| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
১১. চেতনালক্খণপঞ্হো
11. Cetanālakkhaṇapañho
১১. ‘‘ভন্তে নাগসেন, কিংলক্খণা চেতনা’’তি? ‘‘চেতযিতলক্খণা, মহারাজ, চেতনা অভিসঙ্খরণলক্খণা চা’’তি।
11. ‘‘Bhante nāgasena, kiṃlakkhaṇā cetanā’’ti? ‘‘Cetayitalakkhaṇā, mahārāja, cetanā abhisaṅkharaṇalakkhaṇā cā’’ti.
‘‘ওপম্মং করোহী’’তি। ‘‘যথা, মহারাজ, কোচিদেৰ পুরিসো ৰিসং অভিসঙ্খরিত্ৰা অত্তনা চ পিৰেয্য, পরে চ পাযেয্য, সো অত্তনাপি দুক্খিতো ভৰেয্য, পরেপি দুক্খিতা ভৰেয্যুং। এৰমেৰ খো, মহারাজ, ইধেকচ্চো পুগ্গলো অকুসলং কম্মং চেতনায চেতযিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য। যেপি তস্স অনুসিক্খন্তি , তেপি কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তি।
‘‘Opammaṃ karohī’’ti. ‘‘Yathā, mahārāja, kocideva puriso visaṃ abhisaṅkharitvā attanā ca piveyya, pare ca pāyeyya, so attanāpi dukkhito bhaveyya, parepi dukkhitā bhaveyyuṃ. Evameva kho, mahārāja, idhekacco puggalo akusalaṃ kammaṃ cetanāya cetayitvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyya. Yepi tassa anusikkhanti , tepi kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti.
‘‘যথা ৰা পন, মহারাজ, কোচিদেৰ পুরিসো সপ্পিনৰনীততেলমধুফাণিতং একজ্ঝং অভিসঙ্খরিত্ৰা অত্তনা চ পিৰেয্য, পরে চ পাযেয্য, সো অত্তনা সুখিতো ভৰেয্য, পরেপি সুখিতা ভৰেয্যুং। এৰমেৰ খো, মহারাজ, ইধেকচ্চো পুগ্গলো কুসলং কম্মং চেতনায চেতযিত্ৰা কাযস্স ভেদা পরং মরণা সুগতিং সগ্গং লোকং উপপজ্জতি। যেপি তস্স অনুসিক্খন্তি, তেপি কাযস্স ভেদা পরং মরণা সুগতিং সগ্গং লোকং উপপজ্জন্তি। এৰং খো, মহারাজ, চেতযিতলক্খণা চেতনা অভিসঙ্খরণলক্খণা চা’’তি।
‘‘Yathā vā pana, mahārāja, kocideva puriso sappinavanītatelamadhuphāṇitaṃ ekajjhaṃ abhisaṅkharitvā attanā ca piveyya, pare ca pāyeyya, so attanā sukhito bhaveyya, parepi sukhitā bhaveyyuṃ. Evameva kho, mahārāja, idhekacco puggalo kusalaṃ kammaṃ cetanāya cetayitvā kāyassa bhedā paraṃ maraṇā sugatiṃ saggaṃ lokaṃ upapajjati. Yepi tassa anusikkhanti, tepi kāyassa bhedā paraṃ maraṇā sugatiṃ saggaṃ lokaṃ upapajjanti. Evaṃ kho, mahārāja, cetayitalakkhaṇā cetanā abhisaṅkharaṇalakkhaṇā cā’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
চেতনালক্খণপঞ্হো একাদসমো।
Cetanālakkhaṇapañho ekādasamo.
