| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. চন্দঙ্গপঞ্হো
7. Candaṅgapañho
৭. ‘‘ভন্তে নাগসেন, ‘চন্দস্স পঞ্চ অঙ্গানি গহেতব্বানী’তি যং ৰদেসি, কতমানি তানি পঞ্চ অঙ্গানি গহেতব্বানী’’তি? ‘‘যথা, মহারাজ, চন্দো সুক্কপক্খে উদযন্তো উত্তরুত্তরিং ৰড্ঢতি, এৰমেৰ খো, মহারাজ, যোগিনা যোগাৰচরেন আচারসীলগুণৰত্তপ্পটিপত্তিযা আগমাধিগমে পটিসল্লানে সতিপট্ঠানে ইন্দ্রিযেসু গুত্তদ্ৰারতায ভোজনে মত্তঞ্ঞুতায জাগরিযানুযোগে উত্তরুত্তরিং ৰড্ঢিতব্বং। ইদং, মহারাজ, চন্দস্স পঠমং অঙ্গং গহেতব্বং।
7. ‘‘Bhante nāgasena, ‘candassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, cando sukkapakkhe udayanto uttaruttariṃ vaḍḍhati, evameva kho, mahārāja, yoginā yogāvacarena ācārasīlaguṇavattappaṭipattiyā āgamādhigame paṭisallāne satipaṭṭhāne indriyesu guttadvāratāya bhojane mattaññutāya jāgariyānuyoge uttaruttariṃ vaḍḍhitabbaṃ. Idaṃ, mahārāja, candassa paṭhamaṃ aṅgaṃ gahetabbaṃ.
‘‘পুন চপরং, মহারাজ, চন্দো উল়ারাধিপতি, এৰমেৰ খো, মহারাজ, যোগিনা যোগাৰচরেন উল়ারেন ছন্দাধিপতিনা ভৰিতব্বং। ইদং, মহারাজ, চন্দস্স দুতিযং অঙ্গং গহেতব্বং।
‘‘Puna caparaṃ, mahārāja, cando uḷārādhipati, evameva kho, mahārāja, yoginā yogāvacarena uḷārena chandādhipatinā bhavitabbaṃ. Idaṃ, mahārāja, candassa dutiyaṃ aṅgaṃ gahetabbaṃ.
‘‘পুন চপরং, মহারাজ, চন্দো নিসায চরতি, এৰমেৰ খো, মহারাজ, যোগিনা যোগাৰচরেন পৰিৰিত্তেন ভৰিতব্বং। ইদং, মহারাজ, চন্দস্স ততিযং অঙ্গং গহেতব্বং।
‘‘Puna caparaṃ, mahārāja, cando nisāya carati, evameva kho, mahārāja, yoginā yogāvacarena pavivittena bhavitabbaṃ. Idaṃ, mahārāja, candassa tatiyaṃ aṅgaṃ gahetabbaṃ.
‘‘পুন চপরং, মহারাজ, চন্দো ৰিমানকেতু, এৰমেৰ খো, মহারাজ, যোগিনা যোগাৰচরেন সীলকেতুনা ভৰিতব্বং। ইদং, মহারাজ, চন্দস্স চতুত্থং অঙ্গং গহেতব্বং।
‘‘Puna caparaṃ, mahārāja, cando vimānaketu, evameva kho, mahārāja, yoginā yogāvacarena sīlaketunā bhavitabbaṃ. Idaṃ, mahārāja, candassa catutthaṃ aṅgaṃ gahetabbaṃ.
‘‘পুন চপরং, মহারাজ, চন্দো আযাচিতপত্থিতো উদেতি, এৰমেৰ খো, মহারাজ, যোগিনা যোগাৰচরেন আযাচিতপত্থিতেন কুলানি উপসঙ্কমিতব্বানি। ইদং, মহারাজ, চন্দস্স পঞ্চমং অঙ্গং গহেতব্বং। ভাসিতম্পেতং, মহারাজ, ভগৰতা দেৰাতিদেৰেন সংযুত্তনিকাযৰরে ‘চন্দূপমা, ভিক্খৰে, কুলানি উপসঙ্কমথ, অপকস্সেৰ কাযং অপকস্স চিত্তং নিচ্চনৰকা কুলেসু অপ্পগব্ভা’’’তি 1।
‘‘Puna caparaṃ, mahārāja, cando āyācitapatthito udeti, evameva kho, mahārāja, yoginā yogāvacarena āyācitapatthitena kulāni upasaṅkamitabbāni. Idaṃ, mahārāja, candassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘candūpamā, bhikkhave, kulāni upasaṅkamatha, apakasseva kāyaṃ apakassa cittaṃ niccanavakā kulesu appagabbhā’’’ti 2.
চন্দঙ্গপঞ্হো সত্তমো।
Candaṅgapañho sattamo.
Footnotes:
