| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৪৩. ছন্দদাননিদ্দেসৰণ্ণনা
43. Chandadānaniddesavaṇṇanā
৩৯৯. কম্মপ্পত্তেতি উপোসথাদিনো কম্মস্স পত্তে যুত্তে অনুরূপে। সঙ্ঘে সমাগতেতি চতুৰগ্গাদিকে সঙ্ঘে একত্থ সন্নিপতিতে। এত্থ চ ছন্দহারকেনাপি সদ্ধিং চতুৰগ্গাদিকো ৰেদিতব্বো।
399.Kammappatteti uposathādino kammassa patte yutte anurūpe. Saṅghe samāgateti catuvaggādike saṅghe ekattha sannipatite. Ettha ca chandahārakenāpi saddhiṃ catuvaggādiko veditabbo.
৪০০. ছন্দদানাদিৰিধিং দস্সেতুং ‘‘এক’’ন্তিআদিমাহ। উপাগম্মাতি সন্তিং আপত্তিং পকাসেত্ৰা ততো পচ্ছা উপগন্ত্ৰা। ছন্দং দদেতি ৰক্খমানেসু তীসু একেনপি বহি উপোসথং কত্ৰা আগতো ছন্দং দদেয্য, কেনচি করণীযেন সন্নিপাতট্ঠানং গন্ত্ৰা কাযসামগ্গিং অদেন্তো পন পারিসুদ্ধিং দেন্তো ছন্দং দদেয্য।
400. Chandadānādividhiṃ dassetuṃ ‘‘eka’’ntiādimāha. Upāgammāti santiṃ āpattiṃ pakāsetvā tato pacchā upagantvā. Chandaṃ dadeti vakkhamānesu tīsu ekenapi bahi uposathaṃ katvā āgato chandaṃ dadeyya, kenaci karaṇīyena sannipātaṭṭhānaṃ gantvā kāyasāmaggiṃ adento pana pārisuddhiṃ dento chandaṃ dadeyya.
৪০২. উভিন্নং দানে কিংপযোজনন্তি আহ ‘‘পারিসুদ্ধী’’তিআদি। পারিসুদ্ধিপ্পদানেন সঙ্ঘস্স অত্তনো চাপি উপোসথং সম্পাদেতীতি সম্বন্ধো। পরিসুদ্ধি এৰ পারিসুদ্ধি, তস্স পদানং, তেন। ননু চ পারিসুদ্ধিতাপদানমত্তমেৰ উপোসথকম্মং নামাতি পারিসুদ্ধিপ্পদানং অত্তনো উপোসথং সম্পাদেতু, কথং সঙ্ঘস্সাতি? ৰুচ্চতে – পারিসুদ্ধিদানস্স ধম্মকম্মতাসম্পাদনেন সঙ্ঘস্সাপি উপোসথং সম্পাদেতীতি।
402. Ubhinnaṃ dāne kiṃpayojananti āha ‘‘pārisuddhī’’tiādi. Pārisuddhippadānena saṅghassa attano cāpi uposathaṃ sampādetīti sambandho. Parisuddhi eva pārisuddhi, tassa padānaṃ, tena. Nanu ca pārisuddhitāpadānamattameva uposathakammaṃ nāmāti pārisuddhippadānaṃ attano uposathaṃ sampādetu, kathaṃ saṅghassāti? Vuccate – pārisuddhidānassa dhammakammatāsampādanena saṅghassāpi uposathaṃ sampādetīti.
এত্থ পন চতূসু একস্স ছন্দপারিসুদ্ধিং আহরিত্ৰা তযো পারিসুদ্ধিউপোসথং করোন্তি, তীসু ৰা একস্স ছন্দপারিসুদ্ধিং আহরিত্ৰা দ্ৰে পাতিমোক্খং উদ্দিসন্তি, অধম্মেন ৰগ্গং উপোসথকম্মং। চত্তারো পারিসুদ্ধিউপোসথং করোন্তি, তযো ৰা দ্ৰে ৰা পাতিমোক্খং উদ্দিসন্তি, অধম্মেন সমগ্গং। চতূসু একস্স আহরিত্ৰা তযো পাতিমোক্খং উদ্দিসন্তি, তীসু ৰা একস্স আহরিত্ৰা দ্ৰে পারিসুদ্ধিউপোসথং করোন্তি, ধম্মেন ৰগ্গং। সচে পন চত্তারো সন্নিপতিত্ৰা পাতিমোক্খং উদ্দিসন্তি, তযো পারিসুদ্ধিউপোসথং, দ্ৰে অঞ্ঞমঞ্ঞং পারিসুদ্ধিউপোসথং করোন্তি, ধম্মেন সমগ্গং। পৰারণকম্মেসুপি পঞ্চসু একস্স পৰারণং আহরিত্ৰা চত্তারো গণঞত্তিং ঠপেত্ৰা পৰারেন্তি, চতূসু তীসু ৰা একস্স আহরিত্ৰা তযো দ্ৰে ৰা সঙ্ঘঞত্তিং ঠপেত্ৰা পৰারেন্তি, অধম্মেন ৰগ্গং পৰারণকম্মন্তিআদি ৰুত্তনযমেৰ। সেসকম্মং ৰিবাধতীতি অৰসেসসঙ্ঘকিচ্চং ৰিবাধেতি অলদ্ধাধিপ্পাযত্তাতি অধিপ্পাযো।
Ettha pana catūsu ekassa chandapārisuddhiṃ āharitvā tayo pārisuddhiuposathaṃ karonti, tīsu vā ekassa chandapārisuddhiṃ āharitvā dve pātimokkhaṃ uddisanti, adhammena vaggaṃ uposathakammaṃ. Cattāro pārisuddhiuposathaṃ karonti, tayo vā dve vā pātimokkhaṃ uddisanti, adhammena samaggaṃ. Catūsu ekassa āharitvā tayo pātimokkhaṃ uddisanti, tīsu vā ekassa āharitvā dve pārisuddhiuposathaṃ karonti, dhammena vaggaṃ. Sace pana cattāro sannipatitvā pātimokkhaṃ uddisanti, tayo pārisuddhiuposathaṃ, dve aññamaññaṃ pārisuddhiuposathaṃ karonti, dhammena samaggaṃ. Pavāraṇakammesupi pañcasu ekassa pavāraṇaṃ āharitvā cattāro gaṇañattiṃ ṭhapetvā pavārenti, catūsu tīsu vā ekassa āharitvā tayo dve vā saṅghañattiṃ ṭhapetvā pavārenti, adhammena vaggaṃ pavāraṇakammantiādi vuttanayameva. Sesakammaṃ vibādhatīti avasesasaṅghakiccaṃ vibādheti aladdhādhippāyattāti adhippāyo.
৪০৩. দ্ৰযন্তি উপোসথকরণঞ্চেৰ অৰসেসকিচ্চঞ্চ। অত্তনো ন সাধেতীতি সম্বন্ধনীযং।
403.Dvayanti uposathakaraṇañceva avasesakiccañca. Attano na sādhetīti sambandhanīyaṃ.
৪০৪. হরেয্যাতি পুব্বে ৰুত্তং সুদ্ধিকছন্দং ৰা ইমং ৰা ছন্দপারিসুদ্ধিং হরেয্য। পরম্পরা ন হারযেতি পরম্পরা ন আহরেয্য। কস্মাতি আহ ‘‘পরম্পরাহটা’’তিআদি। তেনাতি পঠমতো গহিতছন্দপারিসুদ্ধিকেন। পরম্পরাহটাতি যথা বিল়ালসঙ্খলিকায পঠমং ৰলযং দুতিযং পাপুণাতি, ততিযং ন পাপুণাতি, এৰং দুতিযস্স আগচ্ছতি, ততিযস্স ন আগচ্ছতি। ‘‘পরিম্পরাহটা ছন্দ-পারিসুদ্ধি ন গচ্ছতী’’তি ৰা পাঠো।
404.Hareyyāti pubbe vuttaṃ suddhikachandaṃ vā imaṃ vā chandapārisuddhiṃ hareyya. Paramparā na hārayeti paramparā na āhareyya. Kasmāti āha ‘‘paramparāhaṭā’’tiādi. Tenāti paṭhamato gahitachandapārisuddhikena. Paramparāhaṭāti yathā biḷālasaṅkhalikāya paṭhamaṃ valayaṃ dutiyaṃ pāpuṇāti, tatiyaṃ na pāpuṇāti, evaṃ dutiyassa āgacchati, tatiyassa na āgacchati. ‘‘Parimparāhaṭā chanda-pārisuddhi na gacchatī’’ti vā pāṭho.
৪০৫. সব্বূপচারন্তি ‘‘একংসং চীৰরং কত্ৰা’’ তিআদি সব্বং উপচারং।
405.Sabbūpacāranti ‘‘ekaṃsaṃ cīvaraṃ katvā’’ tiādi sabbaṃ upacāraṃ.
৪০৬. সো আগতো আরোচেত্ৰা সঙ্ঘং পৰারেয্যাতি যোজনা। অথাতি অনন্তরত্থে। আগতোতি পৰারণং গহেত্ৰা আগতো ভিক্খু। আরোচেত্ৰাতি ভিক্খুসঙ্ঘস্স আরোচেত্ৰা। এৰন্তি ৰক্খমানক্কমেন।
406. So āgato ārocetvā saṅghaṃ pavāreyyāti yojanā. Athāti anantaratthe. Āgatoti pavāraṇaṃ gahetvā āgato bhikkhu. Ārocetvāti bhikkhusaṅghassa ārocetvā. Evanti vakkhamānakkamena.
৪০৭-৮. গহেত্ৰা হারকোতি সম্বন্ধো। নাহটাতি আহটাৰ ন হোতীতি অত্থো। হারকো সঙ্ঘং পত্ৰা তথা হেয্য, আহটা হোতীতি যোজনা। তথা হেয্যাতি ৰিব্ভন্তাদিকো ভৰেয্য।
407-8. Gahetvā hārakoti sambandho. Nāhaṭāti āhaṭāva na hotīti attho. Hārako saṅghaṃ patvā tathā heyya, āhaṭā hotīti yojanā. Tathā heyyāti vibbhantādiko bhaveyya.
৪০৯. সঙ্ঘং পত্তো পমত্তো ৰা সুত্তো ৰা নারোচযেয্য অনাপত্তি চাতি সম্বন্ধো। চ-সদ্দো ছন্দপারিসুদ্ধিহরণং সম্পিণ্ডেতীতি।
409. Saṅghaṃ patto pamatto vā sutto vā nārocayeyya anāpatti cāti sambandho. Ca-saddo chandapārisuddhiharaṇaṃ sampiṇḍetīti.
ছন্দদাননিদ্দেসৰণ্ণনা নিট্ঠিতা।
Chandadānaniddesavaṇṇanā niṭṭhitā.
