| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៤. ឆព្ពស្សសិក្ខាបទវណ្ណនា
4. Chabbassasikkhāpadavaṇṇanā
៥៥៧. តេន សមយេនាតិ ឆព្ពស្សសិក្ខាបទំ។ តត្ថ ឩហទន្តិបិ ឧម្មិហន្តិបីតិ សន្ថតានំ ឧបរិ វច្ចម្បិ បស្សាវម្បិ ករោន្តីតិ វុត្តំ ហោតិ។
557.Tenasamayenāti chabbassasikkhāpadaṃ. Tattha ūhadantipi ummihantipīti santhatānaṃ upari vaccampi passāvampi karontīti vuttaṃ hoti.
ទិន្នា សង្ឃេន ឥត្ថន្នាមស្ស ភិក្ខុនោ សន្ថតសម្មុតីតិ ឯវំ លទ្ធសម្មុតិកោ ភិក្ខុ យាវ រោគោ ន វូបសម្មតិ, តាវ យំ យំ ឋានំ គច្ឆតិ, តត្ថ តត្ថ សន្ថតំ កាតុំ លភតិ។ សចេ អរោគោ ហុត្វា បុន មូលព្យាធិនាវ គិលានោ ហោតិ, សោយេវ បរិហារោ, នត្ថញ្ញំ សម្មុតិកិច្ចន្តិ ផុស្សទេវត្ថេរោ អាហ។ ឧបតិស្សត្ថេរោ បន ‘‘សោ វា ព្យាធិ បដិកុប្បតុ, អញ្ញោ វា, ‘សកិំ គិលានោ’តិ នាមំ លទ្ធំ លទ្ធមេវ, បុន សម្មុតិកិច្ចំ នត្ថី’’តិ អាហ។
Dinnā saṅghena itthannāmassa bhikkhuno santhatasammutīti evaṃ laddhasammutiko bhikkhu yāva rogo na vūpasammati, tāva yaṃ yaṃ ṭhānaṃ gacchati, tattha tattha santhataṃ kātuṃ labhati. Sace arogo hutvā puna mūlabyādhināva gilāno hoti, soyeva parihāro, natthaññaṃ sammutikiccanti phussadevatthero āha. Upatissatthero pana ‘‘so vā byādhi paṭikuppatu, añño vā, ‘sakiṃ gilāno’ti nāmaṃ laddhaṃ laddhameva, puna sammutikiccaṃ natthī’’ti āha.
ឱរេន ចេ ឆន្នំ វស្សានន្តិ ឆន្នំ វស្សានំ ឱរិមភាគេ, អន្តោតិ អត្ថោ។ បទភាជនេ បន សង្ខ្យាមត្តទស្សនត្ថំ ‘‘ឩនកឆព្ពស្សានី’’តិ វុត្តំ។
Orenace channaṃ vassānanti channaṃ vassānaṃ orimabhāge, antoti attho. Padabhājane pana saṅkhyāmattadassanatthaṃ ‘‘ūnakachabbassānī’’ti vuttaṃ.
អនាបត្តិ ឆព្ពស្សានិ ករោតីតិ យទា ឆព្ពស្សានិ បរិបុណ្ណានិ ហោន្តិ, តទា សន្ថតំ ករោតិ។ ទុតិយបទេបិ ‘‘យទា អតិរេកឆព្ពស្សានិ ហោន្តិ, តទា ករោតី’’តិ ឯវមត្ថោ ទដ្ឋព្ពោ។ ន ហិ សោ ឆព្ពស្សានិ ករោតីតិ។ សេសំ ឧត្តានត្ថមេវ។
Anāpatti chabbassāni karotīti yadā chabbassāni paripuṇṇāni honti, tadā santhataṃ karoti. Dutiyapadepi ‘‘yadā atirekachabbassāni honti, tadā karotī’’ti evamattho daṭṭhabbo. Na hi so chabbassāni karotīti. Sesaṃ uttānatthameva.
សមុដ្ឋានាទីនិ កោសិយសិក្ខាបទសទិសានេវាតិ។
Samuṭṭhānādīni kosiyasikkhāpadasadisānevāti.
ឆព្ពស្សសិក្ខាបទវណ្ណនា និដ្ឋិតា។
Chabbassasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៤. ឆព្ពស្សសិក្ខាបទំ • 4. Chabbassasikkhāpadaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៤. ឆព្ពស្សសិក្ខាបទវណ្ណនា • 4. Chabbassasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៤. ឆព្ពស្សសិក្ខាបទវណ្ណនា • 4. Chabbassasikkhāpadavaṇṇanā
