚ – ‘‘ಕಿನ್ನು ಖೋ, ಭನ್ತೇ, ದೇವಾನಂ ಸುಗತಿಗಮನಸಙ್ಖಾತಂ; ಕಿಞ್ಚ, ಭನ್ತೇ, ದೇವಾನಂ ಸುಲದ್ಧಲಾಭಸಙ್ಖಾತಂ ; ಕಿಂ ಪನ, ಭನ್ತೇ, ದೇವಾನಂ ಸುಪ್ಪತಿಟ್ಠಿತಸಙ್ಖಾತ’’ನ್ತಿ?
Evaṃ vutte, aññataro bhikkhu bhagavantaṃ etadavoca – ‘‘kinnu kho, bhante, devānaṃ sugatigamanasaṅkhātaṃ; kiñca, bhante, devānaṃ suladdhalābhasaṅkhātaṃ ; kiṃ pana, bhante, devānaṃ suppatiṭṭhitasaṅkhāta’’nti?
‘‘ಮನುಸ್ಸತ್ತಂ ಖೋ, ಭಿಕ್ಖು 3, ದೇವಾನಂ ಸುಗತಿಗಮನಸಙ್ಖಾತಂ; ಯಂ ಮನುಸ್ಸಭೂತೋ ಸಮಾನೋ ತಥಾಗತಪ್ಪವೇದಿತೇ ಧಮ್ಮವಿನಯೇ ಸದ್ಧಂ ಪಟಿಲಭತಿ। ಇದಂ ಖೋ, ಭಿಕ್ಖು 4, ದೇವಾನಂ ಸುಲದ್ಧಲಾಭಸಙ್ಖಾತಂ; ಸಾ ಖೋ ಪನಸ್ಸ ಸದ್ಧಾ ನಿವಿಟ್ಠಾ ಹೋತಿ ಮೂಲಜಾತಾ ಪತಿಟ್ಠಿತಾ ದಳ್ಹಾ ಅಸಂಹಾರಿಯಾ ಸಮಣೇನ ವಾ ಬ್ರಾಹ್ಮಣೇನ ವಾ ದೇವೇನ ವಾ ಮಾರೇನ ವಾ ಬ್ರಹ್ಮುನಾ ವಾ ಕೇನಚಿ ವಾ ಲೋಕಸ್ಮಿಂ। ಇದಂ ಖೋ, ಭಿಕ್ಖು 5, ದೇವಾನಂ ಸುಪ್ಪತಿಟ್ಠಿತಸಙ್ಖಾತ’’ನ್ತಿ। ಏತಮತ್ಥಂ ಭಗವಾ ಅವೋಚ। ತತ್ಥೇತಂ ಇತಿ ವುಚ್ಚತಿ –
‘‘Manussattaṃ kho, bhikkhu 6, devānaṃ sugatigamanasaṅkhātaṃ; yaṃ manussabhūto samāno tathāgatappavedite dhammavinaye saddhaṃ paṭilabhati. Idaṃ kho, bhikkhu 7, devānaṃ suladdhalābhasaṅkhātaṃ; sā kho panassa saddhā niviṭṭhā hoti mūlajātā patiṭṭhitā daḷhā asaṃhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṃ. Idaṃ kho, bhikkhu 8, devānaṃ suppatiṭṭhitasaṅkhāta’’nti. Etamatthaṃ bhagavā avoca. Tatthetaṃ iti vuccati –
‘‘ಯದಾ ದೇವೋ ದೇವಕಾಯಾ, ಚವತಿ ಆಯುಸಙ್ಖಯಾ।
‘‘Yadā devo devakāyā, cavati āyusaṅkhayā;
ತಯೋ ಸದ್ದಾ ನಿಚ್ಛರನ್ತಿ, ದೇವಾನಂ ಅನುಮೋದತಂ॥
Tayo saddā niccharanti, devānaṃ anumodataṃ.
‘‘‘ಇತೋ ಭೋ ಸುಗತಿಂ ಗಚ್ಛ, ಮನುಸ್ಸಾನಂ ಸಹಬ್ಯತಂ।
‘‘‘Ito bho sugatiṃ gaccha, manussānaṃ sahabyataṃ;
ಮನುಸ್ಸಭೂತೋ ಸದ್ಧಮ್ಮೇ, ಲಭ ಸದ್ಧಂ ಅನುತ್ತರಂ॥
Manussabhūto saddhamme, labha saddhaṃ anuttaraṃ.
‘‘‘ಸಾ ತೇ ಸದ್ಧಾ ನಿವಿಟ್ಠಸ್ಸ, ಮೂಲಜಾತಾ ಪತಿಟ್ಠಿತಾ।
‘‘‘Sā te saddhā niviṭṭhassa, mūlajātā patiṭṭhitā;
ಯಾವಜೀವಂ ಅಸಂಹೀರಾ, ಸದ್ಧಮ್ಮೇ ಸುಪ್ಪವೇದಿತೇ॥
Yāvajīvaṃ asaṃhīrā, saddhamme suppavedite.
‘‘‘ಕಾಯದುಚ್ಚರಿತಂ ಹಿತ್ವಾ, ವಚೀದುಚ್ಚರಿತಾನಿ ಚ।
‘‘‘Kāyaduccaritaṃ hitvā, vacīduccaritāni ca;
ಮನೋದುಚ್ಚರಿತಂ ಹಿತ್ವಾ, ಯಞ್ಚಞ್ಞಂ ದೋಸಸಞ್ಹಿತಂ॥
Manoduccaritaṃ hitvā, yañcaññaṃ dosasañhitaṃ.
‘‘‘ಕಾಯೇನ ಕುಸಲಂ ಕತ್ವಾ, ವಾಚಾಯ ಕುಸಲಂ ಬಹುಂ।
‘‘‘Kāyena kusalaṃ katvā, vācāya kusalaṃ bahuṃ;
ಮನಸಾ ಕುಸಲಂ ಕತ್ವಾ, ಅಪ್ಪಮಾಣಂ ನಿರೂಪಧಿಂ॥
Manasā kusalaṃ katvā, appamāṇaṃ nirūpadhiṃ.
‘‘‘ತತೋ ಓಪಧಿಕಂ ಪುಞ್ಞಂ, ಕತ್ವಾ ದಾನೇನ ತಂ ಬಹುಂ।
‘‘‘Tato opadhikaṃ puññaṃ, katvā dānena taṃ bahuṃ;
‘‘ಇಮಾಯ ಅನುಕಮ್ಪಾಯ, ದೇವಾ ದೇವಂ ಯದಾ ವಿದೂ।
‘‘Imāya anukampāya, devā devaṃ yadā vidū;
ಚವನ್ತಂ ಅನುಮೋದೇನ್ತಿ, ಏಹಿ ದೇವ ಪುನಪ್ಪುನ’’ನ್ತಿ॥
Cavantaṃ anumodenti, ehi deva punappuna’’nti.
ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ। ಚತುತ್ಥಂ।
Ayampi attho vutto bhagavatā, iti me sutanti. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā / ೪. ಪಞ್ಚಪುಬ್ಬನಿಮಿತ್ತಸುತ್ತವಣ್ಣನಾ • 4. Pañcapubbanimittasuttavaṇṇanā
