| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༢. ཨནཱཐཔིཎྜིཀཝགྒོ
2. Anāthapiṇḍikavaggo
༡. ཙནྡིམསསུཏྟཝཎྞནཱ
1. Candimasasuttavaṇṇanā
༩༢. པབྦཏཏཊཱ སནྡམཱནོ ཏཐཱརཱུཔོ ནདཱིནིཝཏྟནཔདེསོཔི སམྦཱདྷཊྛཱནཏཱཡ ཀཙྪོ ཝིཡཱཏི ཨཱཧ ‘‘པབྦཏཀཙྪེཔཱི’’ཏི། པཊིཔཀྑདཱུརཱིབྷཱཝེན སེཊྛཊྛེན ཙ ཨེཀོ ཨུདེཏཱིཏི ཨེཀོདི, ཨེཀགྒཏཱ། ཏསྨིཾ ཡོགཏོ ཨེཀགྒཙིཏྟཱ ཨིདྷ ཨེཀོདཱི། པཊིཔཀྑཏོ ཨཏྟཱནཾ ནིཔཡནྟི ཝིསོདྷེནྟཱིཏི ནིཔཀཱ, པཉྙཝནྟོ། ཏེནཱཧ ‘‘ཨེཀགྒཙིཏྟཱ ཙེཝཱ’’ཏིཨཱདི། ཀཱཡཱདིབྷེདཾ ཨཱརམྨཎཾ སཱཏིསཡཱཡ སཏིཡཱ སརནྟཱིཏི སཏཱ། ཏེནཱཧ ‘‘སཏིམནྟོ’’ཏི། སོཏྠིཾ གམིསྶནྟཱིཏི ཡཐཱཝུཏྟཔདེསེ མགཱ སོཏྠིམནུཔདྡཝེན ཝཏྟིསྶནྟི, ཨེཝཾ ཛྷཱནལཱབྷིནོ སོཏྠིཾ ཀིལེསེཧི ཨནུཔདྡུཏཱ ཝཏྟིསྶནྟི། ཨཡཾ ཀིར དེཝཔུཏྟོ བྲཧྨལོཀེ ནིབྦཱནསཉྙཱི, ཏསྨཱ ཨེཝམཱཧ། བྷགཝཱ ‘‘ཨཡཾ དེཝཔུཏྟོ ཨནིབྦཱནགཱམཱི སམཱནོ ནིབྦཱནགཱམིསཉྙཱི, ཧནྡསྶ ནིབྦཱནགཱམིནོ དསྶེམཱི’’ཏི དུཏིཡཾ གཱཐམཱཧ། ཙཏུནྣཾ ཨོགྷཱནཾ, སཾསཱརམཧོགྷསྶེཝ ཝཱ པརཏཱིརབྷཱཝཏོ པརཏཱིརནྟི ནིབྦཱནཾ། ཨམྦུནི ཛཱཏོ ཨམྦུཛོ, མཙྪོ། སུཏྟཛཱལཾ ཚིནྡིཏྭཱ མཙྪཱ ཝིཡ ཀིལེསཛཱལཾ བྷིནྡིཏྭཱ གམིསྶནྟཱིཏི།
92. Pabbatataṭā sandamāno tathārūpo nadīnivattanapadesopi sambādhaṭṭhānatāya kaccho viyāti āha ‘‘pabbatakacchepī’’ti. Paṭipakkhadūrībhāvena seṭṭhaṭṭhena ca eko udetīti ekodi, ekaggatā. Tasmiṃ yogato ekaggacittā idha ekodī. Paṭipakkhato attānaṃ nipayanti visodhentīti nipakā, paññavanto. Tenāha ‘‘ekaggacittā cevā’’tiādi. Kāyādibhedaṃ ārammaṇaṃ sātisayāya satiyā sarantīti satā. Tenāha ‘‘satimanto’’ti. Sotthiṃ gamissantīti yathāvuttapadese magā sotthimanupaddavena vattissanti, evaṃ jhānalābhino sotthiṃ kilesehi anupaddutā vattissanti. Ayaṃ kira devaputto brahmaloke nibbānasaññī, tasmā evamāha. Bhagavā ‘‘ayaṃ devaputto anibbānagāmī samāno nibbānagāmisaññī, handassa nibbānagāmino dassemī’’ti dutiyaṃ gāthamāha. Catunnaṃ oghānaṃ, saṃsāramahoghasseva vā paratīrabhāvato paratīranti nibbānaṃ. Ambuni jāto ambujo, maccho. Suttajālaṃ chinditvā macchā viya kilesajālaṃ bhinditvā gamissantīti.
ཙནྡིམསསུཏྟཝཎྞནཱ ནིཊྛིཏཱ།
Candimasasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡. ཙནྡིམསསུཏྟཾ • 1. Candimasasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ཙནྡིམསསུཏྟཝཎྞནཱ • 1. Candimasasuttavaṇṇanā
