| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
১২. ৰিঞ্ঞাণলক্খণপঞ্হো
12. Viññāṇalakkhaṇapañho
১২. ‘‘ভন্তে নাগসেন, কিংলক্খণং ৰিঞ্ঞাণ’’ন্তি? ‘‘ৰিজাননলক্খণং, মহারাজ, ৰিঞ্ঞাণ’’ন্তি।
12. ‘‘Bhante nāgasena, kiṃlakkhaṇaṃ viññāṇa’’nti? ‘‘Vijānanalakkhaṇaṃ, mahārāja, viññāṇa’’nti.
‘‘ওপম্মং করোহী’’তি। ‘‘যথা, মহারাজ, নগরগুত্তিকো মজ্ঝে নগরসিঙ্ঘাটকে নিসিন্নো পস্সেয্য পুরত্থিমদিসতো পুরিসং আগচ্ছন্তং, পস্সেয্য দক্খিণদিসতো পুরিসং আগচ্ছন্তং, পস্সেয্য পচ্ছিমদিসতো পুরিসং আগচ্ছন্তং, পস্সেয্য উত্তরদিসতো পুরিসং আগচ্ছন্তং। এৰমেৰ খো, মহারাজ, যঞ্চ পুরিসো চক্খুনা রূপং পস্সতি, তং ৰিঞ্ঞাণেন ৰিজানাতি। যঞ্চ সোতেন সদ্দং সুণাতি, তং ৰিঞ্ঞাণেন ৰিজানাতি। যঞ্চ ঘানেন গন্ধং ঘাযতি, তং ৰিঞ্ঞাণেন ৰিজানাতি। যঞ্চ জিৰ্হায রসং সাযতি, তং ৰিঞ্ঞাণেন ৰিজানাতি। যঞ্চ কাযেন ফোট্ঠব্বং ফুসতি, তং ৰিঞ্ঞাণেন ৰিজানাতি, যঞ্চ মনসা ধম্মং ৰিজানাতি, তং ৰিঞ্ঞাণেন ৰিজানাতি। এৰং খো, মহারাজ, ৰিজাননলক্খণং ৰিঞ্ঞাণ’’ন্তি।
‘‘Opammaṃ karohī’’ti. ‘‘Yathā, mahārāja, nagaraguttiko majjhe nagarasiṅghāṭake nisinno passeyya puratthimadisato purisaṃ āgacchantaṃ, passeyya dakkhiṇadisato purisaṃ āgacchantaṃ, passeyya pacchimadisato purisaṃ āgacchantaṃ, passeyya uttaradisato purisaṃ āgacchantaṃ. Evameva kho, mahārāja, yañca puriso cakkhunā rūpaṃ passati, taṃ viññāṇena vijānāti. Yañca sotena saddaṃ suṇāti, taṃ viññāṇena vijānāti. Yañca ghānena gandhaṃ ghāyati, taṃ viññāṇena vijānāti. Yañca jivhāya rasaṃ sāyati, taṃ viññāṇena vijānāti. Yañca kāyena phoṭṭhabbaṃ phusati, taṃ viññāṇena vijānāti, yañca manasā dhammaṃ vijānāti, taṃ viññāṇena vijānāti. Evaṃ kho, mahārāja, vijānanalakkhaṇaṃ viññāṇa’’nti.
‘‘কল্লোসি , ভন্তে নাগসেনা’’তি।
‘‘Kallosi , bhante nāgasenā’’ti.
ৰিঞ্ঞাণলক্খণপঞ্হো দ্ৰাদসমো।
Viññāṇalakkhaṇapañho dvādasamo.
