| Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi |
๑๐. ทสกนิปาโต
10. Dasakanipāto
๔๓๙. จตุทฺวารชาตกํ (๑)
439. Catudvārajātakaṃ (1)
๑.
1.
จตุทฺวารมิทํ นครํ, อายสํ ทฬฺหปาการํ;
Catudvāramidaṃ nagaraṃ, āyasaṃ daḷhapākāraṃ;
โอรุทฺธปฎิรุโทฺธสฺมิ, กิํ ปาปํ ปกตํ มยาฯ
Oruddhapaṭiruddhosmi, kiṃ pāpaṃ pakataṃ mayā.
๒.
2.
สเพฺพ อปิหิตา ทฺวารา, โอรุโทฺธสฺมิ ยถา ทิโช;
Sabbe apihitā dvārā, oruddhosmi yathā dijo;
กิมาธิกรณํ ยกฺข, จกฺกาภินิหโต อหํฯ
Kimādhikaraṇaṃ yakkha, cakkābhinihato ahaṃ.
๓.
3.
ลทฺธา สตสหสฺสานิ, อติเรกานิ วีสติ;
Laddhā satasahassāni, atirekāni vīsati;
อนุกมฺปกานํ ญาตีนํ, วจนํ สมฺม นากริฯ
Anukampakānaṃ ñātīnaṃ, vacanaṃ samma nākari.
๔.
4.
ลงฺฆิํ สมุทฺทํ ปกฺขนฺทิ, สาครํ อปฺปสิทฺธิกํ;
Laṅghiṃ samuddaṃ pakkhandi, sāgaraṃ appasiddhikaṃ;
จตุพฺภิ อฎฺฐชฺฌคมา, อฎฺฐาหิปิ จ โสฬสฯ
Catubbhi aṭṭhajjhagamā, aṭṭhāhipi ca soḷasa.
๕.
5.
โสฬสาหิ จ พาตฺติํส, อตฺริจฺฉํ จกฺกมาสโท;
Soḷasāhi ca bāttiṃsa, atricchaṃ cakkamāsado;
อิจฺฉาหตสฺส โปสสฺส, จกฺกํ ภมติ มตฺถเกฯ
Icchāhatassa posassa, cakkaṃ bhamati matthake.
๖.
6.
เย จ ตํ อนุคิชฺฌนฺติ, เต โหนฺติ จกฺกธาริโนฯ
Ye ca taṃ anugijjhanti, te honti cakkadhārino.
๗.
7.
เยสเญฺจตํ อสงฺขาตํ, เต โหนฺติ จกฺกธาริโนฯ
Yesañcetaṃ asaṅkhātaṃ, te honti cakkadhārino.
๘.
8.
กมฺมํ สเมเกฺข วิปุลญฺจ โภคํ, อิจฺฉํ น เสเวยฺย อนตฺถสํหิตํ;
Kammaṃ samekkhe vipulañca bhogaṃ, icchaṃ na seveyya anatthasaṃhitaṃ;
กเรยฺย วากฺยํ อนุกมฺปกานํ, ตํ ตาทิสํ นาติวเตฺตยฺย จกฺกํฯ
Kareyya vākyaṃ anukampakānaṃ, taṃ tādisaṃ nātivatteyya cakkaṃ.
๙.
9.
กีวจิรํ นุ เม ยกฺข, จกฺกํ สิรสิ ฐสฺสติ;
Kīvaciraṃ nu me yakkha, cakkaṃ sirasi ṭhassati;
กติ วสฺสสหสฺสานิ, ตํ เม อกฺขาหิ ปุจฺฉิโตฯ
Kati vassasahassāni, taṃ me akkhāhi pucchito.
๑๐.
10.
จกฺกํ เต สิรสิ 7 มาวิทฺธํ, น ตํ ชีวํ ปโมกฺขสีติฯ
Cakkaṃ te sirasi 8 māviddhaṃ, na taṃ jīvaṃ pamokkhasīti.
จตุทฺวารชาตกํ ปฐมํฯ
Catudvārajātakaṃ paṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๔๓๙] ๑. จตุทฺวารชาตกวณฺณนา • [439] 1. Catudvārajātakavaṇṇanā
