| Library / Tipiṭaka / तिपिटक • Tipiṭaka / विनयविनिच्छय-टीका • Vinayavinicchaya-ṭīkā |
चतुविपत्तिकथावण्णना
Catuvipattikathāvaṇṇanā
२७३. इदानि उभयसाधारणं कत्वा विपत्तिवारादीनं विसिट्ठवारानं सङ्गहं कातुमाह ‘‘कति आपत्तियो’’तिआदि।
273. Idāni ubhayasādhāraṇaṃ katvā vipattivārādīnaṃ visiṭṭhavārānaṃ saṅgahaṃ kātumāha ‘‘kati āpattiyo’’tiādi.
२७४. भिक्खुनी सचे छादेति, चुता होति। सचे वेमतिका छादेति, थुल्लच्चयं सियाति योजना।
274. Bhikkhunī sace chādeti, cutā hoti. Sace vematikā chādeti, thullaccayaṃ siyāti yojanā.
२७५. सङ्घादिसेसन्ति परस्स सङ्घादिसेसं।
275.Saṅghādisesanti parassa saṅghādisesaṃ.
२७६. ‘‘कति आचारविपत्तिपच्चया’’ति पदच्छेदो।
276. ‘‘Kati ācāravipattipaccayā’’ti padacchedo.
२७७. आचारविपत्तिन्ति अत्तनो वा परस्स वा आचारविपत्तिं।
277.Ācāravipattinti attano vā parassa vā ācāravipattiṃ.
२७९. पापिकं दिट्ठिन्ति अहेतुकअकिरियनत्थिकदिट्ठिआदिं लामिकं दिट्ठिं।
279.Pāpikaṃ diṭṭhinti ahetukaakiriyanatthikadiṭṭhiādiṃ lāmikaṃ diṭṭhiṃ.
२८१. मनुस्सुत्तरिधम्मन्ति उत्तरिमनुस्सधम्मं।
281.Manussuttaridhammanti uttarimanussadhammaṃ.
२८२. आजीवहेतु सञ्चरित्तं समापन्नोति योजना। परियायवचनेति ‘‘यो ते विहारे वसति, सो भिक्खु अरहा’’तिआदिके लेसवचने। ञातेति यं उद्दिस्स वदति, तस्मिं मनुस्सजातिके वचनसमनन्तरमेव ञाते।
282. Ājīvahetu sañcarittaṃ samāpannoti yojanā. Pariyāyavacaneti ‘‘yo te vihāre vasati, so bhikkhu arahā’’tiādike lesavacane. Ñāteti yaṃ uddissa vadati, tasmiṃ manussajātike vacanasamanantarameva ñāte.
२८३. वत्वाति अगिलानो अत्तनो अत्थाय विञ्ञापेत्वा। भिक्खुनी पन सचे एवं होति, भिक्खुनी अगिलाना अत्तनो अत्थाय पणीतभोजनं विञ्ञापेत्वा भुत्ताविनी सचे होतीति अधिप्पायो। तस्सा पाटिदेसनीयं सियाति योजना।
283.Vatvāti agilāno attano atthāya viññāpetvā. Bhikkhunī pana sace evaṃ hoti, bhikkhunī agilānā attano atthāya paṇītabhojanaṃ viññāpetvā bhuttāvinī sace hotīti adhippāyo. Tassā pāṭidesanīyaṃ siyāti yojanā.
२८४. ‘‘अत्तनो अत्थाय विञ्ञापेत्वाना’’ति इमिना परस्स ञातकपवारिते तस्सेवत्थाय विञ्ञापेत्वा तेन दिन्नं वा तस्स विस्सासेन वा परिभुञ्जन्तस्स तेसं अत्तनो अञ्ञातकअप्पवारिते सुद्धचित्तताय अनापत्तीति दीपेति।
284.‘‘Attano atthāya viññāpetvānā’’ti iminā parassa ñātakapavārite tassevatthāya viññāpetvā tena dinnaṃ vā tassa vissāsena vā paribhuñjantassa tesaṃ attano aññātakaappavārite suddhacittatāya anāpattīti dīpeti.
इति उत्तरे लीनत्थपकासनिया
Iti uttare līnatthapakāsaniyā
चतुविपत्तिकथावण्णना निट्ठिता।
Catuvipattikathāvaṇṇanā niṭṭhitā.
