| Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi |
೪೩೮. ದದ್ದರಜಾತಕಂ (೧೨)
438. Daddarajātakaṃ (12)
೧೦೫.
105.
ಯೋ ತೇ ಪುತ್ತಕೇ ಅಖಾದಿ, ದಿನ್ನಭತ್ತೋ ಅದೂಸಕೇ।
Yo te puttake akhādi, dinnabhatto adūsake;
ತಸ್ಮಿಂ ದಾಠಂ ನಿಪಾತೇಹಿ, ಮಾ ತೇ ಮುಚ್ಚಿತ್ಥ ಜೀವತೋ॥
Tasmiṃ dāṭhaṃ nipātehi, mā te muccittha jīvato.
೧೦೬.
106.
ಆಕಿಣ್ಣಲುದ್ದೋ ಪುರಿಸೋ, ಧಾತಿಚೇಲಂವ ಮಕ್ಖಿತೋ।
Ākiṇṇaluddo puriso, dhāticelaṃva makkhito;
ಪದೇಸಂ ತಂ ನ ಪಸ್ಸಾಮಿ, ಯತ್ಥ ದಾಠಂ ನಿಪಾತಯೇ॥
Padesaṃ taṃ na passāmi, yattha dāṭhaṃ nipātaye.
೧೦೭.
107.
ಅಕತಞ್ಞುಸ್ಸ ಪೋಸಸ್ಸ, ನಿಚ್ಚಂ ವಿವರದಸ್ಸಿನೋ।
Akataññussa posassa, niccaṃ vivaradassino;
ಸಬ್ಬಂ ಚೇ ಪಥವಿಂ ದಜ್ಜಾ, ನೇವ ನಂ ಅಭಿರಾಧಯೇ॥
Sabbaṃ ce pathaviṃ dajjā, neva naṃ abhirādhaye.
೧೦೮.
108.
ಕಿನ್ನು ಸುಬಾಹು ತರಮಾನರೂಪೋ, ಪಚ್ಚಾಗತೋಸಿ ಸಹ ಮಾಣವೇನ।
Kinnu subāhu taramānarūpo, paccāgatosi saha māṇavena;
ಕಿಂ ಕಿಚ್ಚಮತ್ಥಂ ಇಧಮತ್ಥಿ ತುಯ್ಹಂ, ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ॥
Kiṃ kiccamatthaṃ idhamatthi tuyhaṃ, akkhāhi me pucchito etamatthaṃ.
೧೦೯.
109.
ಯೋ ತೇ ಸಖಾ ದದ್ದರೋ ಸಾಧುರೂಪೋ, ತಸ್ಸ ವಧಂ ಪರಿಸಙ್ಕಾಮಿ ಅಜ್ಜ।
Yo te sakhā daddaro sādhurūpo, tassa vadhaṃ parisaṅkāmi ajja;
ಪುರಿಸಸ್ಸ ಕಮ್ಮಾಯತನಾನಿ ಸುತ್ವಾ, ನಾಹಂ ಸುಖಿಂ ದದ್ದರಂ ಅಜ್ಜ ಮಞ್ಞೇ॥
Purisassa kammāyatanāni sutvā, nāhaṃ sukhiṃ daddaraṃ ajja maññe.
೧೧೦.
110.
ಕಾನಿಸ್ಸ ಕಮ್ಮಾಯತನಾನಿ ಅಸ್ಸು, ಪುರಿಸಸ್ಸ ವುತ್ತಿಸಮೋಧಾನತಾಯ।
Kānissa kammāyatanāni assu, purisassa vuttisamodhānatāya;
ಕಂ ವಾ ಪಟಿಞ್ಞಂ ಪುರಿಸಸ್ಸ ಸುತ್ವಾ, ಪರಿಸಙ್ಕಸಿ ದದ್ದರಂ ಮಾಣವೇನ॥
Kaṃ vā paṭiññaṃ purisassa sutvā, parisaṅkasi daddaraṃ māṇavena.
೧೧೧.
111.
ಚಿಣ್ಣಾ ಕಲಿಙ್ಗಾ ಚರಿತಾ ವಣಿಜ್ಜಾ, ವೇತ್ತಾಚರೋ ಸಙ್ಕುಪಥೋಪಿ ಚಿಣ್ಣೋ।
Ciṇṇā kaliṅgā caritā vaṇijjā, vettācaro saṅkupathopi ciṇṇo;
ನಟೇಹಿ ಚಿಣ್ಣಂ ಸಹ ವಾಕುರೇಹಿ 1, ದಣ್ಡೇನ ಯುದ್ಧಮ್ಪಿ ಸಮಜ್ಜಮಜ್ಝೇ॥
Naṭehi ciṇṇaṃ saha vākurehi 2, daṇḍena yuddhampi samajjamajjhe.
೧೧೨.
112.
೧೧೩.
113.
ತಾನಿಸ್ಸ ಕಮ್ಮಾಯತನಾನಿ ಅಸ್ಸು, ಪುರಿಸಸ್ಸ ವುತ್ತಿಸಮೋಧಾನತಾಯ।
Tānissa kammāyatanāni assu, purisassa vuttisamodhānatāya;
ಯಥಾ ಅಯಂ ದಿಸ್ಸತಿ ಲೋಮಪಿಣ್ಡೋ, ಗಾವೋ ಹತಾ ಕಿಂ ಪನ ದದ್ದರಸ್ಸಾತಿ॥
Yathā ayaṃ dissati lomapiṇḍo, gāvo hatā kiṃ pana daddarassāti.
ದದ್ದರಜಾತಕಂ ದ್ವಾದಸಮಂ।
Daddarajātakaṃ dvādasamaṃ.
ನವಕನಿಪಾತಂ ನಿಟ್ಠಿತಂ।
Navakanipātaṃ niṭṭhitaṃ.
ತಸ್ಸುದ್ದಾನಂ –
Tassuddānaṃ –
ವರಗಿಜ್ಝ ಸಮಜ್ಜನ ಹಂಸವರೋ, ನಿಧಿಸವ್ಹಯ ಹಾರಿತ ಪಾಟಲಿಕೋ।
Varagijjha samajjana haṃsavaro, nidhisavhaya hārita pāṭaliko;
ಅಜರಾಮರ ಧಙ್ಕ ತಿತಿಕ್ಖ ಕುತೋ, ಅಥ ದ್ವಾದಸ ಪೇಕ್ಖನ ದದ್ದರಿಭೀತಿ॥
Ajarāmara dhaṅka titikkha kuto, atha dvādasa pekkhana daddaribhīti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೪೩೮] ೧೨. ದದ್ದರಜಾತಕವಣ್ಣನಾ • [438] 12. Daddarajātakavaṇṇanā
