| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
១៨៥. ចតុមហាបទេសកថា
185. Catumahāpadesakathā
៣០៥. ឥទំ ន កប្បតីតិអាទីតិ ‘‘ឥទំ ន កប្បតី’’តិអាទយោ ឥមេ ចត្តារោ មហាបទេសេតិ យោជនា។ អបស្សយំ កត្វា ទិសិយន្តិ ឯត្ថាតិ អបទេសា ឱកាសា, អបស្សយំ កត្វា ទិសិយន្តិ ឯតេហីតិ វា អបទេសា ការណា, ‘‘មហន្តា អបទេសា មហាបទេសា។ តញ្ចាតិ មហាបទេសសង្ខាតំ តញ្ច សុត្តំ, គហេត្វាតិ យោជនា។ បរិមទ្ទន្តាតិ បុនប្បុនំ មទ្ទន្តា, ឧបបរិក្ខន្តាតិ អត្ថោ។ ឥទន្តិ ការណំ។ តន្តិ នវមហាផលអបរណ្ណំ។ តានីតិ ខុទ្ទកផលបានានិ។ ហីតិ សច្ចំ។
305.Idaṃ na kappatītiādīti ‘‘idaṃ na kappatī’’tiādayo ime cattāro mahāpadeseti yojanā. Apassayaṃ katvā disiyanti etthāti apadesā okāsā, apassayaṃ katvā disiyanti etehīti vā apadesā kāraṇā, ‘‘mahantā apadesā mahāpadesā. Tañcāti mahāpadesasaṅkhātaṃ tañca suttaṃ, gahetvāti yojanā. Parimaddantāti punappunaṃ maddantā, upaparikkhantāti attho. Idanti kāraṇaṃ. Tanti navamahāphalaaparaṇṇaṃ. Tānīti khuddakaphalapānāni. Hīti saccaṃ.
តេសន្តិ ឆន្នំ ចីវរានំ។ តត្ថាតិ ឆសុ អនុលោមចីវរេសុ។ ‘‘បាណកេហិ សញ្ជាតវត្ថ’’ន្តិ ឥមិនា កោសេយ្យវត្ថភាវំ ទស្សេតិ។ ទ្វេ បដាតិ ចីនបដសោមារបដា។ ទុកូលំ សាណស្ស អនុលោមន្តិ យោជនា។
Tesanti channaṃ cīvarānaṃ. Tatthāti chasu anulomacīvaresu. ‘‘Pāṇakehi sañjātavattha’’nti iminā koseyyavatthabhāvaṃ dasseti. Dve paṭāti cīnapaṭasomārapaṭā. Dukūlaṃ sāṇassa anulomanti yojanā.
តេសំយេវាតិ ទ្វិន្នំ បត្តានមេវ។ តេសំយេវាតិ តិណ្ណំ តុម្ពានមេវ។ តេសំយេវាតិ ទ្វិន្នំ កាយពន្ធនានមេវ។ សេតច្ឆត្តន្តិ សេតេហិ វត្ថេហិ កតំ ឆត្តំ។ តេសំយេវាតិ តិណ្ណំ ឆត្តានមេវ។
Tesaṃyevāti dvinnaṃ pattānameva. Tesaṃyevāti tiṇṇaṃ tumbānameva. Tesaṃyevāti dvinnaṃ kāyabandhanānameva. Setacchattanti setehi vatthehi kataṃ chattaṃ. Tesaṃyevāti tiṇṇaṃ chattānameva.
សម្ភិន្នរសន្តិ សំសគ្គរសំ។ ឯត្ថ ភិជ្ជិត្ថាតិ ភិន្នោតិ វចនត្ថេន ភិទិធាតុ ទ្វិធាករណសង្ខាតោ ភេទត្ថោ ហោតិ, ធាត្វត្ថពាធកេន សំត្យូបសគ្គេន ភិទិធាតុយា ភេទត្ថំ ពាធេត្វា សំសគ្គត្ថវាចកោ ហោតីតិ ទដ្ឋព្ពំ។ ឆល្លិម្បីតិ តចម្បិ។ សកលេនេវាតិ ឆល្លិយា ឯវ។ បាយាសេន អសំសដ្ឋំ យំ សព្ពីតិ យោជនា។ តានីតិ តក្កោលជាតិផលាទីនិ។ យដ្ឋិមធុកាទីសុបីតិ មធុលដ្ឋិកាទីសុបិ។ ‘‘លដ្ឋិមធុកាទីសុបី’’តិ វា បាឋោ, សោ អបាឋោយេវ។ យំ យន្តិ វត្ថុ។ យថាតិ យេនាការេន, ធោវិយមានេ តច្ឆិយមានេតិ សម្ពន្ធោ។
Sambhinnarasanti saṃsaggarasaṃ. Ettha bhijjitthāti bhinnoti vacanatthena bhididhātu dvidhākaraṇasaṅkhāto bhedattho hoti, dhātvatthabādhakena saṃtyūpasaggena bhididhātuyā bhedatthaṃ bādhetvā saṃsaggatthavācako hotīti daṭṭhabbaṃ. Challimpīti tacampi. Sakalenevāti challiyā eva. Pāyāsena asaṃsaṭṭhaṃ yaṃ sabbīti yojanā. Tānīti takkolajātiphalādīni. Yaṭṭhimadhukādīsupīti madhulaṭṭhikādīsupi. ‘‘Laṭṭhimadhukādīsupī’’ti vā pāṭho, so apāṭhoyeva. Yaṃ yanti vatthu. Yathāti yenākārena, dhoviyamāne tacchiyamāneti sambandho.
សម្ភិន្នរសន្តិ វត្វា តមេវត្ថំ ទស្សេតុំ វុត្តំ ‘‘សំសដ្ឋ’’ន្តិ។ សភាវន្តិ យាវកាលំ កប្បិយសភាវំ ។ តស្មាតិ យស្មា ឧបនេតិ, តស្មា។ តេនាតិ សត្តាហកាលិកេន។ តទហុបដិគ្គហិតន្តិ តទហេវ បដិគ្គហិតំ។ ទ្វីហបដិគ្គហិតេន សត្តាហកាលិកេនាតិ សម្ពន្ធោ។
Sambhinnarasanti vatvā tamevatthaṃ dassetuṃ vuttaṃ ‘‘saṃsaṭṭha’’nti. Sabhāvanti yāvakālaṃ kappiyasabhāvaṃ . Tasmāti yasmā upaneti, tasmā. Tenāti sattāhakālikena. Tadahupaṭiggahitanti tadaheva paṭiggahitaṃ. Dvīhapaṭiggahitena sattāhakālikenāti sambandho.
ឯត្ថាតិ កាលិកសំសគ្គេ។ អាបត្តិយោ វេទិតព្ពាតិ យថាក្កមំ អាបត្តិយោ វេទិតព្ពា។ សព្ពត្ថាតិ សព្ពស្មិំ ភេសជ្ជក្ខន្ធកេ។
Etthāti kālikasaṃsagge. Āpattiyo veditabbāti yathākkamaṃ āpattiyo veditabbā. Sabbatthāti sabbasmiṃ bhesajjakkhandhake.
ឥតិ ភេសជ្ជក្ខន្ធកវណ្ណនាយ យោជនា សមត្តា។
Iti bhesajjakkhandhakavaṇṇanāya yojanā samattā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ១៨៥. ចតុមហាបទេសកថា • 185. Catumahāpadesakathā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / ចតុមហាបទេសកថា • Catumahāpadesakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ចតុមហាបទេសកថាវណ្ណនា • Catumahāpadesakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / កេណិយជដិលវត្ថុកថាវណ្ណនា • Keṇiyajaṭilavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ចតុមហាបទេសកថាវណ្ណនា • Catumahāpadesakathāvaṇṇanā
