| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. চেতিযপাটিহারিযপঞ্হো
7. Cetiyapāṭihāriyapañho
৭. ‘‘ভন্তে নাগসেন, সব্বেসং পরিনিব্বুতানং চেতিযে পাটিহীরং হোতি, উদাহু একচ্চানং যেৰ হোতী’’তি? ‘‘একচ্চানং, মহারাজ, হোতি, একচ্চানং ন হোতী’’তি। ‘‘কতমেসং, ভন্তে, হোতি, কতমেসং ন হোতী’’তি? ‘‘তিণ্ণন্নং, মহারাজ, অঞ্ঞতরস্স অধিট্ঠানা পরিনিব্বুতস্স চেতিযে পাটিহীরং হোতি। কতমেসং তিণ্ণন্নং? ইধ, মহারাজ, অরহা দেৰমনুস্সানং অনুকম্পায তিট্ঠন্তোৰ অধিট্ঠাতি ‘এৰংনাম চেতিযে পাটিহীরং হোতূ’তি, তস্স অধিট্ঠানৰসেন চেতিযে পাটিহীরং হোতি, এৰং অরহতো অধিট্ঠানৰসেন পরিনিব্বুতস্স চেতিযে পাটিহীরং হোতি।
7. ‘‘Bhante nāgasena, sabbesaṃ parinibbutānaṃ cetiye pāṭihīraṃ hoti, udāhu ekaccānaṃ yeva hotī’’ti? ‘‘Ekaccānaṃ, mahārāja, hoti, ekaccānaṃ na hotī’’ti. ‘‘Katamesaṃ, bhante, hoti, katamesaṃ na hotī’’ti? ‘‘Tiṇṇannaṃ, mahārāja, aññatarassa adhiṭṭhānā parinibbutassa cetiye pāṭihīraṃ hoti. Katamesaṃ tiṇṇannaṃ? Idha, mahārāja, arahā devamanussānaṃ anukampāya tiṭṭhantova adhiṭṭhāti ‘evaṃnāma cetiye pāṭihīraṃ hotū’ti, tassa adhiṭṭhānavasena cetiye pāṭihīraṃ hoti, evaṃ arahato adhiṭṭhānavasena parinibbutassa cetiye pāṭihīraṃ hoti.
‘‘পুন চপরং, মহারাজ, দেৰতা মনুস্সানং অনুকম্পায পরিনিব্বুতস্স চেতিযে পাটিহীরং দস্সেন্তি ‘ইমিনা পাটিহীরেন সদ্ধম্মো নিচ্চসম্পগ্গহিতো ভৰিস্সতি, মনুস্সা চ পসন্না কুসলেন অভিৰড্ঢিস্সন্তী’তি, এৰং দেৰতানং অধিট্ঠানৰসেন পরিনিব্বুতস্স চেতিযে পাটিহীরং হোতি।
‘‘Puna caparaṃ, mahārāja, devatā manussānaṃ anukampāya parinibbutassa cetiye pāṭihīraṃ dassenti ‘iminā pāṭihīrena saddhammo niccasampaggahito bhavissati, manussā ca pasannā kusalena abhivaḍḍhissantī’ti, evaṃ devatānaṃ adhiṭṭhānavasena parinibbutassa cetiye pāṭihīraṃ hoti.
‘‘পুন চপরং, মহারাজ, ইত্থী ৰা পুরিসো ৰা সদ্ধো পসন্নো পণ্ডিতো ব্যত্তো মেধাৰী বুদ্ধিসম্পন্নো যোনিসো চিন্তযিত্ৰা গন্ধং ৰা মালং ৰা দুস্সং ৰা অঞ্ঞতরং ৰা কিঞ্চি অধিট্ঠহিত্ৰা চেতিযে উক্খিপতি ‘এৰংনাম হোতূ’তি, তস্সপি অধিট্ঠানৰসেন পরিনিব্বুতস্স চেতিযে পাটিহীরং হোতি, এৰং মনুস্সানং অধিট্ঠানৰসেন পরিনিব্বুতস্স চেতিযে পাটিহীরং হোতি।
‘‘Puna caparaṃ, mahārāja, itthī vā puriso vā saddho pasanno paṇḍito byatto medhāvī buddhisampanno yoniso cintayitvā gandhaṃ vā mālaṃ vā dussaṃ vā aññataraṃ vā kiñci adhiṭṭhahitvā cetiye ukkhipati ‘evaṃnāma hotū’ti, tassapi adhiṭṭhānavasena parinibbutassa cetiye pāṭihīraṃ hoti, evaṃ manussānaṃ adhiṭṭhānavasena parinibbutassa cetiye pāṭihīraṃ hoti.
‘‘ইমেসং খো, মহারাজ, তিণ্ণন্নং অঞ্ঞতরস্স অধিট্ঠানৰসেন পরিনিব্বুতস্স চেতিযে পাটিহীরং হোতি।
‘‘Imesaṃ kho, mahārāja, tiṇṇannaṃ aññatarassa adhiṭṭhānavasena parinibbutassa cetiye pāṭihīraṃ hoti.
‘‘যদি, মহারাজ, তেসং অধিট্ঠানং ন হোতি, খীণাসৰস্সপি ছল়ভিঞ্ঞস্স চেতোৰসিপ্পত্তস্স চেতিযে পাটিহীরং ন হোতি, অসতিপি , মহারাজ, পাটিহীরে চরিতং দিস্ৰা সুপরিসুদ্ধং ওকপ্পেতব্বং নিট্ঠং গন্তব্বং সদ্দহিতব্বং ‘সুপরিনিব্বুতো অযং বুদ্ধপুত্তো’’’তি। ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি।
‘‘Yadi, mahārāja, tesaṃ adhiṭṭhānaṃ na hoti, khīṇāsavassapi chaḷabhiññassa cetovasippattassa cetiye pāṭihīraṃ na hoti, asatipi , mahārāja, pāṭihīre caritaṃ disvā suparisuddhaṃ okappetabbaṃ niṭṭhaṃ gantabbaṃ saddahitabbaṃ ‘suparinibbuto ayaṃ buddhaputto’’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
চেতিযপাটিহারিযপঞ্হো সত্তমো।
Cetiyapāṭihāriyapañho sattamo.
