| Library / Tipiṭaka / තිපිටක • Tipiṭaka / ඉතිවුත්තකපාළි • Itivuttakapāḷi |
2. චක්ඛුසුත්තං
2. Cakkhusuttaṃ
61. වුත්තඤ්හෙතං භගවතා, වුත්තමරහතාති මෙ සුතං –
61. Vuttañhetaṃ bhagavatā, vuttamarahatāti me sutaṃ –
‘‘තීණිමානි, භික්ඛවෙ, චක්ඛූනි. කතමානි තීණි? මංසචක්ඛු, දිබ්බචක්ඛු, පඤ්ඤාචක්ඛු – ඉමානි ඛො, භික්ඛවෙ, තීණි චක්ඛූනී’’ති. එතමත්ථං භගවා අවොච. තත්ථෙතං ඉති වුච්චති –
‘‘Tīṇimāni, bhikkhave, cakkhūni. Katamāni tīṇi? Maṃsacakkhu, dibbacakkhu, paññācakkhu – imāni kho, bhikkhave, tīṇi cakkhūnī’’ti. Etamatthaṃ bhagavā avoca. Tatthetaṃ iti vuccati –
‘‘මංසචක්ඛු දිබ්බචක්ඛු, පඤ්ඤාචක්ඛු අනුත්තරං;
‘‘Maṃsacakkhu dibbacakkhu, paññācakkhu anuttaraṃ;
එතානි තීණි චක්ඛූනි, අක්ඛාසි පුරිසුත්තමො.
Etāni tīṇi cakkhūni, akkhāsi purisuttamo.
‘‘මංසචක්ඛුස්ස උප්පාදො, මග්ගො දිබ්බස්ස චක්ඛුනො;
‘‘Maṃsacakkhussa uppādo, maggo dibbassa cakkhuno;
යතො ඤාණං උදපාදි, පඤ්ඤාචක්ඛු අනුත්තරං;
Yato ñāṇaṃ udapādi, paññācakkhu anuttaraṃ;
යස්ස චක්ඛුස්ස පටිලාභා, සබ්බදුක්ඛා පමුච්චතී’’ති.
Yassa cakkhussa paṭilābhā, sabbadukkhā pamuccatī’’ti.
අයම්පි අත්ථො වුත්තො භගවතා, ඉති මෙ සුතන්ති. දුතියං.
Ayampi attho vutto bhagavatā, iti me sutanti. Dutiyaṃ.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ඉතිවුත්තක-අට්ඨකථා • Itivuttaka-aṭṭhakathā / 2. චක්ඛුසුත්තවණ්ණනා • 2. Cakkhusuttavaṇṇanā
