4. Caṇḍālivimānavatthu

195.

‘‘Caṇḍāli vanda pādāni, gotamassa yasassino;

Tameva ³ anukampāya, aṭṭhāsi isisattamo ⁴.

196.

‘‘Abhippasādehi manaṃ, arahantamhi tādini ⁶;

Khippaṃ pañjalikā vanda, parittaṃ tava jīvita’’nti.

197.

Coditā bhāvitattena, sarīrantimadhārinā;

Caṇḍālī vandi pādāni, gotamassa yasassino.

198.

Tamenaṃ avadhī gāvī, caṇḍāliṃ pañjaliṃ ṭhitaṃ;

Namassamānaṃ sambuddhaṃ, andhakāre pabhaṅkaranti.

199.

‘‘Khīṇāsavaṃ vigatarajaṃ anejaṃ, ekaṃ araññamhi raho nisinnaṃ;

Deviddhipattā upasaṅkamitvā, vandāmi taṃ vīra mahānubhāva’’nti.

200.

‘‘Suvaṇṇavaṇṇā jalitā mahāyasā, vimānamoruyha anekacittā;

Parivāritā accharāsaṅgaṇena ⁸, kā tvaṃ subhe devate vandase mama’’nti.

201.

‘‘Ahaṃ bhaddante caṇḍālī, tayā vīrena ¹⁰ pesitā;

Vandiṃ arahato pāde, gotamassa yasassino.

202.

‘‘Sāhaṃ vanditvā ¹² pādāni, cutā caṇḍālayoniyā;

Vimānaṃ sabbato bhaddaṃ, upapannamhi nandane.

203.

‘‘Accharānaṃ satasahassaṃ, purakkhatvāna ¹⁴ tiṭṭhati;

Tāsāhaṃ pavarā seṭṭhā, vaṇṇena yasasāyunā.

204.

‘‘Pahūtakatakalyāṇā, sampajānā paṭissatā ¹⁶;

Muniṃ kāruṇikaṃ loke, taṃ bhante vanditumāgatā’’ti.

205.

Idaṃ vatvāna caṇḍālī, kataññū katavedinī;

Vanditvā arahato pāde, tatthevantaradhāyathāti ¹⁸.

Caṇḍālivimānaṃ catutthaṃ.