| Library / Tipiṭaka / តិបិដក • Tipiṭaka / វិនយវិនិច្ឆយ-ដីកា • Vinayavinicchaya-ṭīkā |
ចតុវិបត្តិកថាវណ្ណនា
Catuvipattikathāvaṇṇanā
២៧៣. ឥទានិ ឧភយសាធារណំ កត្វា វិបត្តិវារាទីនំ វិសិដ្ឋវារានំ សង្គហំ កាតុមាហ ‘‘កតិ អាបត្តិយោ’’តិអាទិ។
273. Idāni ubhayasādhāraṇaṃ katvā vipattivārādīnaṃ visiṭṭhavārānaṃ saṅgahaṃ kātumāha ‘‘kati āpattiyo’’tiādi.
២៧៤. ភិក្ខុនី សចេ ឆាទេតិ, ចុតា ហោតិ។ សចេ វេមតិកា ឆាទេតិ, ថុល្លច្ចយំ សិយាតិ យោជនា។
274. Bhikkhunī sace chādeti, cutā hoti. Sace vematikā chādeti, thullaccayaṃ siyāti yojanā.
២៧៥. សង្ឃាទិសេសន្តិ បរស្ស សង្ឃាទិសេសំ។
275.Saṅghādisesanti parassa saṅghādisesaṃ.
២៧៦. ‘‘កតិ អាចារវិបត្តិបច្ចយា’’តិ បទច្ឆេទោ។
276. ‘‘Kati ācāravipattipaccayā’’ti padacchedo.
២៧៧. អាចារវិបត្តិន្តិ អត្តនោ វា បរស្ស វា អាចារវិបត្តិំ។
277.Ācāravipattinti attano vā parassa vā ācāravipattiṃ.
២៧៩. បាបិកំ ទិដ្ឋិន្តិ អហេតុកអកិរិយនត្ថិកទិដ្ឋិអាទិំ លាមិកំ ទិដ្ឋិំ។
279.Pāpikaṃ diṭṭhinti ahetukaakiriyanatthikadiṭṭhiādiṃ lāmikaṃ diṭṭhiṃ.
២៨១. មនុស្សុត្តរិធម្មន្តិ ឧត្តរិមនុស្សធម្មំ។
281.Manussuttaridhammanti uttarimanussadhammaṃ.
២៨២. អាជីវហេតុ សញ្ចរិត្តំ សមាបន្នោតិ យោជនា។ បរិយាយវចនេតិ ‘‘យោ តេ វិហារេ វសតិ, សោ ភិក្ខុ អរហា’’តិអាទិកេ លេសវចនេ។ ញាតេតិ យំ ឧទ្ទិស្ស វទតិ, តស្មិំ មនុស្សជាតិកេ វចនសមនន្តរមេវ ញាតេ។
282. Ājīvahetu sañcarittaṃ samāpannoti yojanā. Pariyāyavacaneti ‘‘yo te vihāre vasati, so bhikkhu arahā’’tiādike lesavacane. Ñāteti yaṃ uddissa vadati, tasmiṃ manussajātike vacanasamanantarameva ñāte.
២៨៣. វត្វាតិ អគិលានោ អត្តនោ អត្ថាយ វិញ្ញាបេត្វា។ ភិក្ខុនី បន សចេ ឯវំ ហោតិ, ភិក្ខុនី អគិលានា អត្តនោ អត្ថាយ បណីតភោជនំ វិញ្ញាបេត្វា ភុត្តាវិនី សចេ ហោតីតិ អធិប្បាយោ។ តស្សា បាដិទេសនីយំ សិយាតិ យោជនា។
283.Vatvāti agilāno attano atthāya viññāpetvā. Bhikkhunī pana sace evaṃ hoti, bhikkhunī agilānā attano atthāya paṇītabhojanaṃ viññāpetvā bhuttāvinī sace hotīti adhippāyo. Tassā pāṭidesanīyaṃ siyāti yojanā.
២៨៤. ‘‘អត្តនោ អត្ថាយ វិញ្ញាបេត្វានា’’តិ ឥមិនា បរស្ស ញាតកបវារិតេ តស្សេវត្ថាយ វិញ្ញាបេត្វា តេន ទិន្នំ វា តស្ស វិស្សាសេន វា បរិភុញ្ជន្តស្ស តេសំ អត្តនោ អញ្ញាតកអប្បវារិតេ សុទ្ធចិត្តតាយ អនាបត្តីតិ ទីបេតិ។
284.‘‘Attano atthāya viññāpetvānā’’ti iminā parassa ñātakapavārite tassevatthāya viññāpetvā tena dinnaṃ vā tassa vissāsena vā paribhuñjantassa tesaṃ attano aññātakaappavārite suddhacittatāya anāpattīti dīpeti.
ឥតិ ឧត្តរេ លីនត្ថបកាសនិយា
Iti uttare līnatthapakāsaniyā
ចតុវិបត្តិកថាវណ្ណនា និដ្ឋិតា។
Catuvipattikathāvaṇṇanā niṭṭhitā.
