| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๔. จูฬโพธิจริยา
4. Cūḷabodhicariyā
๒๖.
26.
‘‘ปุนาปรํ ยทา โหมิ, จูฬโพธิ สุสีลวา;
‘‘Punāparaṃ yadā homi, cūḷabodhi susīlavā;
ภวํ ทิสฺวาน ภยโต, เนกฺขมฺมํ อภินิกฺขมิํฯ
Bhavaṃ disvāna bhayato, nekkhammaṃ abhinikkhamiṃ.
๒๗.
27.
‘‘ยา เม ทุติยิกา อาสิ, พฺราหฺมณี กนกสนฺนิภา;
‘‘Yā me dutiyikā āsi, brāhmaṇī kanakasannibhā;
สาปิ วเฎฺฎ อนเปกฺขา, เนกฺขมฺมํ อภินิกฺขมิฯ
Sāpi vaṭṭe anapekkhā, nekkhammaṃ abhinikkhami.
๒๘.
28.
‘‘นิราลยา ฉินฺนพนฺธู, อนเปกฺขา กุเล คเณ;
‘‘Nirālayā chinnabandhū, anapekkhā kule gaṇe;
จรนฺตา คามนิคมํ, พาราณสิมุปาคมุํฯ
Carantā gāmanigamaṃ, bārāṇasimupāgamuṃ.
๒๙.
29.
‘‘ตตฺถ วสาม นิปกา, อสํสฎฺฐา กุเล คเณ;
‘‘Tattha vasāma nipakā, asaṃsaṭṭhā kule gaṇe;
นิรากุเล อปฺปสเทฺท, ราชุยฺยาเน วสามุโภฯ
Nirākule appasadde, rājuyyāne vasāmubho.
๓๐.
30.
‘‘อุยฺยานทสฺสนํ คนฺตฺวา, ราชา อทฺทส พฺราหฺมณิํ;
‘‘Uyyānadassanaṃ gantvā, rājā addasa brāhmaṇiṃ;
อุปคมฺม มมํ ปุจฺฉิ, ‘ตุเยฺหสา กา กสฺส ภริยา’ฯ
Upagamma mamaṃ pucchi, ‘tuyhesā kā kassa bhariyā’.
๓๑.
31.
‘‘เอวํ วุเตฺต อหํ ตสฺส, อิทํ วจนมพฺรวิํ;
‘‘Evaṃ vutte ahaṃ tassa, idaṃ vacanamabraviṃ;
‘น มยฺหํ ภริยา เอสา, สหธมฺมา เอกสาสนี’ฯ
‘Na mayhaṃ bhariyā esā, sahadhammā ekasāsanī’.
๓๒.
32.
นิปฺปีฬยโนฺต พลสา, อเนฺตปุรํ ปเวสยิฯ
Nippīḷayanto balasā, antepuraṃ pavesayi.
๓๓.
33.
‘‘โอทปตฺตกิยา มยฺหํ, สหชา เอกสาสนี;
‘‘Odapattakiyā mayhaṃ, sahajā ekasāsanī;
อากฑฺฒิตฺวา นยนฺติยา, โกโป เม อุปปชฺชถฯ
Ākaḍḍhitvā nayantiyā, kopo me upapajjatha.
๓๔.
34.
‘‘สห โกเป สมุปฺปเนฺน, สีลพฺพตมนุสฺสริํ;
‘‘Saha kope samuppanne, sīlabbatamanussariṃ;
ตเตฺถว โกปํ นิคฺคณฺหิํ, นาทาสิํ วฑฺฒิตูปริฯ
Tattheva kopaṃ niggaṇhiṃ, nādāsiṃ vaḍḍhitūpari.
๓๕.
35.
‘‘ยทิ นํ พฺราหฺมณิํ โกจิ, โกเฎฺฎยฺย ติณฺหสตฺติยา;
‘‘Yadi naṃ brāhmaṇiṃ koci, koṭṭeyya tiṇhasattiyā;
เนว สีลํ ปภิเนฺทยฺยํ, โพธิยาเยว การณาฯ
Neva sīlaṃ pabhindeyyaṃ, bodhiyāyeva kāraṇā.
๓๖.
36.
‘‘น เมสา พฺราหฺมณี เทสฺสา, นปิ เม พลํ น วิชฺชติ;
‘‘Na mesā brāhmaṇī dessā, napi me balaṃ na vijjati;
สพฺพญฺญุตํ ปิยํ มยฺหํ, ตสฺมา สีลานุรกฺขิส’’นฺติฯ
Sabbaññutaṃ piyaṃ mayhaṃ, tasmā sīlānurakkhisa’’nti.
จูฬโพธิจริยํ จตุตฺถํฯ
Cūḷabodhicariyaṃ catutthaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๔. จูฬโพธิจริยาวณฺณนา • 4. Cūḷabodhicariyāvaṇṇanā
