| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೩. ಛತ್ತಙ್ಗಪಞ್ಹೋ
3. Chattaṅgapañho
೩. ‘‘ಭನ್ತೇ ನಾಗಸೇನ, ‘ಛತ್ತಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಛತ್ತಂ ಉಪರಿ ಮುದ್ಧನಿ ಚರತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಕಿಲೇಸಾನಂ ಉಪರಿ ಮುದ್ಧನಿ ಚರೇನ ಭವಿತಬ್ಬಂ। ಇದಂ, ಮಹಾರಾಜ, ಛತ್ತಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
3. ‘‘Bhante nāgasena, ‘chattassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, chattaṃ upari muddhani carati, evameva kho, mahārāja, yoginā yogāvacarena kilesānaṃ upari muddhani carena bhavitabbaṃ. Idaṃ, mahārāja, chattassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಛತ್ತಂ ಮುದ್ಧನುಪತ್ಥಮ್ಭಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯೋನಿಸೋ ಮನಸಿಕಾರುಪತ್ಥಮ್ಭೇನ ಭವಿತಬ್ಬಂ। ಇದಂ, ಮಹಾರಾಜ, ಛತ್ತಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, chattaṃ muddhanupatthambhaṃ hoti, evameva kho, mahārāja, yoginā yogāvacarena yoniso manasikārupatthambhena bhavitabbaṃ. Idaṃ, mahārāja, chattassa dutiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಛತ್ತಂ ವಾತಾತಪಮೇಘವುಟ್ಠಿಯೋ ಪಟಿಹನತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ನಾನಾವಿಧದಿಟ್ಠಿಪುಥುಸಮಣಬ್ರಾಹ್ಮಣಾನಂ 1 ಮತವಾತತಿವಿಧಗ್ಗಿಸನ್ತಾಪಕಿಲೇಸವುಟ್ಠಿಯೋ ಪಟಿಹನ್ತಬ್ಬಾ । ಇದಂ, ಮಹಾರಾಜ, ಛತ್ತಸ್ಸ ತತಿಯಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸಾರಿಪುತ್ತೇನ ಧಮ್ಮಸೇನಾಪತಿನಾ –
‘‘Puna caparaṃ, mahārāja, chattaṃ vātātapameghavuṭṭhiyo paṭihanati, evameva kho, mahārāja, yoginā yogāvacarena nānāvidhadiṭṭhiputhusamaṇabrāhmaṇānaṃ 2 matavātatividhaggisantāpakilesavuṭṭhiyo paṭihantabbā . Idaṃ, mahārāja, chattassa tatiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ಯಥಾಪಿ ಛತ್ತಂ ವಿಪುಲಂ, ಅಚ್ಛಿದ್ದಂ ಥಿರಸಂಹಿತಂ।
‘‘‘Yathāpi chattaṃ vipulaṃ, acchiddaṃ thirasaṃhitaṃ;
ವಾತಾತಪಂ ನಿವಾರೇತಿ, ಮಹತೀ ಮೇಘವುಟ್ಠಿಯೋ॥
Vātātapaṃ nivāreti, mahatī meghavuṭṭhiyo.
‘‘‘ತಥೇವ ಬುದ್ಧಪುತ್ತೋಪಿ, ಸೀಲಛತ್ತಧರೋ ಸುಚಿ।
‘‘‘Tatheva buddhaputtopi, sīlachattadharo suci;
ಕಿಲೇಸವುಟ್ಠಿಂ ವಾರೇತಿ, ಸನ್ತಾಪತಿವಿಧಗ್ಗಯೋ’’’ತಿ॥
Kilesavuṭṭhiṃ vāreti, santāpatividhaggayo’’’ti.
ಛತ್ತಙ್ಗಪಞ್ಹೋ ತತಿಯೋ।
Chattaṅgapañho tatiyo.
Footnotes:
