| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
៥. ចីវរអច្ឆិន្ទនសិក្ខាបទវណ្ណនា
5. Cīvaraacchindanasikkhāpadavaṇṇanā
៦៣១. បញ្ចមេ យម្បិ ត្យាហន្តិ ឯត្ថ យន្តិ ការណវចនំ, តស្មា ឯវមេត្ថ សម្ពន្ធោ វេទិតព្ពោ – មយា សទ្ធិំ ជនបទចារិកំ បក្កមិស្សតីតិ យំ ការណំ និស្សាយ អហំ តេ, អាវុសោ, ចីវរំ អទាសិំ, តំ ន ករោសីតិ កុបិតោ អនត្តមនោ អច្ឆិន្ទីតិ។ យន្តិ វា ចីវរំ បរាមសតិ, តត្ថ ‘‘មយា សទ្ធិំ ជនបទចារិកំ បក្កមិស្សតីតិ យម្បិ តេ អហំ ចីវរំ អទាសិំ, តំ ចីវរំ គណ្ហិស្សាមីតិ កុបិតោ អនត្តមនោ អច្ឆិន្ទី’’តិ សម្ពន្ធិតព្ពំ។
631. Pañcame yampi tyāhanti ettha yanti kāraṇavacanaṃ, tasmā evamettha sambandho veditabbo – mayā saddhiṃ janapadacārikaṃ pakkamissatīti yaṃ kāraṇaṃ nissāya ahaṃ te, āvuso, cīvaraṃ adāsiṃ, taṃ na karosīti kupito anattamano acchindīti. Yanti vā cīvaraṃ parāmasati, tattha ‘‘mayā saddhiṃ janapadacārikaṃ pakkamissatīti yampi te ahaṃ cīvaraṃ adāsiṃ, taṃ cīvaraṃ gaṇhissāmīti kupito anattamano acchindī’’ti sambandhitabbaṃ.
៦៣៣. អាណត្តោ ពហូនិ គណ្ហាតិ, ឯកំ បាចិត្តិយន្តិ ‘‘ចីវរំ គណ្ហា’’តិ អាណត្តិយា ឯកចីវរវិសយត្តា ឯកមេវ បាចិត្តិយំ។ វាចាយ វាចាយ ទុក្កដន្តិ ឯត្ថ អច្ឆិន្នេសុ វត្ថុគណនាយ បាចិត្តិយានិ។ ឯកវាចាយ សម្ពហុលា អាបត្តិយោតិ ឥទំ អច្ឆិន្នេសុ វត្ថុគណនាយ អាបជ្ជិតព្ពំ បាចិត្តិយាបត្តិំ សន្ធាយ វុត្តំ។ អាណត្តិយា អាបជ្ជិតព្ពំ បន ទុក្កដំ ឯកមេវ។
633.Āṇatto bahūni gaṇhāti, ekaṃ pācittiyanti ‘‘cīvaraṃ gaṇhā’’ti āṇattiyā ekacīvaravisayattā ekameva pācittiyaṃ. Vācāya vācāya dukkaṭanti ettha acchinnesu vatthugaṇanāya pācittiyāni. Ekavācāya sambahulā āpattiyoti idaṃ acchinnesu vatthugaṇanāya āpajjitabbaṃ pācittiyāpattiṃ sandhāya vuttaṃ. Āṇattiyā āpajjitabbaṃ pana dukkaṭaṃ ekameva.
៦៣៤. ឯវន្តិ ឥមិនា ‘‘វត្ថុគណនាយ ទុក្កដានី’’តិ ឥទំ បរាមសតិ។ ឯសេវ នយោតិ សិថិលំ គាឡ្ហញ្ច បក្ខិត្តាសុ អាបត្តិយា ពហុត្តំ ឯកត្តញ្ច អតិទិស្សតិ។
634.Evanti iminā ‘‘vatthugaṇanāya dukkaṭānī’’ti idaṃ parāmasati. Eseva nayoti sithilaṃ gāḷhañca pakkhittāsu āpattiyā bahuttaṃ ekattañca atidissati.
៦៣៥. អាវុសោ, មយន្តិអាទីសុ គណ្ហិតុកាមតាយ ឯវំ វុត្តេបិ តេនេវ ទិន្នត្តា អនាបត្តិ។ អម្ហាកំ សន្តិកេ ឧបជ្ឈំ គណ្ហិស្សតីតិ ឥទំ សាមណេរស្សបិ ទានំ ទីបេតិ។ តស្មា កិញ្ចាបិ បាឡិយំ ‘‘ភិក្ខុស្ស សាមំ ចីវរំ ទត្វា’’តិ វុត្តំ, តថាបិ អនុបសម្បន្នកាលេ ទត្វាបិ ឧបសម្បន្នកាលេ អច្ឆិន្ទន្តស្ស បាចិត្តិយមេវាតិ វេទិតព្ពំ។ អច្ឆិន្ទនសមយេ ឧបសម្បន្នភាវោយេវ ហេត្ថ បមាណំ។ ទេតីតិ តុដ្ឋោ វា កុបិតោ វា ទេតិ។ រុន្ធថាតិ និវារេថ។ ឯវំ បន ទាតុំ ន វដ្ដតីតិ ឯត្ថ ឯវំ ទិន្នំ ន តាវ តស្ស សន្តកន្តិ អនធិដ្ឋហិត្វាវ បរិភុញ្ជិតព្ពន្តិ វេទិតព្ពំ។ អាហរាបេតុំ បន វដ្ដតីតិ ឯវំ ទិន្នំ ភតិសទិសត្តា អាហរាបេតុំ វដ្ដតិ។ ចជិត្វា ទិន្នន្តិ វុត្តនយេន អទត្វា អនបេក្ខេន ហុត្វា តស្សេវ ទិន្នំ។ ភណ្ឌគ្ឃេន ការេតព្ពោតិ សកសញ្ញាយ វិនា គណ្ហន្តោ ភណ្ឌំ អគ្ឃាបេត្វា អាបត្តិយា ការេតព្ពោ។ វិកប្បនុបគបច្ឆិមចីវរតា, សាមំ ទិន្នតា, សកសញ្ញិតា, ឧបសម្បន្នតា, កោធវសេន អច្ឆិន្ទនំ អច្ឆិន្ទាបនំ វាតិ ឥមានេត្ថ បញ្ច អង្គានិ។
635.Āvuso, mayantiādīsu gaṇhitukāmatāya evaṃ vuttepi teneva dinnattā anāpatti. Amhākaṃ santike upajjhaṃ gaṇhissatīti idaṃ sāmaṇerassapi dānaṃ dīpeti. Tasmā kiñcāpi pāḷiyaṃ ‘‘bhikkhussa sāmaṃ cīvaraṃ datvā’’ti vuttaṃ, tathāpi anupasampannakāle datvāpi upasampannakāle acchindantassa pācittiyamevāti veditabbaṃ. Acchindanasamaye upasampannabhāvoyeva hettha pamāṇaṃ. Detīti tuṭṭho vā kupito vā deti. Rundhathāti nivāretha. Evaṃ pana dātuṃ na vaṭṭatīti ettha evaṃ dinnaṃ na tāva tassa santakanti anadhiṭṭhahitvāva paribhuñjitabbanti veditabbaṃ. Āharāpetuṃ pana vaṭṭatīti evaṃ dinnaṃ bhatisadisattā āharāpetuṃ vaṭṭati. Cajitvā dinnanti vuttanayena adatvā anapekkhena hutvā tasseva dinnaṃ. Bhaṇḍagghena kāretabboti sakasaññāya vinā gaṇhanto bhaṇḍaṃ agghāpetvā āpattiyā kāretabbo. Vikappanupagapacchimacīvaratā, sāmaṃ dinnatā, sakasaññitā, upasampannatā, kodhavasena acchindanaṃ acchindāpanaṃ vāti imānettha pañca aṅgāni.
ចីវរអច្ឆិន្ទនសិក្ខាបទវណ្ណនា និដ្ឋិតា។
Cīvaraacchindanasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៥. ចីវរអច្ឆិន្ទនសិក្ខាបទំ • 5. Cīvaraacchindanasikkhāpadaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៥. ចីវរអច្ឆិន្ទនសិក្ខាបទវណ្ណនា • 5. Cīvaraacchindanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៥. ចីវរអច្ឆិន្ទនសិក្ខាបទវណ្ណនា • 5. Cīvaraacchindanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៥. ចីវរអច្ឆិន្ទនសិក្ខាបទវណ្ណនា • 5. Cīvaraacchindanasikkhāpadavaṇṇanā
