| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৪২. দেসনানিদ্দেসৰণ্ণনা
42. Desanāniddesavaṇṇanā
৩৮২. ইদানি দেসনানিদস্সনব্যাসেন হেট্ঠা অৰুত্তানি কানিচি সিক্খাপদানি উপদিসিতুং ‘‘চাগো’’তিআদিমাহ। ভিক্খুভাৰস্স যো চাগো, সা পারাজিকদেসনাতি সম্বন্ধো। ভৰতি অনেনাতি ভাৰো, সদ্দপ্পৰত্তিনিমিত্তং, ভিক্খুনো ভাৰো ভিক্খু-সদ্দস্স পৰত্তিনিমিত্তং ভিক্খুকিচ্চং ভিক্খুভাৰো, তস্স। দিসী উচ্চারণে, উচ্চারণা পকাসনা দেসনা। ‘‘ছন্নমতিৰস্সতি, ৰিৰট্টং নাতিৰস্সতী’’তি (উদা॰ ৪৫) হি ৰুত্তং। ইধ পন ভিক্খুভাৰপরিচ্চাগোযেৰ পারাজিকায পকাসনা নাম পারাজিকায দেসনা। ‘‘যো’’তি ৰুত্তত্তা ‘‘সো’’তি ৰত্তুং যুত্তং, তথাপি সব্বাদীহি ৰুত্তস্স ৰা লিঙ্গমাদিয্যতে ৰক্খমানস্স ৰাতি ৰক্খমানদেসনাপেক্খায ‘‘সো’’তি ৰুত্তং। যথা যেন পকারেন ‘‘ছাদেতি জানমাপন্ন’’ন্তিআদিনা ৰুত্তং যথাৰুত্তং, তেন। ৰুত্তমনতিক্কম্মাতি অব্যযীভাৰৰসেন ৰা অত্থো ৰেদিতব্বো। ইধাপি গরুকাপত্তিযা ৰুট্ঠানানতিক্কমেনেৰ পকাসনা দেসনা সিযাতি ‘‘ৰুট্ঠানং গরুকাপত্তিদেসনা’’তি ৰুচ্চতি।
382. Idāni desanānidassanabyāsena heṭṭhā avuttāni kānici sikkhāpadāni upadisituṃ ‘‘cāgo’’tiādimāha. Bhikkhubhāvassa yo cāgo, sā pārājikadesanāti sambandho. Bhavati anenāti bhāvo, saddappavattinimittaṃ, bhikkhuno bhāvo bhikkhu-saddassa pavattinimittaṃ bhikkhukiccaṃ bhikkhubhāvo, tassa. Disī uccāraṇe, uccāraṇā pakāsanā desanā. ‘‘Channamativassati, vivaṭṭaṃ nātivassatī’’ti (udā. 45) hi vuttaṃ. Idha pana bhikkhubhāvapariccāgoyeva pārājikāya pakāsanā nāma pārājikāya desanā. ‘‘Yo’’ti vuttattā ‘‘so’’ti vattuṃ yuttaṃ, tathāpi sabbādīhi vuttassa vā liṅgamādiyyate vakkhamānassa vāti vakkhamānadesanāpekkhāya ‘‘so’’ti vuttaṃ. Yathā yena pakārena ‘‘chādeti jānamāpanna’’ntiādinā vuttaṃ yathāvuttaṃ, tena. Vuttamanatikkammāti abyayībhāvavasena vā attho veditabbo. Idhāpi garukāpattiyā vuṭṭhānānatikkameneva pakāsanā desanā siyāti ‘‘vuṭṭhānaṃ garukāpattidesanā’’ti vuccati.
৩৮৩. ইদানি ৰত্তব্বং সন্ধায ‘‘এৰ’’ন্তি ৰুত্তং। একস্সাতি একস্স ভিক্খুনো।
383. Idāni vattabbaṃ sandhāya ‘‘eva’’nti vuttaṃ. Ekassāti ekassa bhikkhuno.
৩৮৪. তুম্হমূলেতি তুম্হাকং মূলে সমীপে। পটিদেসেমীতি পকাসেমি। সংৰরেয্যাসীতি সংযমেয্যাসি, সংৰরে পতিট্ঠেয্যাসীতি অত্থো।
384.Tumhamūleti tumhākaṃ mūle samīpe. Paṭidesemīti pakāsemi. Saṃvareyyāsīti saṃyameyyāsi, saṃvare patiṭṭheyyāsīti attho.
৩৮৫. নিস্সজ্জিত্ৰানাতি একবহুভাৰং সন্নিহিতাসন্নিহিতভাৰং ঞত্ৰা ‘‘ইদং মে, ভন্তে, চীৰর’’ন্তিআদিনা নিস্সজ্জিত্ৰা। তেনাতি যস্স চীৰরং নিস্সট্ঠং, তেন। ‘‘ইমং…পে॰… দম্মী’’তি নিস্সট্ঠচীৰরং দেয্যন্তি সম্বন্ধিতব্বং। ‘‘ইমং চীৰরং দসাহাতিক্কন্ত’’ন্তিআদিনা যোজেতব্বং।
385.Nissajjitvānāti ekabahubhāvaṃ sannihitāsannihitabhāvaṃ ñatvā ‘‘idaṃ me, bhante, cīvara’’ntiādinā nissajjitvā. Tenāti yassa cīvaraṃ nissaṭṭhaṃ, tena. ‘‘Imaṃ…pe… dammī’’ti nissaṭṭhacīvaraṃ deyyanti sambandhitabbaṃ. ‘‘Imaṃ cīvaraṃ dasāhātikkanta’’ntiādinā yojetabbaṃ.
৩৮৬. (ক) চীৰরন্তি তিচীৰরাধিট্ঠাননযেন অধিট্ঠিতেসু সঙ্ঘাটিআদীসু যং কিঞ্চি চীৰরং। ৰিপ্পৰুত্থন্তি ৰিপ্পযুত্তেন ৰুত্থং।
386. (Ka) cīvaranti ticīvarādhiṭṭhānanayena adhiṭṭhitesu saṅghāṭiādīsu yaṃ kiñci cīvaraṃ. Vippavutthanti vippayuttena vutthaṃ.
(খ) অকালচীৰরন্তি অনত্থতে কথিনে ৰস্সানস্স পচ্ছিমমাসং ঠপেত্ৰা সেসে একাদসমাসে, অত্থতে কথিনে তঞ্চ মাসং হেমন্তিকে চত্তারো মাসে চ ঠপেত্ৰা সেসে সত্তমাসে উপ্পন্নং, কালেপি সঙ্ঘস্স ৰা ‘‘ইদং অকালচীৰর’’ন্তি একপুগ্গলস্স ৰা ‘‘ইদং তুয্হং দম্মী’’তি উদ্দিসিত্ৰা দিন্নং। ইতরং পন কালচীৰরং। মাসাতিক্কন্তন্তি অকালচীৰরে উপ্পন্নে ঊনস্স পারিপূরিযা সঙ্ঘগণাদিতো সতিযা পচ্চাসায মাসমেকং পরিহারো লব্ভতি, তং মাসং অতিক্কন্তং।
(Kha) akālacīvaranti anatthate kathine vassānassa pacchimamāsaṃ ṭhapetvā sese ekādasamāse, atthate kathine tañca māsaṃ hemantike cattāro māse ca ṭhapetvā sese sattamāse uppannaṃ, kālepi saṅghassa vā ‘‘idaṃ akālacīvara’’nti ekapuggalassa vā ‘‘idaṃ tuyhaṃ dammī’’ti uddisitvā dinnaṃ. Itaraṃ pana kālacīvaraṃ. Māsātikkantanti akālacīvare uppanne ūnassa pāripūriyā saṅghagaṇādito satiyā paccāsāya māsamekaṃ parihāro labbhati, taṃ māsaṃ atikkantaṃ.
(গ) পুরাণচীৰরন্তি যং অন্তমসো উস্সীসকং কত্ৰা নিপন্নো। চীৰরং নাম ছন্নং অঞ্ঞতরং ৰিকপ্পনূপগং। এসেৰ নযো সব্বেসু ৰক্খমানচীৰরপ্পটিসংযুত্তসিক্খাপদেসু।
(Ga) purāṇacīvaranti yaṃ antamaso ussīsakaṃ katvā nipanno. Cīvaraṃ nāma channaṃ aññataraṃ vikappanūpagaṃ. Eseva nayo sabbesu vakkhamānacīvarappaṭisaṃyuttasikkhāpadesu.
(ঘ) অঞ্ঞত্র পারিৰত্তকাতি অন্তমসো হরীতকীখণ্ডেনপি পারিৰত্তকং ৰিনা।
(Gha) aññatra pārivattakāti antamaso harītakīkhaṇḍenapi pārivattakaṃ vinā.
(ঙ) গহপতিকন্তি ভিক্খূসু অপব্বজিতকং। অঞ্ঞত্র সমযাতি অচ্ছিন্নচীৰরনট্ঠচীৰরসমযং ৰিনা, অচ্ছিন্নচীৰরেহি পন সাখাপলাসং অত্তনা ভঞ্জিত্ৰাপি ৰাকাদীনি গণ্হিত্ৰাপি নিৰাসেতুং ৰট্টতি, পগেৰ ৰিঞ্ঞত্তি। চীৰরং ৰিঞ্ঞাপিতন্তি সম্বন্ধো। কন্তি আহ ‘‘অঞ্ঞাতক’’ন্তিআদি।
(Ṅa) gahapatikanti bhikkhūsu apabbajitakaṃ. Aññatra samayāti acchinnacīvaranaṭṭhacīvarasamayaṃ vinā, acchinnacīvarehi pana sākhāpalāsaṃ attanā bhañjitvāpi vākādīni gaṇhitvāpi nivāsetuṃ vaṭṭati, pageva viññatti. Cīvaraṃ viññāpitanti sambandho. Kanti āha ‘‘aññātaka’’ntiādi.
(চ) তদুত্তরীতি ততো ৰুত্তপ্পমাণতো উত্তরি, অচ্ছিন্নচীৰরেন ভিক্খুনা কাযেন ৰা ৰাচায ৰা অভিহরিত্ৰা পৰারিতচীৰরতো তীসু নট্ঠেসু দ্ৰে সাদিতব্বানি, দ্ৰীসু নট্ঠেসু একং সাদিতব্বং। পকতিযা সন্তরুত্তরেন চরন্তেন দ্ৰীসু নট্ঠেসু দ্ৰেযেৰ সাদিতব্বানি, একস্মিং নট্ঠে একংযেৰ সাদিতব্বং। যস্স একংযেৰ হোতি, তস্মিং নট্ঠে দ্ৰে সাদিতব্বানি।
(Ca) taduttarīti tato vuttappamāṇato uttari, acchinnacīvarena bhikkhunā kāyena vā vācāya vā abhiharitvā pavāritacīvarato tīsu naṭṭhesu dve sāditabbāni, dvīsu naṭṭhesu ekaṃ sāditabbaṃ. Pakatiyā santaruttarena carantena dvīsu naṭṭhesu dveyeva sāditabbāni, ekasmiṃ naṭṭhe ekaṃyeva sāditabbaṃ. Yassa ekaṃyeva hoti, tasmiṃ naṭṭhe dve sāditabbāni.
(ছ) অপ্পৰারিতোতি গহপতিনা ৰা গহপতানিযা ৰা। ৰিকপ্পন্তি পঠমঅধিপ্পেততো মূলং ৰড্ঢাপেন্তো সুন্দরকামতায ‘‘আযতং ৰা’’তিআদিনা ৰিসিট্ঠকপ্পং অধিকৰিধানং।
(Cha) appavāritoti gahapatinā vā gahapatāniyā vā. Vikappanti paṭhamaadhippetato mūlaṃ vaḍḍhāpento sundarakāmatāya ‘‘āyataṃ vā’’tiādinā visiṭṭhakappaṃ adhikavidhānaṃ.
(জ) অঞ্ঞাতকে গহপতিকেতি বহূনং ৰসেন ৰুত্তমত্তমেৰ পুরিমতো ৰিসেসো।
(Ja) aññātake gahapatiketi bahūnaṃ vasena vuttamattameva purimato viseso.
(ঝ) চোদনাযাতি ‘‘অত্থো মে, আৰুসো, চীৰরেনা’’তি চোদনায। ঠানেনাতি কাযচোদনমাহ। রাজাদীহি পেসিতেন হি দূতেন ৰেয্যাৰচ্চকরস্স হত্থে চীৰরচেতাপন্নে নিক্খিত্তে তিস্সো চোদনা অনুঞ্ঞাতা, চোদনায দিগুণং ঠানং, তস্মা সচে চোদেতিযেৰ, ন তিট্ঠতি, ছ চোদনা লব্ভন্তি। সচে তিট্ঠতিযেৰ, ন চোদেতি, দ্ৰাদস ঠানানি লব্ভন্তি। সচে উভযং করোতি, একায চোদনায দ্ৰে ঠানানি হাপেতব্বানি।
(Jha) codanāyāti ‘‘attho me, āvuso, cīvarenā’’ti codanāya. Ṭhānenāti kāyacodanamāha. Rājādīhi pesitena hi dūtena veyyāvaccakarassa hatthe cīvaracetāpanne nikkhitte tisso codanā anuññātā, codanāya diguṇaṃ ṭhānaṃ, tasmā sace codetiyeva, na tiṭṭhati, cha codanā labbhanti. Sace tiṭṭhatiyeva, na codeti, dvādasa ṭhānāni labbhanti. Sace ubhayaṃ karoti, ekāya codanāya dve ṭhānāni hāpetabbāni.
(ট) সুদ্ধানি চ তানি কাল়কানি চ জাতিযা রজনেন ৰা।
(Ṭa) suddhāni ca tāni kāḷakāni ca jātiyā rajanena vā.
(ঠ) তুলন্তি চতূহি তুলাহি কারেতুকামতং সন্ধায ৰুত্তং। অত্থতো পন যত্তকেহি এল়কলোমেহি কাতুকামো হোতি, তেসু দ্ৰে কোট্ঠাসা কাল়কানং, একো ওদাতানং, একো গোচরিযানং গহেতব্বো। তুলা নাম পলসতং। গোচরিযা নাম কপিলৰণ্ণা। ইদং মে সন্থতং কারাপিতন্তি যোজনা।
(Ṭha) tulanti catūhi tulāhi kāretukāmataṃ sandhāya vuttaṃ. Atthato pana yattakehi eḷakalomehi kātukāmo hoti, tesu dve koṭṭhāsā kāḷakānaṃ, eko odātānaṃ, eko gocariyānaṃ gahetabbo. Tulā nāma palasataṃ. Gocariyā nāma kapilavaṇṇā. Idaṃ me santhataṃ kārāpitanti yojanā.
(ণ) তিযোজনপরমন্তি গহিতট্ঠানতো তীণি যোজনানি পরমো অস্স অতিক্কমনস্সাতি ভাৰনপুংসকৰসেন অত্থো ৰেদিতব্বো। অতিক্কামিতানীতি অন্তমসো সুত্তকেনপি ভণ্ডকতভণ্ডহরণং ৰিনা অন্তমসো ৰাতাবাধপ্পটিকারত্থং কণ্ণচ্ছিদ্দে পক্খিত্তানি অতিক্কামিতানি।
(Ṇa) tiyojanaparamanti gahitaṭṭhānato tīṇi yojanāni paramo assa atikkamanassāti bhāvanapuṃsakavasena attho veditabbo. Atikkāmitānīti antamaso suttakenapi bhaṇḍakatabhaṇḍaharaṇaṃ vinā antamaso vātābādhappaṭikāratthaṃ kaṇṇacchidde pakkhittāni atikkāmitāni.
৩৮৭-৯. নিস্সজ্জিত্ৰানাতি ৰুত্তনযেন ৰত্থূনি নিস্সজ্জিত্ৰা। অথাতি দেসিতানন্তরং। ‘‘ইমং জানাহী’’তি গিহিং ৰদেতি যোজনা। সোতি আরামিকাদিকো গিহী। ‘‘ইমিনা কিং আহরামী’’তি ৰদেয্যাতি সম্বন্ধো। ৰদেয্যাতি যদি ৰদতি। ইমন্তি অৰত্ৰাতি ‘‘ইমং আহরা’’তি অৰত্ৰা ভিক্খূনং কপ্পিযং তেলাদিন্তি ৰদেতি সম্বন্ধো। আদিন্তি সন্ধিৰসেন নিগ্গহিতং। তেন পরিৰত্তেত্ৰান সো যং কপ্পিযং আহরতীতি যোজনা। তেনাতি নিস্সগ্গিযৰত্থুনা । দ্ৰেপেতে ঠপেত্ৰাতি এতে রূপিযপ্পটিগ্গাহকরূপিযসংৰোহারকে দ্ৰে ঠপেত্ৰা সেসেহি পরিভুঞ্জিতুং লব্ভন্তি সম্বন্ধো। পরিভুঞ্জিতুন্তি তং ভুঞ্জিতুং। ততোতি পরিৰত্তিতকপ্পিযতো। অঞ্ঞেনাতি অন্তমসো আরামিকেনাপি। তেসন্তি ৰুত্তানং দ্ৰিন্নং।
387-9.Nissajjitvānāti vuttanayena vatthūni nissajjitvā. Athāti desitānantaraṃ. ‘‘Imaṃ jānāhī’’ti gihiṃ vadeti yojanā. Soti ārāmikādiko gihī. ‘‘Iminā kiṃ āharāmī’’ti vadeyyāti sambandho. Vadeyyāti yadi vadati. Imanti avatvāti ‘‘imaṃ āharā’’ti avatvā bhikkhūnaṃ kappiyaṃ telādinti vadeti sambandho. Ādinti sandhivasena niggahitaṃ. Tena parivattetvāna so yaṃ kappiyaṃ āharatīti yojanā. Tenāti nissaggiyavatthunā . Dvepete ṭhapetvāti ete rūpiyappaṭiggāhakarūpiyasaṃvohārake dve ṭhapetvā sesehi paribhuñjituṃ labbhanti sambandho. Paribhuñjitunti taṃ bhuñjituṃ. Tatoti parivattitakappiyato. Aññenāti antamaso ārāmikenāpi. Tesanti vuttānaṃ dvinnaṃ.
৩৯০. অন্তমসো তন্নিব্বত্তা রুক্খচ্ছাযাপীতি সম্বন্ধো। তন্নিব্বত্তাতি নিস্সট্ঠৰত্থুনা কিণিত্ৰা গহিতআরামে রুক্খচ্ছাযা তন্নিব্বত্তা হোতীতি ততো নিব্বত্তাতি সমাসো। আদিতো সন্থতত্তযন্তি আদিম্হি কোসিযসুদ্ধকাল়কদ্ৰেভাগসন্থতত্তযং।
390. Antamaso tannibbattā rukkhacchāyāpīti sambandho. Tannibbattāti nissaṭṭhavatthunā kiṇitvā gahitaārāme rukkhacchāyā tannibbattā hotīti tato nibbattāti samāso. Ādito santhatattayanti ādimhi kosiyasuddhakāḷakadvebhāgasanthatattayaṃ.
৩৯১. এৰং চে নো লভেথাতি এৰং পরিৰত্তেত্ৰা কপ্পিযকারকো নো চে লভেয্য, সো গিহী ‘‘ইমং ছড্ডেহী’’তি সংসিযো ৰত্তব্বো, এৰং রূপিযছড্ডকো গিহী নো চে লভেয্য, সম্মতো ভিক্খু ছড্ডেয্যাতি সম্বন্ধো। সম্মতোতি ‘‘যো ছন্দাগতিং ন গচ্ছেয্যা’’তিআদিনা (পারা॰ ৫৮৪) ৰুত্তপঞ্চঙ্গসমন্নাগতো রূপিযছড্ডকসম্মুতিযা সম্মতো ভিক্খু।
391.Evaṃ ce no labhethāti evaṃ parivattetvā kappiyakārako no ce labheyya, so gihī ‘‘imaṃ chaḍḍehī’’ti saṃsiyo vattabbo, evaṃ rūpiyachaḍḍako gihī no ce labheyya, sammato bhikkhu chaḍḍeyyāti sambandho. Sammatoti ‘‘yo chandāgatiṃ na gaccheyyā’’tiādinā (pārā. 584) vuttapañcaṅgasamannāgato rūpiyachaḍḍakasammutiyā sammato bhikkhu.
৩৯২. এতানীতি পটিগ্গহিতরূপিযানি। দুতিযং পত্তন্তি ঊনপঞ্চবন্ধনে সতি ৰিঞ্ঞাপিতপত্তং সঙ্ঘে ৰত্তুং লব্ভরেতি পদসম্বন্ধো। ৰত্তুন্তি ‘‘অহং ভন্তে রূপিযং পটিগ্গহেসি’’ন্তিআদিনা ৰত্তুং। সেসানি অৰসেসনিস্সগ্গিযৰত্থূনি সঙ্ঘে একস্মিং গণে চ ৰত্তুং লব্ভরেতি যোজনা। ভাসন্তরেনপি ৰত্তুং লব্ভন্তি ন কেৰলং পাল়িভাসাযমেৰ, সীহল়াদিভাসাযপি নিস্সজ্জিতুং লব্ভতীতি অত্থো।
392.Etānīti paṭiggahitarūpiyāni. Dutiyaṃ pattanti ūnapañcabandhane sati viññāpitapattaṃ saṅghe vattuṃ labbhareti padasambandho. Vattunti ‘‘ahaṃ bhante rūpiyaṃ paṭiggahesi’’ntiādinā vattuṃ. Sesāni avasesanissaggiyavatthūni saṅghe ekasmiṃ gaṇe ca vattuṃ labbhareti yojanā. Bhāsantarenapi vattuṃ labbhanti na kevalaṃ pāḷibhāsāyameva, sīhaḷādibhāsāyapi nissajjituṃ labbhatīti attho.
৩৯৩. (ক) নানপ্পকারন্তি চীৰরাদীনং কপ্পিযভণ্ডানং ৰসেন অনেকৰিধং। কযো গহণং, ৰিক্কযো দানং। কযো চ ৰিক্কযো চ কযৰিক্কযং।
393. (Ka) nānappakāranti cīvarādīnaṃ kappiyabhaṇḍānaṃ vasena anekavidhaṃ. Kayo gahaṇaṃ, vikkayo dānaṃ. Kayo ca vikkayo ca kayavikkayaṃ.
(গ) ঊনপঞ্চবন্ধনেনাতি ঊনানি পঞ্চ বন্ধনানি যস্স, তেন, ইত্থম্ভূতলক্খণে করণৰচনং। যথাকথঞ্চি পন পঞ্চবন্ধনো পত্তো, পঞ্চবন্ধনোকাসো ৰা, সো অপত্তো, অঞ্ঞং ৰিঞ্ঞাপেতুং ৰট্টতি।
(Ga) ūnapañcabandhanenāti ūnāni pañca bandhanāni yassa, tena, itthambhūtalakkhaṇe karaṇavacanaṃ. Yathākathañci pana pañcabandhano patto, pañcabandhanokāso vā, so apatto, aññaṃ viññāpetuṃ vaṭṭati.
৩৯৪. সম্মন্নিত্ৰানাতি পদভাজনীযে ৰুত্তঞত্তিদুতিযকম্মেন সম্মন্নিত্ৰা। সঙ্ঘস্স পত্তন্তন্তি অন্ত-সদ্দেন পত্তানং অন্তে ভৰো লামকো পত্তোযেৰ গহিতো, নিস্সট্ঠপত্তস্স ৰিজ্জমানগুণং ৰত্ৰা থেরং, থেরস্স পত্তং দুতিযত্থেরং গাহাপেত্ৰা এতেনেৰ উপাযেন যাৰসঙ্ঘনৰকং গাহাপেত্ৰা যো তত্থ সন্নিপতিতসঙ্ঘস্স পত্তেসু পরিযন্তো পত্তো, তং পত্তন্তি। তস্সাতি কতনিস্সজ্জনস্স ভিক্খুনো। দাপযেতি সম্মতেন পত্তগাহাপকেন দাপেয্য।
394.Sammannitvānāti padabhājanīye vuttañattidutiyakammena sammannitvā. Saṅghassa pattantanti anta-saddena pattānaṃ ante bhavo lāmako pattoyeva gahito, nissaṭṭhapattassa vijjamānaguṇaṃ vatvā theraṃ, therassa pattaṃ dutiyattheraṃ gāhāpetvā eteneva upāyena yāvasaṅghanavakaṃ gāhāpetvā yo tattha sannipatitasaṅghassa pattesu pariyanto patto, taṃ pattanti. Tassāti katanissajjanassa bhikkhuno. Dāpayeti sammatena pattagāhāpakena dāpeyya.
৩৯৫. (ক) ভেসজ্জন্তি ভেসজ্জকিচ্চং করোতু ৰা, মা ৰা, এৰং লদ্ধৰোহারং সপ্পিআদিকং সত্তাহকালিকং।
395. (Ka) bhesajjanti bhesajjakiccaṃ karotu vā, mā vā, evaṃ laddhavohāraṃ sappiādikaṃ sattāhakālikaṃ.
(খ) গিম্হানস্স পচ্ছিমমাসে পুরিমো অদ্ধমাসো পরিযেসনকরণানং খেত্তং, পচ্ছিমদ্ধমাসো পরিযেসনকরণনিৰাসনানং খেত্তং, ৰস্সিকমাসা চত্তারোপি অধিট্ঠানেন সহ চতুন্নম্পি খেত্তং, ইমেযেৰ পঞ্চমাসা কুচ্ছিসমযো, ইতরসত্তমাসা পিট্ঠিসমযো। পিট্ঠিসমযে পরিযেসন্তস্স নিস্সগ্গিযং পাচিত্তিযং, কুচ্ছিসমযে চ অতিরেকদ্ধমাসে কত্ৰা পরিদহতো নিস্সগ্গিযং পাচিত্তিযং। তেন ৰুত্তং ‘‘অতিরেকমাসে সেসে’’তি।
(Kha) gimhānassa pacchimamāse purimo addhamāso pariyesanakaraṇānaṃ khettaṃ, pacchimaddhamāso pariyesanakaraṇanivāsanānaṃ khettaṃ, vassikamāsā cattāropi adhiṭṭhānena saha catunnampi khettaṃ, imeyeva pañcamāsā kucchisamayo, itarasattamāsā piṭṭhisamayo. Piṭṭhisamaye pariyesantassa nissaggiyaṃ pācittiyaṃ, kucchisamaye ca atirekaddhamāse katvā paridahato nissaggiyaṃ pācittiyaṃ. Tena vuttaṃ ‘‘atirekamāse sese’’ti.
(গ) সামং দত্ৰাতি ৰেয্যাৰচ্চাদীনি পচ্চাসীসমানো সযমেৰ দত্ৰা। অচ্ছিন্নন্তি তং অকরোন্তং দিস্ৰা সকসঞ্ঞায অচ্ছিন্নং। ভিক্খুনোপি চীৰরং ঠপেত্ৰা অঞ্ঞং পরিক্খারং, অনুপসম্পন্নস্স চ যং কিঞ্চি পরিক্খারং অচ্ছিন্দতো দুক্কটং। পরিচ্চজিত্ৰা দিন্নং সকসঞ্ঞং ৰিনা অচ্ছিন্দন্তো ভণ্ডগ্ঘেন কারেতব্বো।
(Ga) sāmaṃ datvāti veyyāvaccādīni paccāsīsamāno sayameva datvā. Acchinnanti taṃ akarontaṃ disvā sakasaññāya acchinnaṃ. Bhikkhunopi cīvaraṃ ṭhapetvā aññaṃ parikkhāraṃ, anupasampannassa ca yaṃ kiñci parikkhāraṃ acchindato dukkaṭaṃ. Pariccajitvā dinnaṃ sakasaññaṃ vinā acchindanto bhaṇḍagghena kāretabbo.
(ঙ) ৰিকপ্পন্তি ‘‘আযতঞ্চ করোহি ৰিত্থতঞ্চা’’তিআদিকং অধিকৰিধানং।
(Ṅa) vikappanti ‘‘āyatañca karohi vitthatañcā’’tiādikaṃ adhikavidhānaṃ.
(চ) অচ্চেকচীৰরন্তি গমিকগিলানগব্ভিনিঅভিনৰুপ্পন্নসদ্ধানং অঞ্ঞতরেন পৰারণমাসস্স জুণ্হপক্খপঞ্চমিতো পট্ঠায ‘‘ৰস্সাৰাসিকং দস্সামী’’তি দিন্নং অচ্চাযিকচীৰরং। অচ্চেকচীৰরস্স অনত্থতে কথিনে একাদসদিৰসাধিকো মাসো, অত্থতে কথিনে একাদসদিৰসাধিকা পঞ্চ মাসা চীৰরকালসমযো, তং অতিক্কামেন্তস্স নিস্সগ্গিযং পাচিত্তিযং। তেন ৰুত্তং ‘‘চীৰরকালসমযং অতিক্কামিত’’ন্তি। কালো চ সো সমযো চ চীৰরস্স কালসমযো, তং।
(Ca) accekacīvaranti gamikagilānagabbhiniabhinavuppannasaddhānaṃ aññatarena pavāraṇamāsassa juṇhapakkhapañcamito paṭṭhāya ‘‘vassāvāsikaṃ dassāmī’’ti dinnaṃ accāyikacīvaraṃ. Accekacīvarassa anatthate kathine ekādasadivasādhiko māso, atthate kathine ekādasadivasādhikā pañca māsā cīvarakālasamayo, taṃ atikkāmentassa nissaggiyaṃ pācittiyaṃ. Tena vuttaṃ ‘‘cīvarakālasamayaṃ atikkāmita’’nti. Kālo ca so samayo ca cīvarassa kālasamayo, taṃ.
(ছ) সপ্পটিভযে আরঞ্ঞকসেনাসনে ৰস্সং উপগন্ত্ৰা ৰিহরন্তেন ভিক্খুনা তিণ্ণং চীৰরানং অঞ্ঞতরং চীৰরং পুরিমিকায উপগন্ত্ৰা মহাপৰারণায পৰারিততা, কত্তিকমাসতা, পঞ্চধনুসতিকপচ্ছি মপ্পমাণযুত্তসেনাসনতা, সাসঙ্কসপ্পটিভযতাতি এৰং ৰুত্তচতুরঙ্গসম্পত্তিযাঅন্তরঘরে নিক্খিপিত্ৰা সতি পচ্চযে ছারত্তপরমং তেন চীৰরেন ৰিপ্পৰসিতব্বং। ততো চে উত্তরি ৰিপ্পৰসেয্য, নিস্সগ্গিযং পাচিত্তিযং। তেন ৰুত্তং ‘‘অতিরেকছারত্ত’’ন্তিআদি।
(Cha) sappaṭibhaye āraññakasenāsane vassaṃ upagantvā viharantena bhikkhunā tiṇṇaṃ cīvarānaṃ aññataraṃ cīvaraṃ purimikāya upagantvā mahāpavāraṇāya pavāritatā, kattikamāsatā, pañcadhanusatikapacchi mappamāṇayuttasenāsanatā, sāsaṅkasappaṭibhayatāti evaṃ vuttacaturaṅgasampattiyāantaraghare nikkhipitvā sati paccaye chārattaparamaṃ tena cīvarena vippavasitabbaṃ. Tato ce uttari vippavaseyya, nissaggiyaṃ pācittiyaṃ. Tena vuttaṃ ‘‘atirekachāratta’’ntiādi.
(জ) জানন্তি জানন্তো।
(Ja) jānanti jānanto.
৩৯৬. আদিম্হি ৰিযাতি পঠমনিস্সগ্গিযে ৰিয।
396.Ādimhi viyāti paṭhamanissaggiye viya.
৩৯৭. (খ) অন্তরঘরং পৰিট্ঠায ভিক্খুনিযা হত্থতো খাদনীযাদিপ্পটিগ্গহণে চ ভিক্খূসু কুলেসু ভুঞ্জন্তেসু ‘‘ইধ পূৰং, সূপং দেথা’’তিআদিনা নযেন ৰোসাসমানায ভিক্খুনিযা অনপসাদনেন চ সেখসম্মতেসু কুলেসু পুব্বে অনিমন্তিতস্স খাদনীযাদীনং পটিগ্গহণে চ সপ্পটিভযে আরঞ্ঞকসেনাসনে ৰিহরন্তস্স পুব্বে অপ্পটিসংৰিদিতখাদনীযাদিপ্পটিগ্গহণে চ পাটিদেসনীযং নাম আপত্তিনিকাযো ৰুত্তো। তেন ৰুত্তং ‘‘গারয্হ’’ন্তিআদি।
397. (Kha) antaragharaṃ paviṭṭhāya bhikkhuniyā hatthato khādanīyādippaṭiggahaṇe ca bhikkhūsu kulesu bhuñjantesu ‘‘idha pūvaṃ, sūpaṃ dethā’’tiādinā nayena vosāsamānāya bhikkhuniyā anapasādanena ca sekhasammatesu kulesu pubbe animantitassa khādanīyādīnaṃ paṭiggahaṇe ca sappaṭibhaye āraññakasenāsane viharantassa pubbe appaṭisaṃviditakhādanīyādippaṭiggahaṇe ca pāṭidesanīyaṃ nāma āpattinikāyo vutto. Tena vuttaṃ ‘‘gārayha’’ntiādi.
৩৯৮. ‘‘অদেসনাগামিনিয’’ন্তিআদি ‘‘ন দেসযে’’তি এত্থ কম্মং। পারাজিকা সঙ্ঘাদিসেসা চ অদেসনাগামিনিযো নাম। ন আপত্তি অনাপত্তি, তং। কতদেসনং দেসিতং। নানাসংৰাসনিস্সীমট্ঠিতানং ন দেসযেতি সম্বন্ধো। এৰং চতুপঞ্চহি ন দেসযে, মনসা ন দেসযে, অপকতত্তানং ন দেসযে, নানা ‘‘একা’’তি ন দেসযেতি। মনসাতি কেৰলং চিত্তেনেৰ। নানাতি সম্বহুলা আপত্তিযো ‘‘একা’’তি ৰত্ৰা। একং পন আপত্তিং ‘‘সম্বহুলা’’তি দেসেতুং ৰট্টতীতি।
398.‘‘Adesanāgāminiya’’ntiādi ‘‘na desaye’’ti ettha kammaṃ. Pārājikā saṅghādisesā ca adesanāgāminiyo nāma. Na āpatti anāpatti, taṃ. Katadesanaṃ desitaṃ. Nānāsaṃvāsanissīmaṭṭhitānaṃ na desayeti sambandho. Evaṃ catupañcahi na desaye, manasā na desaye, apakatattānaṃ na desaye, nānā ‘‘ekā’’ti na desayeti. Manasāti kevalaṃ citteneva. Nānāti sambahulā āpattiyo ‘‘ekā’’ti vatvā. Ekaṃ pana āpattiṃ ‘‘sambahulā’’ti desetuṃ vaṭṭatīti.
দেসনানিদ্দেসৰণ্ণনা নিট্ঠিতা।
Desanāniddesavaṇṇanā niṭṭhitā.
